اقتوبەدە سىبايلاس جەمقورلىققا قارسى سەمينار وتكىزىلدى

اقتوبە. 17 قاڭتار. اقتوبەدە سىبايلاس جەمقورلىققا قارسى سەمينار-كەڭەس وتكىزىلدى. بۇل تۋرالى egemen.kz ءتىلشىسى حابارلادى. وبلىس اكىمدىگى مەن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ اقتوبە وبلىسى بويىنشا دەپارتامەنتىنىڭ باستاماسىمەن ۇيىمداستىرىلعان بۇل سەمينار-كەڭەس سىبايلاس جەمقورلىققا قارسى زاڭنامانىڭ وزەكتى ماسەلەلەرىنە ارنالدى. سەمينار كەڭەستىڭ جۇمىسىنا وبلىستىق اتقارۋشى ورگاندار, وبلىس بويىنشا تەكسەرۋ كوميسسياسى, سونداي-اق ورتالىق مەملەكەتتىك ورگانداردىڭ اۋماقتىق بولىمشەلەرىنىڭ باسشىلارى, «نۇر وتان» پارتياسى جانە «اتامەكەن وداعى» ۇەپ وكىلدەرى قاتىستى. سەمينارعا قاتىسۋشىلاردىڭ الدىندا سويلەگەن سوزىندە وبلىس اكىمى اپپاراتىنىڭ باسشىسى كونستانتين پەتروۆ ءىس-شارانىڭ ماقساتى سىبايلاس جەمقورلىققا قارسى زاڭنامانى ءتۇسىندىرۋ بولىپ تابىلاتىنىن اتاپ ءوتتى. ءوز كەزەگىندە مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ اقتوبە وبلىسى بويىنشا دەپارتامەنت باسشىسىنىڭ ورىنباسارى, تارتىپتىك كەڭەس توراعاسى قايىرجان توكۋشەۆ سىبايلاس جەمقورلىققا قارسى كۇرەس ستراتەگياسىنىڭ نەگىزگى ەرەجەلەرىن ءتۇسىندىردى. سونىمەن قاتار, بۇگىندە اگەنتتىك پەن ونىڭ اۋماقتىق بولىمشەلەرى ەلىمىزدە سىبايلاس جەمقورلىق دەڭگەيىن ازايتۋ ءۇشىن, مەملەكەت پەن قوعام ءومىرىنىڭ ءارتۇرلى سالاسىندا ونىڭ سەبەپتەرى مەن جاعدايلارىن جويۋ ءۇشىن جۇرگىزىپ جاتقان كەشەندى شارالارعا توقتالدى. ول وسىنداي سىبايلاس جەمقورلىق كورىنىستەرىن بولدىرماۋ ماقساتىندا بۇگىنگى كۇنى شەنەۋنىكتەردىڭ ازاماتتارمەن تىكەلەي بايلانىستارىن قىسقارتاتىن جانە سىبايلاس جەمقورلىق كورىنىستەرى ءۇشىن جاعدايلاردى بارىنشا ازايتاتىن مەملەكەتتىك كورسەتىلەتىن قىزمەتتەر سالاسىن دامىتۋ مەن مەملەكەتتىك اپپاراتتىڭ جۇمىسىن اقپاراتتاندىرۋ جونىندە كەشەندى شارالار قابىلدانۋدا ەكەنىن جەتكىزدى. سونىمەن قاتار, ءماجىلىس بارىسىندا 2014 جىلدى قورىتىپ, 2015 جىلعا مەملەكەتتىك ورگانداردىڭ جۇمىسىن جاقسارتۋ بويىنشا مىندەتتەر بەلگىلەندى. ساتىبالدى ءساۋىرباي. دەرەك: egemen.kz. سۋرەت: refcon.org.