تۇركيا شاناققالا شايقاسىنىڭ 100 جىلدىعىن اتاپ ءوتتى

استانا. 25 ءساۋىر. تۇركيادا ءى دۇنيەجۇزىلىك سوعىستاعى ەڭ قانقۇيلى ۇرىس – شاناققالا شايقاسىنىڭ 100 جىلدىعى اتاپ ءوتىلدى. اۋقىمدى شاراعا بىرقاتار مەملەكەت پەن ۇكىمەت, سونداي-اق, سول كەزدەگى سوعىسقا اسكەرلەرى قاتىسقان ەلدەردىڭ باسشىلارى قاتىستى. بۇل تۋرالى ەuronews.com حابارلادى. ون ايعا سوزىلعان قاندى قىرعىندا 200 مىڭنان استام ادام اجال قۇشتى. ونىڭ 100 مىڭعا جۋىعى بريتانيا يمپەرياسىنىڭ قۇزىرىندا ەدى. ەسكە الۋ شاراسىنا ارنايى كەلگەن ۇلىبريتانيا حانزاداسى چارلز ۋەلسكي: «بۇل جاۋىنگەرلەر بريتان الەمىنىڭ ءار جەرىنەن كەلدى. افريكا, اۆستراليا, كانادا مەن ءۇندىستان, ءتىپتى, ۇلىبريتانيا مەن جاڭا زەلانديادان, الىس ارالداردان كەلگەندەر دە بار. تۋعان جەرلەرىمەن قوشتاسقان ولار ءبىزدىڭ ورتاق ءىسىمىز ءۇشىن جاندارىن قيۋعا دايىن بولدى», – دەدى. ءبىر عاسىر بۇرىن بولعان جويقىن سوعىستا تۇركيا جەڭىسكە جەتكەنى تاريحتان بەلگىلى. وسىنىڭ ارقاسىندا بۇل ەل وداقتاستاردىڭ دارداننەل بۇعازىن باقىلاۋعا الۋ, ىستامبۇلعا باسىپ كىرىپ, رەسەيگە تەڭىز جولىن اشپاق بولعان جوسپارىن ىسكە اسىرمادى. شارادا ءسوز العان تۇركيا پرەزيدەنتى رەدجەپ تايىپ ەردوعان: «مەن شاناققالا شايقاسى بارلىق ۇلتقا ورتاق اۋىرتپالىقتى دوستىققا, بەيبىتشىلىك پەن ماحابباتقا اينالدىرۋدىڭ ۇلگىسى بولعانىن قالايمىن. سەبەبى, بۇل سوزدەر سوعىستىڭ گەنەراتورى ەمەس. ءبىز بۇل عاسىردىڭ بەيبىتشىلىك عاسىرى بولۋى ءۇشىن ىنتىماقتاستىققا دايىنبىز», – دەدى. ايتا كەتەيىك, وسىعان دەيىن سايتىمىزعا شاناققالا شايقاسى تۋرالى كولەمدى ماقالا جاريالاندى. بۇل تۋرالى مىنا جەردەن وقي الاسىزدار. ەلامان قوڭىر. دەرەك سۋرەت: euronews.com.