ماسكەۋدە ۇرىلار 3,3 ملن. دوللاردى قوقىسپەن اۋىستىرىپ كەتتى

استانا. 25 ءساۋىر. ماسكەۋدىڭ دومودەدوۆو اۋەجايىندا ۇرىلار 3,3 ميلليون دوللاردى قۇرىلىس قوقىسىمەن اۋىستىرىپ كەتكەن. رەسەي پوليتسەيلەرى اۋە جۇگىنەن ۇرلانعان اقشاعا قاتىستى قىلمىستىق ءىستىڭ اق-قاراسىن انىقتادى. بۇل تۋرالى today.kz حابارلادى. ماسكەۋگە نوۆوسىبىردەن كەلگەن قىمبات جۇكتى قابىلداۋ كەزىندە ەكى قاپقا سالىنعان اقشانىڭ ورنىندا قۇرىلىس قوقىسى بولعان. رەسەي ىشكى ىستەر مينيسترلىگىنىڭ ماسكەۋ قالاسى بويىنشا ءباسپاسوز قىزمەتى تاراتقان مالىمەتكە سۇيەنسەك, ءنوۆوسىبىر-دومودەدوۆو باعىتىمەن ماسكەۋ قالاسىنا كەلگەن جۇكتىڭ سالماعى مەن پلومباسىندا سايكەسسىزدىكتەر انىقتالعان. ناتيجەسىندە, ەكى قاپتاعى 3,3 ميلليون دوللاردىڭ ورنىنا قۇرىلىس قوقىسى شىققان. رەسەي ۆاليۋتاسىمەن ەسەپتەۋ كەزىندە شىعىن كولەمى 180 ميلليون ءرۋبلدى قۇراعان. كەيىننەن بۇل قىلمىسقا قۇندى زاتتاردى تاسىمالداۋمەن اينالىساتىن كومپانيانىڭ ءۇش قىزمەتكەرى كۇدىكتى دەپ تانىلعان. بۇرىن دومودەدوۆودا جۇك تاسمىلداۋشى بولىپ جۇمىس ىستەگەن ۇشەۋى 2014 جىلى جۇمىستارىنان شىعارىلعان ەكەن. جۇكتەردى ءتۇسىرۋ تەحنولوگياسىن جاقسى مەڭگەرگەن ولار ۇرلىقتى اۋەجايدا جاساعان. اقشانىڭ جوعالعانى بەلگىلى بولعاننان كەيىن پوليتسەيلەر اۋەجايدىڭ قاۋىپسىزدىك قىزمەتىمەن بىرگە بۇل قىلمىستى ءبىر تاۋلىكتىڭ ىشىندە اشكەرەلەدى. ۇرلىق جاساعانداردىڭ بارلىعى ءوز كانىلارىن مويىنداپ وتىر. قازىرگى تاڭدا بۇل وقيعا بويىنشا رەسەي فەدەراتسياسى قىلمىستىق كودەكسىنىڭ 158-بابى 4-بولىگى («ۇرلىق») بويىنشا قىلمىستىق ءىس قوزعالدى. بۇل باپ بويىنشا ۇرىلار ەڭ اۋىر جازا – 10 جىلعا دەيىن باس بوستاندىعىنان ايىرىلۋى مۇمكىن. ەلامان قوڭىر. دەرەك: today.kz. سۋرەت: webpark.ru.