فوتو: Instagram/drs_kz
سپورتشىلار اۋلەتىندە دۇنيەگە كەلگەن ماريا بروۆكوۆانىڭ اناسى مەن اپكەسى كانوە مەن بايداركادا ەسكەك ەسۋمەن اينالىسقان. (قازىرگى ۋاقىتتا ەكەۋى دە باپكەر).
وليمپياداعا قاتىسۋ ارمانى 2016 جىلعى ريو وليمپياداسىنان كەيىن پايدا بولعان, سول كەزدە ول 11 جاستا ەكەن.
«اناممەن سىرلاسىپ وتىرىپ, مىندەتتى تۇردە وليمپيا ويىندارىنا قاتىساتىنىمدى ايتتىم. ارينە, توكيو وليمپياداسىنا بارا المايتىنىم اۋەلدەن بەلگىلى ەدى. ويتكەنى ول كەزدە ۇلتتىق قۇراماعا كىرگەن جوقپىن. بىراق قالايدا وليمپياداعا باراتىنىمدى ايتتىم. ءسويتىپ العا ۇلكەن ماقسات قويىپ, 8 جىل وتكەندە ارمانىما قول جەتكىزىپ, اناما بەرگەن سوزىمدە تۇردىم», دەيدى سپورتشى.
كانوە مەن بايداركادا ەسكەك ەسۋدەن ۇلتتىق قۇرامانىڭ باس باپكەرى قايسار نۇرماعامبەتوۆتىڭ ايتۋىنشا بولاشاعىنان ءۇمىت كۇتتىرەتىن جاس سپورتشىلاردىڭ ءبىرى ماريا بروۆكوۆا جاستار اراسىنداعى الەم چەمپيوناتىندا ءۇش مارتە توپ جاردى جانە بىرنەشە حالىقارالىق جارىستاردا جۇلدەگەرلەر قاتارىنان كورىندى.
ء«تورت جىلدىقتىڭ باستى دوداسىنا قاتىساتىنىمىزدى, جانكۇيەرلەر بىزگە ۇلكەن ءۇمىت ارتىپ وتىرعانىن جەتە سەزىنىپ, پاريجگە جاقسى دايىندىقپەن بارۋ ءۇشىن تىنباي ەڭبەكتەنىپ جاتىرمىز», دەيدى ماريا.
ەسكەك ەسۋ سپورتىندا توكيو وليمپياداسىنىڭ چەمپيونى امەريكالىق نەۆين حارريسوندى ۇلگى تۇتاتىن ماريا امەريكالىق سپورتشىنىڭ قادامىن 2020 جىلدان بەرى باقىلاپ جۇرگەنىن ايتادى.
«جەڭىسكە دەگەن قۇلشىنىسىمەن, ەرىك-جىگەرىمەن, مىقتىلىعىمەن تاڭعالدىردى. حارريسون ءوزىنىڭ العاشقى وليمپياداسىنا 19 جاسىندا قاتىسىپ, چەمپيون اتانعان-دى. مەن دە بيىل 19-عا تولدىم جانە العاشقى وليمپياداما بارامىن. نەۆيننىڭ ءۇش جىل بۇرىنعى جەتىستىگىن قايتالاپ, پاريجدە وليمپيادا چەمپيونى اتانعىم كەلەدى», دەيدى ماريا بروۆكوۆا.
