قازۇۋ الەم ۋنيۆەرسيتەتتەرى كونسورتسيۋمىنا مۇشە بولدى

استانا. 17 قاڭتار. ءال-فارابي اتىنداعى قازاق ۇلتتىق ۋنيۆەرسيتەتى الەم ۋنيۆەرسيتەتتەرى كونسورتسيۋمىنىڭ (WUC) تولىققاندى مۇشەسى اتانىپ, ءوزىنىڭ جوعارى بەدەلى مەن حالىقارالىق تالاپتارعا ساي دارەجەسىن تاعى ءبىر دالەلدەپ شىقتى. بۇل تۋرالى ۋنيۆەرسيتەتتىڭ رەسمي سايتى حابارلادى. الەم ۋنيۆەرسيتەتتەرى كونسورتسيۋمى الەمنىڭ جەتەكشى جوعارعى وقۋ ورىندارى مەن عىلىم جانە  بىلىم بەرۋ سالاسىنداعى حالىقارالىق ۇيىمداردى بىرىكتىرەدى. ونىڭ مىندەتى ادامزاتتىڭ ماڭىزدى ماسەلەلەرىن شەشۋدە ۋنيۆەرسيتەتتەردىڭ ءرولىن ارتتىرۋ, قولجەتىمدى جانە ساپالى ءبىلىمدى جان-جاقتى قولداۋ, ءبىلىم بەرۋ جۇيەلەرىن جەتىلدىرۋ بولىپ تابىلادى. اسىرەسە, ستۋدەنتتەر الەۋەتىن ارتتىرۋعا, ولاردىڭ تەوريادان العان بىلىمدەرىن ءىس جۇزىندە قولدانۋىنا ەرەكشە كوڭىل بولىنەدى. ايتا كەتەرلىگى, ءار مەملەكەتتەن تەك ءبىر عانا ۋنيۆەرسيتەت WUC مۇشەسى بولا الادى. ءال-فارابي اتىنداعى قازۇۋ – وسىنداي جاھاندىق حالىقارالىق ءبىلىم بەرۋ قاۋىمداستىعىنا مۇشە بولۋ مارتەبەسىنە يە بولعان ورتا ازياداعى العاشقى جانە جالعىز ۋنيۆەرسيتەت. ول سوڭعى جىلدارى جوو جەتەكشى رەيتينگتەرىندە قارقىنمەن العا جىلجۋدا, حالىقارالىق ىنتىماقتاستىقتى كەڭەيتە وتىرىپ, الەمدىك دەڭگەيدەگى فورۋمدار مەن كونفەرەنتسيالار وتكىزۋدە. WUC مۇشەسى بولا وتىرىپ, قازۇۋ ەندى الەمنىڭ اتاقتى جوعارعى وقۋ ورىندارىنىڭ عانا ەمەس, بۇكىلالەمدىك ونەر جانە عىلىم اكادەمياسى, حالىقارالىق جاسىل كرەست, حالىقارالىق ۋنيۆەرسيتەت پرەزيدەنتتەرىنىڭ اسسوتسياتسياسى, مادەني ديپلوماتيا ينستيتۋتى, الەكساندريا كىتاپحاناسى جانە باسقا دا بەدەلدى ۇيىمداردىڭ ارىپتەسى بولىپ تابىلادى. بۇل الەمدە قازاقستاننىڭ جوعارى ءبىلىم بەرۋ جۇيەسىنىڭ ءيميدجى مەن باسەكەگە قابىلەتتىلىگىن كوتەرۋگە ءسوزسىز ىقپال ەتەدى. ايدار ورىسباەۆ. دەرەك: kaznu.kz. سۋرەت: gazeta.kz.