فوتو: رەسپۋبليكالىق بايگە فەدەراتسياسى
جارىس بايگەنىڭ 3 ءتۇرى بويىنشا ءوتتى: قۇنان بايگە, توپ بايگە جانە الامان بايگە. ال جالپى جۇلدە قورى – 20 900 000 تەڭگە.
«ەلىمىزدە ات سپورتى تۇرلەرى, ونىڭ ىشىندە بايگە كۇن ساناپ دامىپ كەلەدى. بۇعان ءبىز ارينە, قۋانىشتىمىز. جاقىندا قوستاناي جىلقىسى تۋرالى زاڭ قابىلدانعانىن ەستىگەن بولارسىزدار. قوستاناي جىلقىسىن قازاقتىڭ اسىل تۇقىمدى جىلقىسى رەتىندە جەكە ءبولىپ قاراستىرىپ وتىر», دەدى رەسپۋبليكالىق بايگە فەدەراتسيانىڭ پرەزيدەنتى قانات كوپباەۆ.
قۇنان بايگەدە ءى ورىندى: جۇزگەن اتتى جىلقى الدى, شاباندوزى – اڭسار ارىستانبەك. II ورىندى اقجول دەگەن تۇلپار يەلەندى, شاباندوزى – نۇرحات ەربولات ۇلى. جۇلدەگەرلەردىڭ ۇشتىگىن قاسقالداق تۇيىندەدى, شاباندوزى – اسلانبەك ابدىقال.
توپ بايگەدە يسلام جارتىباي تىزگىندەگەن ناربۋدان تۇلپار توپ جاردى. II ورىندى اقتاناۋ اتتى جىلقى الدى, جوكەيى – ايتباي ولجاس. ءۇشىنشى ورىندى بەرەكە دەگەن جىلقى جەڭىپ الدى, شاباندوزى – سانجار يرينات.
الامان بايگەدەن ءبىرىنشى بولىپ دانتيست اتتى ايعىر كەلدى. ونىڭ شاباندوزى – سايان اقىلبەك ۇلى. ەرتوس يسلامنۇر تاقىمداعان اتتيلا اتتى جىلقى II ورىندى يەلەندى. ءۇشىنشى ورىندى – سەمسەر دەگەن تۇلپار يەلەندى, شاباندوزى – ديلنۇر نۇرمۇقاش.
كورەرمەن ءۇشىن جالپى جۇلدە قورى 3 000 000 تەڭگەنى قۇرايتىن جۇلدەلەر ۇتىس ويىنى ءوتتى.
ايتا كەتەيىك, رەسپۋبليكالىق بايگە فەدەراتسياسى قازاقستان رەسپۋبليكاسى ۇلتتىق سپورت قاۋىمداستىعىنىڭ قۇرامىنا كىرەدى. قاۋىمداستىق قۇرامىندا بۇدان وزگە كوكپار, تەڭگە ءىلۋ, اۋدارىسپاق, جامبى اتۋ, ساداق اتۋ, قۇسبەگىلىك, اسىق اتۋ, «JORYQ» ات سپورتى جانە ت.ب. فەدەراتسيالار بار. ۇلتتىق سپورت قاۋىمداستىعىن بەلگىلى كاسىپكەر, مەتسەنات, «Altyn Qyran Foundation» قوعامدىق قورى قامقورشىلىق كەڭەسىنىڭ توراعاسى يسلامبەك سالجانوۆ باسقارادى.
قىرمىزى جۇماعاليقىزى,
ەۇۋ ستۋدەنتى
