رەسەي پرەزيدەنتىنىڭ رەيتينگى تاعى دا شارىقتاپ كەتتى

استانا. 17 قاڭتار. رەسەي پرەزيدەنتى ۆلاديمير ءپۋتيننىڭ ءوز ەلى ەلەكتوراتى الدىنداعى رەيتينگىسى تاعى دا شارىقتاپ كوتەرىلىپ, 70 پايىزدىڭ ۇستىنە شىقتى. بۇل تۋرالى «ارگۋمەنتى ي فاكتى» باسىلىمىنا سىلتەمە جاساعان ras.kz حابارلادى. ەگەر الداعى جەكسەنبىدە پرەزيدەنت سايلاۋى وتە قالسا, ۆلاديمير ءپۋتيندى رەسەيلىكتەردىڭ 70 پايىزدان استامى قولداعان بولار ەدى. «قوعامدىق پىكىر» قورىنىڭ بايانداماسى وسىنى اڭعارتادى. ساۋالناما بارىسىندا سوتسيولوگتار رەسپوندەنتتەرگە 2012 جىلعى پرەزيدەنت سايلاۋىنا قاتىسقان ادامداردىڭ ءتىزىمىن ۇسىنعان. سوندا جاۋاپ بەرگەندەردىڭ 71 پايىزى ۆلاديمير ءپۋتيننىڭ كانديداتۋراسىنا توقتالعان. بۇدان بولەك, ۆلاديمير جيرينوۆسكي – 5, گەننادي زيۋگانوۆ – 4, ال ميحايل پروحوروۆ 1 پايىزدىق داۋىس العان. قوردىڭ اتاپ وتكەنىندەي, پرەزيدەنت 2008-2009 جىلعى داعدارىس تۇسىندا دا ءدال وسىلاي بىردەن كۇرت جوعارى شىققان. «ەلدە قولايسىز جاعداي بولا باستاعان كەزدە, جۇرت وزدەرىن قورعاي الاتىن ينستانتسياعا وسىلاي تابيعي جولمەن ارقا سۇيەيدى», – دەپ تۇسىندىرەدى مۇنى قوردىڭ باسشىسى الەكساندر وسلون. ەسكە سالا كەتەيىك, وسىنىڭ قارساڭىندا «لەۆادا-تسەنتر» سونداي-اق وسىنداي ساۋالناما قورىتىندىسىنا سۇيەنىپ, رەسەيلىكتەردىڭ باسىم بولىگىنىڭ 2018 جىلعى سايلاۋدان كەيىن دە ۆلاديمير ءپۋتيننىڭ ءوز ورىنتاعىندا قالا بەرۋىن قالايتىنىن جاريالاعان بولاتىن. بۇدان باسقا, رەسەي باسشىسى وتكەن جىلى تاعى دا «جىل ادامى» اتاندى. ايدار ورىسباەۆ. دەرەك: ras.kz. سۋرەت: ria.ru.