اقتوبەدە قار تازالاۋ جۇمىستارى قارقىندى ءجۇرىپ جاتىر

اقتوبە. 17 قاڭتار. اقتوبە وڭىرىندە قىس جىلداعىدان ەرتەرەك ءتۇستى. سوڭعى كەزدەرى  جاپالاقتاپ جاۋعان قار قالا كوشەلەرىن تولتىرىپ ۇلگەردى. وسىعان بايلانىستى «اقتوبە قالالىق تۇرعىن ءۇي-كوممۋنالدىق شارۋاشىلىق, جولاۋشى كولىگى جانە اۆتوموبيل جولدارى» ءبولىمى مەن قار تازارتۋ جۇمىستارىمەن اينالىساتىن مەكەمەلەر جۇمىسقا قىزۋ كىرىسىپ كەتتى. بۇل تۋرالى egemen.kz ءتىلشىسى حابارلادى. بيىل قالا كوشەلەرىن قاردان تازارتۋ جۇمىستارىنا 92 ميلليون تەڭگە قارجى ءبولىنىپ, بۇل باعىتتاعى شارۋالاردى جۇزەگە اسىرۋ ون بەس مەكەمەگە جۇكتەلگەن ەكەن. ولار – «تازالىق», «اقجول», «ەرحات جولدارى», «بوشان ترانساۆتو», «ركدس», «اقتوبەسپەتسستروي», «ەلىم اقتوبە», «دوروجنيك», «اقتوبە – تازا قالا», «كتپ», «اگدس», «العا-جولسيستەمس», «تابىس-اقتوبە», «كوكۆەست» جاۋاپكەرشىلىگى شەكتەۋلى سەرىكتەستىكتەرى مەن «ماتاي» شارۋا قوجالىعى. ال وتكەن جىلى بۇل شارۋالاردى توعىز مەكەمە اتقارعان بولاتىن. قاردىڭ مول تۇسۋىنە بايلانىستى كەيبىر مەكەمەلەر وزدەرىنە قاراستى اۋماقتى تازارتىپ ۇلگەرە الماعاندىقتان بيىل مەكەمە سانى ءوسىپتى. قازىر قالادا تاۋلىك بويى كەزەكشىلىك ۇيىمداستىرىلىپ, ءتيىستى مەكەمەلەر كوشە قارلارىن تازارتىپ جاتىر. قاراشا ايىنان باستاپ وسى كەزگە دەيىن دەيىن 3 مىڭ تونناعا جۋىق قار قالا سىرتىنا شىعارىلعان. ساتىبالدى ءساۋىرباي. دەرەك: egemen.kz. سۋرەت: diapason.kz.