ۇيىمداستىرۋشىلاردىڭ ايتۋىنشا, قالا بويىنشا قاتىسقان 500-گە جۋىق ۇمىتكەردەن 15 جۇلدەگەر ىرىكتەلگەن. بايقاۋدا جاس شەكتەۋى جوق. ونەرگە تالاسى بار كەز كەلگەن ازاماتقا ەسىك اشىق ەكەن. ايتكەنمەن جاسى بار, جاسامىسى بار قاتار جارىسقان ءسوز سايىسىندا مەكتەپ وقۋشىلار قارا ءۇزىپ توپ جاردى.
جوبانى ۇيىمداستىرۋشى اقىن, قازاقستان جازۋشىلار وداعىنىڭ مۇشەسى ءارى ا.پۋشكين اتىنداعى قالالىق امبەباپ كىتاپحاناسىنىڭ قىزمەتكەرى سۇندەت سەيىتوۆتىڭ ايتۋىنشا, بيىلعى بايقاۋدىڭ ءباسى بيىك بولدى.
«اتاۋلى جارىستىڭ تالابى دا ەرەكشە بولدى. كوركەمسوز وقۋ جارىسى دەگەنىڭىز بولماسا, ناعىز عىلىمي تالداۋ وسى جەردە جاسالدى. ءار قاتىسۋشىنىڭ لەكسيكالىق, فونەتيكالىق مۇمكىندىگىن انىقتاۋ ماڭىزدى بولدى. انا تىلىمىزدەگى ء«ا», «ۇ», ء«ۇ», «ڭ» سياقتى ءتول دىبىستارىن ايتا المايتىن ۇمىتكەرلەردىڭ بارى بايقالدى. ارينە, بۇل ولاردىڭ كەمشىلىگى ەمەس, جاعداي سولاي... جارىسقا ءتۇسىپ, كەم-كەتىگىن جوندەۋ ۇمىتكەر ءۇشىن وتە ماڭىزدى. بۇل جولى باعى مەن بابى شاپپاسا, كەلەسىدە جولى بولار», دەيدى ول.
بايگەگە وزگە ۇلت وكىلدەرى دە قاتىستى. ولاردىڭ قازاق تىلىندە مۇدىرمەي ەركىن سويلەۋى بايقاۋدىڭ كورىگىن قىزدىردى. ايتالىق, 6 ماۋسىم – اتاقتى الەكساندر سەرگەەۆيچ پۋشكيننىڭ تۋعان كۇنى. مادەني ءىس-شارا نەگىزىنەن الەمدىك اقىننىڭ تۋعانىنا 225 جىل تولۋىنا وراي ۇيىمداستىرىلدى. ال ا.پۋشكين اتىنداعى قالالىق امبەباپ كىتاپحاناسى 1899 جىلى ۇلى اقىننىڭ 100 جىلدىق مەرەيتويى قارساڭىندا اشىلعان. بيىل قاراشاڭىراقتىڭ 125 جىلدىق مەرەيتويى.
«يگى باستامانى جۇزەگە اسىرۋ ءۇشىن نيەتتەن باسقا ماتەريالدىق جاعداي دا قاجەت. ال مۇنداي جوبالارعا دەمەۋشى تابۋ قيىننىڭ قيىنى. وسىناۋ قيىندىقتان شىعۋعا ۇلەس قوسقان شىمكەنت قالاسىنىڭ اتىمتاي جومارت ازاماتتارى بار. ءسىز بەن بىزگە بەلگىلى «Otau Group» كومپانياسىنىڭ پرەزيدەنتى, بيزنەسمەن قايرات مولداسەيىتوۆ العاشقىلاردىڭ ءبىرى بولىپ اتاۋلى جوباعا قولداۋ كورسەتتى. وتاندىق ءوندىرىستى دامىتۋعا ۇلكەن ۇلەس قوسىپ جۇرگەن «Bal Tekstil» فابريكاسىنىڭ باسشىسى, شىمكەنت قالاسى ءماسليحاتىنىڭ دەپۋتاتى تالعات ىسقاقوۆ پەن بەلگىلى قوعام قايراتكەرى اناربەك ورمانوۆ تا ازاماتتىق جاسادى. «Shymkent Plaza» ويىن-ساۋىق ورتالىعى, ج.شانين اتىنداعى تەاتر, قۋىرشاق تەاترى, ءازىل-سىقاق جانە ساتيرا تەاترى, «شىمكەنت-تسيرك» ۇجىمىنا العىسىمىزدى بىلدىرەمىز», دەيدى كىتاپحانا ديرەكتورى ناتاليا سەرگەەۆنا.
ەندى بايقاۋ قورىتىندىسىنا توقتالساق: باس جۇلدەنى قازاق تىلىندە ءا.قاستەەۆ اتىنداعى ونەر جانە ديزاين كوللەدجىنىڭ ستۋدەنتتەرى ءا.ابدىقادىر ۇلى, م.مەدەتحان, ءو.مومىن جانە ورىس تىلىندە ا.ماكارەنكو اتىنداعى №41 مەكتەپ-ليتسەيدىڭ 1-سىنىپ وقۋشىسى ا.رومانقۇل يەلەنسە, جۇلدەلى I ورىندى يندۋستريالدى-تەحنيكالىق كوللەدجىنىڭ 2-كۋرس ستۋدەنتى ءا.ءابىلدا, ا.پۋشكين اتىنداعى مەكتەپ وقۋشىسى ا.پاك, ءو.جانىبەكوۆ اتىنداعى وقپۋ-دىڭ 2-كۋرس ستۋدەنتى ا.كيم يەلەندى. ال جۇلدەلى II ورىندى №65 مەكتەپ-گيمنازيانىڭ 3-سىنىپ وقۋشىسى ا.مالىك, ت.تاجىباەۆ اتىنداعى №47 مەكتەپ-گيمنازيانىڭ 4-سىنىپ وقۋشىسى ا.بەرىك, م.وتەباەۆ اتىنداعى جوعارعى جاڭا تەحنولوگيالار كوللەدجىنىڭ 1-كۋرس ستۋدەنتى ي.وتەشوۆ, تيتوۆ اتىنداعى №20 مەكتەپ-ليتسەيدىڭ 5-سىنىپ وقۋشىسى م.ۆولكوۆ يەلەندى. جۇلدەلى III ورىنمەن جول-كولىك كوللەدجىنىڭ 2-كۋرس ستۋدەنتى د.بازارالى ۇلى, ساز كوللەدجىنىڭ 2-كۋرس ستۋدەنتى م.بايمىرزا, ءو.جانىبەكوۆ اتىنداعى وقپۋ-دىڭ 1-كۋرس ستۋدەنتى ءو.تۇران, ساز كوللەدجىنىڭ 1-كۋرس ستۋدەنتى ق.جاباەۆ, د.مەندەلەەۆ اتىنداعى №15 مەكتەپ-ليتسەيدىڭ 9-سىنىپ وقۋشىسى ا.مۇسىراليەۆا, م.مامەتوۆا اتىنداعى №35 مەكتەپتىڭ 4-سىنىپ وقۋشىسى ا.قۇتتىباي ماراپاتتالدى.
بايقاۋدىڭ بارلىق جەڭىمپازدارىنا ءارتۇرلى دەڭگەيدەگى ديپلومدار, اتالىمدار جانە سىيلىقتار تابىستالدى. سونىمەن قاتار بايقاۋ ۇمىتكەرلەرىن دايىنداپ, ءبىلىمىن شىڭداعان مۇعالىمدەر مەن جەتەكشىلەر دە العىسحاتتارمەن ماراپاتتالدى.
شىمكەنت
