مامانداردىڭ اي-تۋىنشا, بيىل اپۆ-عا قارسى ۆاكتسيناتسيا قايتا باستالادى. جالپى, ادام پاپيللوماسى ۆيرۋسى (اپۆ) – الەمدە وتە كەڭ تارالعان, شىرىشتى قاباتتار مەن تەرىگە اسەر ەتەتىن ۆيرۋستار توبىنىڭ جالپى اتاۋى. وسى ۆيرۋستىڭ 200-گە جۋىق ءتۇرى بەلگىلى, ولار كەمىندە 13-ءى قاتەرلى ىسىكتىڭ دامۋىنا اكەلەدى. اپۆ-عا ءجيى اسەر ەتەتىن اناتوميالىق ايماق جاتىر موينى بولعاندىقتان, وسى اعزانىڭ ونكولوگيالىق اۋرۋلارى ايەلدەردىڭ ءومىرى مەن دەنساۋلىعىنا قاۋىپ توندىرەدى. بۇگىندە اۋرۋدىڭ الدىن الۋدىڭ جالعىز جولى – ۆاكتسيناتسيالاۋ.
قازاقستانداعى ددسۇ وكىلدىگىنىڭ يممۋنيزاتسيالاۋ باعدارلاماسىنىڭ ۇيلەستىرۋشىسى قانات سۋحانبەرديەۆتىڭ ايتۋىنشا, حالىق ۆاكتسينا جاساۋدىڭ قانشالىقتى ماڭىزدى ەكەنىن ءتۇسىنىپ, اۋىرمايتىن جول ىزدەۋگە بەلسەنە قولداۋ بىلدىرگەنى ءجون.
«ادام پاپيللوماسى ۆيرۋسىنا قارسى ۆاكتسينالاۋ 2006 جىلدان بەرى 135 مەملەكەتتە جۇزەگە استى, 100 ميلليوننان استام ادام بۇل ۆاكتسينانى سالدىردى. ۆاكتسينا سالدىرعان شۆەتسيا, اۋستراليا, اقش سەكىلدى تاجىريبەلى مەملەكەتتەر دە بار. مىسالى, اۋستراليادا 20-25 جاس ارالىعىنداعى ەكپە سالدىرعان قىزداردا مۇنداي اۋرۋ ءتۇرى مۇلدەم انىقتالماعان. ءبىزدىڭ ەلدە دە اۋرۋدىڭ الدىن الۋ ءۇشىن ۆاكتسينا سالۋ وتە ماڭىزدى. قازاقستاندا ۆاكتسينالاۋ شاراسى قىركۇيەك ايىنىڭ باسىندا باستالىپ, 2 رەت ەگىلەدى. ءبىرىنشى ەكپە ەگۋ ساتىسى قىركۇيەك ايىندا بولسا, ەكىنشىسى 6 ايدان كەيىن عانا جاسالادى. ايتا كەتۋ كەرەك, كورشى وزبەكستان, تۇرىكمەنستان, قىرعىزستان مەملەكەتتەرىندە اپۆ-عا قارسى ۆاكتسينانىڭ ەگىلىپ جاتقانىنا 2 جىلدان استام ۋاقىت ءوتتى», دەيدى ق.سۋحانبەرديەۆ.
كوروناۆيرۋس پاندەمياسى كەزىندە ۆاكتسيناعا كۇمانمەن قاراعاندار بولعانى راس. دەگەنمەن اتالعان دەرتكە قوعامدىق يممۋنيتەت قالىپتاستىرىپ, اۋرۋدى جەڭەتىن بىردەن-ءبىر جول ۆاكتسينا سالدىرۋ ەكەنىن جۇرتتىڭ دەنى ءتۇسىندى. ياعني قوعامدا ۆاكتسيناعا دەگەن تۇسىنىك وزگەردى. فورۋمدا دەنساۋلىق ساقتاۋ ءمينيسترى اقمارال ءالنازاروۆا ادام پاپيللوماسى ۆيرۋسىنان بولعان قايعىلى جاعدايلار تۋرالى ستاتيستيكانى كەلتىرە وتىرىپ, اۋرۋدىڭ الدىن الۋعا جاۋاپكەرشىلىكپەن قاراۋ كەرەك ەكەنىن ەسكە سالدى.
«ەلىمىزدە جاتىر موينى وبىرى – بارلىق جاستاعى ايەلدەر اراسىندا ءسۇت بەزى وبىرىنان كەيىنگى ءولىمنىڭ ەكىنشى سەبەبى. جىل سايىن ەلىمىزدە جاتىر موينى وبىرىنىڭ 1 900-گە جۋىق جاڭا جاعدايى تىركەلىپ وتىر. وكىنىشكە قاراي, جىلدا 600-دەن اسا ايەل وسى پاتالوگيادان قايتىس بولادى. سول ءۇشىن ۆاكتسيناتسيا تۋرالى جۇمىستى دۇرىس ۇيلەستىرۋ, حالىققا جەتكىزۋ ماسەلەسى بارشامىزعا بايلانىستى», دەدى دەنساۋلىق ساقتاۋ ءمينيسترى.
فورۋمعا قاتىسۋشى شەتەلدىك قوناقتار مەن ماماندار, قوعام بەلسەندىلەرى پىكىر ءبىلدىرىپ, اپۆ-عا قارسى سالىناتىن ۆاكتسينانى قولداۋ ءۇشىن قانداي جۇمىس جۇرگىزەتىندەرىن ورتاعا سالدى. سونىمەن قاتار باسقوسۋدا سالا ماماندارى ۆاكتسينالاۋعا قانشا قاراجات بولىنگەنىن دە اتاپ ءوتتى.
«بىزدە ازىرگە تەك ەكى جانە ءتورت ۆالەنتتى ۆاكتسينا سالۋ ويلاستىرىلىپ وتىر, ەگەر ەكى جانە ءتورت ۆالەنتتى ۆاكتسينا ويداعىداي وتسە, باسقا مەملەكەتتەگىدەي ءبىزدىڭ دە ەلدە توعىز ۆالەنتتى ۆاكتسينا سالىنادى. ەلىمىز بۇل ۆاكتسيناعا 9,6 ملرد تەڭگە قاراجات ءبولدى. ارنايى پرەپاراتتاردى ساتىپ الۋ بۇگىندە باستالىپ, ەندىگى كەزەكتە حالىققا تۇسىندىرمە جۇمىستارىن جۇرگىزىپ, ۆاكتسينانىڭ ماڭىزدىلىعىن جەتكىزۋىمىز كەرەك», دەدى قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ ديرەكتورى ديليارا قايداروۆا.
ءجانيا ءابىل,
ل.ن.گۋميلەۆ اتىنداعى ەۇۋ ستۋدەنتى
