شىن جۇرەكتەن شىققان ءسوز

ەلباسى نۇرسۇلتان نازارباەۆتىڭ اتىنا استانا قالاسىنىڭ تۇرعىنى اياتبەك توقىمبەكوۆتەن حات كەلدى, دەپ حابارلادى پرەزيدەنتتىڭ ءباسپاسوز قىزمەتى. قازاق حاندىعىنىڭ 550 جىلدىعىن رەسپۋبليكا دەڭگەيىندە اتاپ ءوتۋ تۋرالى مەملەكەت باسشىسىنىڭ باستاماسىمەن قابىلدانعان شەشىم حالىق اراسىندا زور سەرپىلىس تۋدىرىپ, ۇلكەن ىقىلاس پەن قولداۋعا يە بولۋدا. مىسالى, استانا قالاسىنىڭ تۇرعىنى اياتبەك توقىمبەكوۆ قازاق حاندىعىنىڭ 550 جىلدىعىن اتاپ ءوتۋ ايبىندى حاندارىمىز مەن باتىر-بيلەرىمىزدىڭ الدىنداعى قاسيەتتى پارىزىمىزدى وتەۋ بولىپ سانالاتىنىن جازا كەلىپ, سول ءۇشىن پرەزيدەنتكە راحمەت ايتادى. اۆتور ءوز حاتىندا قازىبەك ءبيدىڭ: «حاننىڭ قايرانى شەكسىز, ەردىڭ قايراتى شەكسىز», دەگەن دانالىق سوزىنە سۇيەنە وتىرىپ, قازاقستان پرەزيدەنتىنىڭ دە قايرانى شەكسىز ەكەندىگىنە كوزى جەتكەنىن ايتادى. سونىڭ ايعاعى رەتىندە ونىڭ ءۇش بىردەي ىلكىمدى ىسىنە نازار اۋدارادى. «ەلباسىمىزدىڭ نۇرلى جولى نارىق زامانىندا قازاق حالقىنىڭ اق جولى, اداستىرمايتىن تۋرا جولى, باعدارشامى بولدى. تاۋەلسىزدىگىمىزدى ساقتاۋعا جەتەلەگەن سارا جولدا نەشەمە اسۋلاردان وتتىك, قيىندىققا تىرەلگەندە اقىل تاۋىپ, ەلىمىزدى الەمدەگى الدىڭعى قاتارلى 50 مەملەكەتتىڭ دەڭگەيىنە كوتەردىڭىز», – دەيدى حات يەسى. ا.توقىمبەكوۆ, سونداي-اق, ەلباسى مەملەكەت باسقارۋ شەبەرلىگىن كورسەتىپ قانا قويماي, حالىقارالىق دارەجەدەگى ۇلتتىق كادرلار شوعىرىن تاربيەلەپ, قالىپتاستىرعانىن دا اتاپ وتكەن. سونىمەن قاتار, ول قازاقستاننىڭ بۇل كۇندە الاتاۋ باۋرايىندا ءبىر استاناسى, سارىارقادا باس ەلورداسى بار ەكەندىگىنە توقتالادى. «وسىنىڭ بارلىعى ەلباسىمىزدىڭ قايرانى مەن ەرلىگىنىڭ, باتىرلىعىنىڭ شەكسىزدىگى ەمەس پە؟!» – دەلىنگەن حاتتا. سوڭىندا اۆتور قازاقستان پرەزيدەنتىنە زور دەنساۋلىق جانە تابىس تىلەگەن.