جامبى اتۋ: ۇلتتىق قۇراما الەم چەمپيوناتىندا «التىن» ەنشىلەدى

قازاقستاننىڭ نامىسىن ۇلتتىق قۇرامانىڭ 4 مۇشەسى: ابزال ت ۇلىبەكوۆ, ايتبەك سارىباي, نۇرسۇلتان بىرلىكباەۆ جانە باتىر بەكساۋىت قورعادى. 4 كۇنگە سوزىلعان ءدۇبىرلى دودا «ماجار», «ازيا», «يمپەراتور», «ساران» ستيلدەرى بويىنشا وتكەنىن ايتا كەتۋ كەرەك.

جارىستىڭ العاشقى كۇنى سپورتشىلار «ماجار» ءستيلى بويىنشا سىنعا ءتۇسىپ, بۇل سايىستا «التىن تۇعىر-2023» يەگەرى باتىر بەكساۋىت ۇزدىك ۇشتىككە ءىلىندى. ال التىن جانە كۇمىس جۇلدەنى موڭعوليا ەلىنىڭ مەرگەندەرى يەلەندى.

جارىستىڭ ەكىنشى كۇنى مەرگەندەر «ازيا» نىساناسىن كوزدەدى.

ءۇشىنشى كۇنى ءبىزدىڭ سپورتشىلارىمىز بۇرىن-سوڭدى اتىپ كورمەگەن «يمپەراتور» ءستيلى بويىنشا جارىس بولدى. قازاقستان سپورتشىسى ايتبەك سارىباي وسى ءستيلدىڭ كۇمىس جۇلدەسىن جەڭىپ الدى.

جارىستىڭ سوڭعى كۇنى «ساران» ستيلىنە ارنالدى. وسىعان دەيىن بۇل نىسانانى دا كوزدەپ كورمەگەن مەرگەندەرىمىز تاعى دا بيىككە ورلەدى. باتىر بەكساۋىت موڭعول سپورتشىلارىنىڭ الدىن وراپ, التىن مەدال يەلەندى. وسىلايشا, قازاقستان قۇراماسى 1 التىن, 1 كۇمىس, 1 قولا مەدالمەن الەم چەمپيوناتىن قورىتىندىلادى.

جەڭىمپازدار مەن جۇلدەگەرلەردى قىتاي جامبى اتۋ فەدەراتسياسىنىڭ وكىلدەرى قۇتتىقتاپ, باعالى سىيلىقتار تابىستادى.