ودان سوڭ كەنشىلەر قالاسىنا كەلىپ, قالانىڭ ورتالىق ساياباعىندا ءان شىرقالىپ, اكتسيا ەرەكشە سيپاتتا ءوربىدى. ساياباقتا سەرۋەن قۇرىپ جۇرگەن قاراعاندىلىقتار بوس بوتەلكەلەر مەن قالدىق قوقىستارىن ارنايى سىيلىققا الماستىردى.
جالىندى جاستار شەجىرەلى شەت اۋدانىنا دا تابان تىرەپ, بىرقاتار ەكولوگيالىق ءىس-شاراعا قاتىسىپ, رەسپۋبليكالىق ماڭىزى بار تاسجولدى قوقىستان تازارتتى.
كۇنى كەشە بالقاش قالاسىنا باردى. مارشرۋتتىڭ جالپى ۇزىندىعى 1200 شاقىرىمنان اسادى. ونىڭ ءبىراز بولىگى قاراعاندى وبلىسىندا.
– قاراعاندىدان باستاپ, شەت اۋدانى مەن بالقاشقا دەيىن ءبىزدىڭ 250-دەن استام ەرىكتى ەستافەتاعا قاتىسىپ ءجۇر. ەستافەتانىڭ ەڭ ۇزىن شاقىرىمى, ياعني 700 شاقىرىمى قاراعاندى وبلىسىنا تيەسىلى. ءبىز ارمەن قاراي ەستافەتا جالاۋىن جامبىل وبلىسىنا تاپسىرامىز, – دەيدى «Amanat» پارتياسىنىڭ قاراعاندى وبلىستىق فيليالىنىڭ توراعاسى بەكزات التىنبەكوۆ.
جولعا شىققان ەرىكتىلەر تەك جول بويىن عانا ەمەس, اۆتوتۇراقتار مەن كەمپينگتەردى دە قوقىس قالدىقتارىنان تازارتادى. ەرىكتىلەر كۆادروكوپتەرلەردى پايدالانا وتىرىپ, اەروبارلاۋ ارقىلى قاي جەردە قوقىستىڭ كوبىن اڭعارىپ الادى. جينالعان قالدىقتار قوقىس پوليگوندارىنا تاسىلىپ, قاجەت دەگەن بولىكتەرىن قايتا وڭدەۋگە جونەلتەدى.
وسى اپتا ىشىندە جاس بەلسەندىلەر مەن «جاستار رۋحى» جاستار قاناتىنىڭ ەرىكتىلەرى «استانا – الماتى» تاسجولى بويىنىڭ اۋماعىن تازارتادى.
«تازا قازاقستان» ەكولوگيالىق اكتسياسىنا باعىتتالعان بۇل ەستافەتا الماتىعا دەيىن جالعاسادى.
مۇنىڭ ارقاسىندا كۇرەجولدىڭ جيەكتەرى مەن اۆتوتۇراقتار, ايالدامالار تازارادى. جول تازالىعىنا جاناشىرلىق تانىتقان سان جۇزدەگەن جاس ەرىكتىلەر رەسپۋبليكالىق اكتسياعا وسىلاي ۇلەس قوسىپ ءجۇر.
قاراعاندى وبلىسى
