الىستاعى ەلمەن دە ارالاسامىز

كەشە قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆ ۆەنەسۋەلا بوليۆاريان رەسپۋبليكاسىنىڭ حالىقارالىق قاتىناستار جونىندەگى ءمينيسترى دەلسي رودريگەسپەن ونىڭ استاناعا رەسمي ساپارى شەڭبەرىندە كەلىسسوز جۇرگىزدى. بۇل ۆەنەسۋەلا سىرتقى ساياسات ۆەدومستۆوسى باسشىسىنىڭ قازاقستانعا جاساعان العاشقى ساپارى ەكەنىن ايتا كەتۋ كەرەك. كەزدەسۋ بارىسىندا تاراپتار ەكونوميكا, ساۋدا, ينۆەستيتسيا, ەنەرگەتيكا جانە حالىقارالىق ۇيىمدار شەڭبەرىندە ءوزارا ىقپالداستىق ماسەلەلەرىن تالقىعا سالدى. ە.ىدىرىسوۆ ءوز سوزىندە ەكى ەل اراسىنداعى ىنتىماقتاستىقتىڭ ارتىپ كەلە جاتقاندىعىنا نازار اۋدارتا كەلىپ, جاڭا ارىپتەستەر رەتىندە قاتىناستاردى تەرەڭدەتۋ جوسپارىنا ەكپىن بەردى. بۇل تۇرعىدان كەلگەندە, قازاقستان مەن ۆەنەسۋەلا سىرتقى ساياسات ۆەدومستۆولارى باسشىلارىنىڭ ساياسي كونسۋلتاتسيالىق تەتىگىن ورناتۋ جونىندەگى ءوزارا تۇسىنىستىك تۋرالى مەموراندۋمعا قول قويۋى ماڭىزدى. سونداي-اق, ەكى ەل كوپجاقتى پىشىمدە دە ءوزارا ىقپالداسىپ كەلەدى. اتاپ ايتقاندا, ۆەنەسۋەلا – ەلىمىزدىڭ 2017-2018 جىلدارعا بۇۇ قاۋىپسىزدىك كەڭەسىنە تۇراقتى ەمەس مۇشەلىگىنە كانديداتۋراسىن جانە استانادا ەكسپو-2017 حالىقارالىق كورمەسىن وتكىزۋ باستامالارىن قولداعان ەل. قازاقستان دا ۆەنەسۋەلانىڭ بۇۇ قاۋىپسىزدىك كەڭەسىنە تۇراقتى ەمەس مۇشەلىگىن قولداعاندىقتان, ەلىمىز سىرتقى ساياسات ۆەدومستۆوسىنىڭ باسشىسى ءوز ارىپتەسىن ۇستىمىزدەگى جىلدىڭ قاڭتارىنان باستاپ مارتەبەلى مەيماندى مۇشەلىككە قابىلدانعاندىقتارىمەن دە قۇتتىقتادى. ەلىمىز سىرتقى ساياسات ۆەدو­م­ستۆو­سىنىڭ باسشىسى ءسوز رەتى كەل­گەندە قازاقستان مەن ۆەنەسۋەلا ينتەگراتسيالىق قادامداردىڭ قولداۋشىسى ەكەنىن دە ورتاعا سالا كەتتى. ونىڭ ايتۋىنشا, ۆەنەسۋەلا لاتىن امەريكاسى قۇرلى­عىن­دا ينتەگراتسيالىق الاڭدار­دىڭ بەل­سەندى قاتىسۋشىسى بولسا, قازاقستان باسشىسى ەۋرا­زيا كەڭىستىگىندەگى ينتەگراتور بولىپ تابىلادى. ولاي بولسا, مۇن­داي يگى قادامدار ەلدەر ارا­سىنداعى ەكونوميكالىق جانە ينۆەس­تيتسيا­لىق بايلانىستاردى ارتتى­رۋدىڭ فاكتورى دا. وسى تۇرعىدان كەل­گەندە, جاڭادان ىسكە كىرىسكەن ەۋرا­زيالىق ەكونوميكالىق وداق وعان قوسىمشا مۇمكىندىكتەر بەرەدى. ونىڭ ۇستىنە, قازاقستان مەن ۆەنەسۋەلا مۇناي-گاز ءوندىرۋشى ەلدەر بولعاندىقتان, وسى سالادا دا ىنتىماقتاستىق اسا ماڭىزدى. ءتىپتى, قازاقستانعا وسى ەلدىڭ مۇناي-گاز سالاسىنىڭ ءمينيسترى ەرە كەلگەنى دە بەلگىلى بولدى. جالپى, بۇل ساپار ءوزارا ىقپالداستىققا باستايتىن مۇمكىندىكتەر تۋعىزۋى ءتيىس. قازاقستاندىق ارىپتەسىنىڭ ءسوزىن قۋاتتاعان دەلسي رودريگەس بۇل ساپاردىڭ ەلدەر اراسىنداعى ىنتىماقتاستىققا وڭ سەرپىن بەرەرىنە سەنىم ءبىلدىردى. ارتىنان قازاقستان مەن ۆەنەسۋەلا سىرتقى ساياسات ۆەدومستۆولارىنىڭ ساياسي كونسۋلتاتسيالىق تەتىگىن ورناتۋ جونىندەگى ءوزارا تۇسىنىستىك تۋرالى مەموراندۋمعا قول قويۋ ءراسىمى بولىپ ءوتتى. اسقار تۇراپباي ۇلى, «ەگەمەن قازاقستان».