ماقسات – ساپالى كادر دايارلاۋ

ارينە, تۋريزم – ەكونوميكاداعى ماڭىزدى سالا ەكەندىگى, قوساتىن ۇلەسى مول سەكتور ەكەنى ايتپاسا دا تۇسىنىكتى. ءارى ەلىمىزدىڭ ءتۋريزمدى دامىتۋعا تولىق مۇمكىندىگى بار ەكەنى دە ءسوزسىز. ەكىنشىدەن, ءبىز ءوز تاراپىمىزدان سالاعا قاتىستى كادر دايارلاۋ جاعىن ءسوز ەتەمىز. ويتكەنى ەلىمىزگە كەلۋشىلەرگە قىزمەت كورسەتۋ ساپاسىن ەڭ جوعارعى دەڭگەيگە جەتكىزۋ – ءوز قولىمىزدا.

ەلىمىزدەگى حالىقارالىق تۋريزم جانە مەيماندوستىق ۋنيۆەرسيتەتى – ەلدەگى جالعىز ءارى العاشقى بەيىندى وقۋ ورنى. تۋريزم مەن قوناقجايلىلىق جانە سپورتتىق تۋريزم باعىتىندا مامان دايارلاۋدا 2020 جىلدان بەرى جۇمىس ىستەپ كەلەدى. مىنە, بيىل العاشقى تۇلەكتەرىمىز, ياعني 460 ستۋدەنت سالاعا قاتىستى 11 ماماندىق الىپ شىقپاقشى.

راس, قازىر ەلدەگى تۋريزم سالاسىنداعى كادر تاپشىلىعى انىق بايقالىپ وتىر. سوعان وراي, ءبىز وقۋ ۇدەرىسىنە وزگەرىس ەنگىزدىك. بىرىنشىدەن, ستۋدەنتتەردى جاپپاي دۋالدى وقىتۋ جۇيەسىنە كوشىردىك. بۇل – تەوريانى وندىرىسپەن ۇشتاستىرا وتىرىپ, ءبىلىم الۋ دەگەن ءسوز. دەمەك ۋنيۆەرسيتەت شاكىرتتەرى ءبىرىنشى كۋرستان كەيىن قوسىمشا تۋريستىك كومپانيالاردا بولىپ, وقۋمەن قاتار تاجىريبەسىن شىڭدايدى. ياعني ۋنيۆەرسيتەتتە ءجۇرىپ-اق كەلەشەك ماماندىعىنىڭ بارلىق قىر-سىرىن ۇيرەنەتىن بولادى. بۇل ءادىس ماماندىق الىپ شىعىپ, جۇمىسقا ورنا­لاسقان جاعدايدا ولارعا كوپ قيىندىق تۋدىرمايدى.

قازىرگى تاڭدا ءبىزدىڭ ۋنيۆەرسيتەتپەن بىرلەسە 73 تۋريستىك كاسىپورىن جۇمىس اتقارادى. ولاردىڭ قاتارىندا وتاندىق كومپانيالارمەن قاتار شەتەلدىك تۋريستىك ۇيىمدار دا بار. مىسالى, ءبىزدىڭ 170 ستۋدەنت وسى باعىتتا تاجىريبەدەن ءوتىپ جاتىر. ولاردىڭ جاتىن ورنىن, جولاقىسى جانە اي سايىنعى ەڭبەكاقىسىن سول تۋريستىك كومپانيالار وتەيدى. سونىمەن بىرگە بىزبەن جۇمىس ىستەيتىن شەتەلدىك سەرىكتەستەر, مىسالى تۇركياداعى كەمەر قالاسىنداعى قوناق­ۇي­لەردە 22 ستۋدەنت تاجىريبە الماسىپ جاتىر.

ال بيىلعى 2024-2025 وقۋ جىلىنان باستاپ ءداستۇرلى سەمەستردەن تريمەستر جۇيەسىنە اۋى­سىپ جاتىرمىز. ياعني وسى جىلى تالاپكەرلەر باكالاۆر دەڭگەيىن 4 جىل ەمەس, 3 جىلدا وقىپ, قولىنا ديپلوم الادى. بۇل – ەلىمىزدەگى تۋريستىك سالا بويىنشا كادر تاپشىلىعىن جويۋدى جىلدامداتىپ, ماسەلەنىڭ وڭ باعىتقا اۋىسۋىن تەزدەتەدى. دۇرىسىن ايتقاندا, ءبىز دايارلايتىن ستۋدەنتتەردىڭ وقۋ ۇدەرىسىنىڭ ەلۋ پايىزى تەوريالىق بىلىممەن ۇشتاسسا, قالعان ەلۋ پايىزى تۋريستىك كاسىپورىندا وتەدى.

جالپى, تۋريزمگە ينفراقۇرىلىمنان بولەك, قىزمەت كورسەتۋ دەڭگەيىنىڭ جوعارى بول­عانى وتە ماڭىزدى. ءبىز ءبىلىم بەرۋ ورنى بولعاندىقتان ءدال وسى تۇرعىدان ەل بولا­شاعىن قىزمەت ەتەتىن ساپالى كادر دايار­لاۋدى باستى ماقسات ەتىپ كەلەمىز.

الىبەك شوقپاروۆ,

حالىقارالىق تۋريزم جانە مەيماندوستىق ۋنيۆەرسيتەتىنىڭ باسقارما توراعاسى-رەكتورى