فوتو: cfr.org
ءسامميتتىڭ باستى تاقىرىپتارىنىڭ ءبىرى افريكا جانە كوشى-قون تاقىرىبى بولماق. يتاليا توراعالىعىنىڭ باسىمدىقتارى – ۋكرايناعا قولداۋ كورسەتۋ, ەنەرگەتيكالىق جانە ەكونوميكالىق قاۋىپسىزدىك, ميگراتسيا مەن افريكا, گازاداعى قاقتىعىستى شەشۋ ماسەلەلەرى بولماق.
كەزدەسۋگە G7 ەلدەرىنىڭ باسشىلارى: يتاليا پرەمەر-ءمينيسترى دجوردجيا مەلوني, اقش پرەزيدەنتى دجو بايدەن, ۇلىبريتانيا پرەمەر-ءمينيسترى ريشي سۋناك, فرانتسيا پرەزيدەنتى ەممانۋەل ماكرون, گەرمانيا كانتسلەرى ولاف شولتس, كانادا پرەمەر-ءمينيسترى دجاستين تريۋدو جانە جاپونيا پرەمەر-ءمينيسترى فۋميو كيسيدا قاتىسادى.
سامميتكە ەۋروپالىق وداقتىڭ وكىلدەرى ەۋروپالىق كوميسسيا توراعاسى ۋرسۋلا فون دەر لەيەن جانە ەۋروپالىق كەڭەس توراعاسى شارل ميشەل دە قاتىسادى.
«سامميت «ۇلكەن جەتىلىكتىڭ» كوشباسشىلارى ءۇشىن زاڭ ۇستەمدىگىنە نەگىزدەلگەن حالىقارالىق ءتارتىپتى قولداۋعا جانە دامۋشى ەلدەرمەن قارىم-قاتىناستى نىعايتۋعا بەرىك ۇستانىمدارىن كورسەتۋگە مۇمكىندىك بەرەدى», دەلىنگەن ەۋروپالىق كەڭەستىڭ ۆەب-سايتىنداعى مالىمدەمەسىندە.
سونىمەن قاتار سامميتكە ءۇندىستان, ساۋد ارابياسى, يوردانيا, وڭتۇستىك افريكا, برازيليا, ارگەنتينا, تۇركيا, الجير, كەنيا جانە ماۆريتانيانىڭ جوعارى لاۋازىمدى وكىلدەرى قاتىسادى دەپ جوسپارلانعان. ريم پاپاسى فرانتسيسك تە شاقىرىلدى.
ەرلان كيىكباي,
ەۇۋ ستۋدەنتى
