يسا اقبەرباەۆ اقپاندا تيتۋلدى ۇرىس وتكىزەدى

استانا. 17 قاڭتار. IBO Intercontinental نۇسقاسى بويىنشا اۋىر سالماقتا چەمپيون بولىپ تابىلاتىن قازاقستاندىق يسا اقبەرباەۆ اقپان ايىندا گەرمانيادا تيتۋلدى ۇرىس وتكىزەدى. بۇل تۋرالى ۆكونتاكتە جەلىسىندەگى دەرەككە سۇيەنگەن vesti.kz. حابارلادى. «قازاقستاندىق بوكسشى كەلەسى شايقاسىن 28 اقپاندا گامبۋرگتە وتكىزەدى», - دەلىنگەن حابارلامادا. بىراق ءبىزدىڭ بىلعارى قولعاپ شەبەرى قارسىلاسىنىڭ ەسىمى ازىرگە بەلگىسىز. ال جەكپە-جەكتىڭ ءوزى 12 راۋندتان تۇرادى. يسا ءۇشىن بۇل ۇرىس ونىڭ كاسىپقويلار رينگىندەگى 16-شى مارتە شارشى الاڭعا شىعۋى بولعالى تۇر. ونىڭ ءبىر كەزدەسۋىنىڭ ناتيجەسى ەسەپتەن شىعارىلىپ تاستالعان. ال قالعان 14 ۇرىستىڭ ءبارىن جەڭىسپەن اياقتاعان. مۇنىڭ 9-ندا نوكاۋتقا قول جەتكىزگەن. يسا اقبەرباەۆ ءوزىنىڭ سوڭعى جەكپە-جەگىن وتكەن جىلعى 11 جەلتوقساندا ماسكەۋدە وتكىزدى. وندا بەلارۋس وكىلى يگور كاراۆاەۆپەن ۇشىراسىپ, قارسىلاسىن ەكىنشى مينۋتتا-اق ىسكە العىسىز ەتىپ تاستادى. دامير قوجامقۇل. دەرەك, فوتو: vesti.kz.