مىنە, سوندىقتان ەلباسى بىلتىرعى جىلعى «نۇرلى جول – بولاشاققا باستار جول» اتتى جولداۋىندا ەلىمىز ساياسي تۇراقتىلىق پەن قوعامدىق كەلىسىمنىڭ ارقاسىندا ۇلكەن جەتىستىكتەرگە جەتكەنىن ايتا كەلىپ, ەل بىرلىگىن, تاتۋلىق پەن ۇلتارالىق كەلىسىمدى نىعايتۋدا قازاقستان حالقى اسسامبلەياسى ۇلكەن جۇمىس اتقارىپ كەلە جاتقانىن اتاپ كورسەتتى. بۇگىندە الماتى وبلىسىندا 103 ەتنوس وكىلى تۇرادى. ءبىر قۋانارلىعى, جەتىسۋلىقتار ۇلتقا بولىنبەي, كاسىبي ماماندىعىنا ساي كەلگەن جۇمىستى ىستەپ, تابىس تابۋعا ماشىقتانعان. بىرەر مىسال كەلتىرسەم, تابانى كۇرەكتەي 26 جىل وڭىردەگى اۋىل شارۋاشىلىعى قۇرىلىمدارىن باسقارىپ, ەلدىڭ ۇيعارىمىمەن قاراتال اۋداندىق ءماسليحاتىنىڭ ەكى دۇركىن شاقىرىلىمىنىڭ دەپۋتاتى بولدىم.
حالىقتىڭ سەنىم ارتۋىنىڭ باستى سەبەبى, توقىراۋ جىلدارى اۋىلداستارىم كۇنكورىس قامىن كۇيتتەپ, قالايدا جان باعۋدى ويلاپ ەرتەڭگى كۇنگە دەگەن سەنىمدەرى سەتىنەي باستاعاندا, ەلباسىنىڭ سارابدال ساياساتىن ءوزىم عانا ۇستانىپ قويماي, سوڭىمنان ەلدى, ياعني ەتنوس وكىلدەرىن ەرتە ءبىلدىم. وتپەلى كەزەڭ قيىندىقتارىن بىرلەسە جەڭۋ ءۇشىن 1994 جىلى «قاراتال» اكتسيونەرلىك قوعامىن قۇرىپ, بۇرىنعى ۇجىمشاردىڭ ءبىر كىرپىشىن دە بۇزعىزباي ساقتاپ قالدىم. زاڭناما شەڭبەرىندە ارەكەت ەتىپ, جەمىسىن ەلگە جەگىزۋدەمىن. وعان حالىق كۋا. ەل بىرلىگىن, ىنتىماعىن ساقتاۋدى ۇلتقا ءبولىنۋدى بىلمەيتىن جەرلەستەرىمنىڭ ساناسىنا سىڭىرە بەرۋدى پارىز سانايمىن. ۇستانعان جولىمنىڭ دۇرىستىعى بولار, اۋىلدا ەڭبەك كورىگىن قىزدىرىپ جۇرگەنىمدە, ياعني 1999 جىلى ويلاماعان جەردە استاناعا شاقىرتۋ الدىم.
مىنە, عالامات. اقوردادا قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ ءوز قولىمەن ومىراۋىما «قۇرمەت» وردەنىن تاقتى. سول ءبىر ساتتەگى قۋانىشىمدا شەك بولمادى. شادىمان شاتتىققا بولەنىپ تۇرىپ, مەملەكەت باسشىسىنىڭ قولى تيگەن وردەنىمدى سيپاپ تا قويامىن. ءسويتىپ, ەلباسىمەن ءبىرىنشى رەت قول الىسىپ امانداسۋ باقىتىنا يە بولعان ەدىم. ەكىنشى رەت 2014 جىلدىڭ 18-20 تامىزىندا ەلباسى جۇمىس ساپارىمەن الماتى وبلىسىنا كەلگەندە قارسى الىپ, الدىمەن قول الىسقان ءۇش ادامنىڭ ءبىرى بولدىم.
سول قۋانىشتى ساتتەرىم جايلى سان ساۋالىن اعىتاتىن قازاق, ورىس, كورەي جانە تاعى باسقا ەتنوس وكىلدەرىنە ايتارىم, ەلباسىمەن جۇزبە-ءجۇز كەزدەسۋدىڭ ءجونى بولەك. ەت پەن سۇيەكتەن جاراتىلعان پەندە بولعان سوڭ تولقيسىڭ, تەبىرەنە تۇرىپ كەلەلى وي تۇيمەسكە ءاددىڭ قالمايدى. توسىن سۇراق قويا قالسا, مۇدىرمەي جاۋاپ بەرۋگە دايىن تۇراسىڭ. بۇل ادامنىڭ ءوزىن ءوزى شىڭداۋ قادامى دەپ سانايمىن. سونداي ساتتەردە اگرارلى سالانى دامىتۋدىڭ ويتامىزىعى دا كوكەيىمە مىقتاپ تۇيىلە تۇسەدى. وسى ويتامىزىق ەڭبەككە قۇلشىنىسىمدى كۇشەيتەدى. قازاقتا «ىرىس الدى – ىنتىماق» دەگەن ءسوز بار. ەلباسىمەن كەزدەسكەندەگى تۇيگەن كەلەلى ويىمدى وبلىسىمىزدا مەملەكەتتىك ساياساتقا ساي اتقارىلىپ جاتقان جۇمىستار ءدوپ باساتىنى قۋانتادى.
باقىت سمايىلوۆ,
«قاراتال» اق توراعاسى.
الماتى وبلىسى, قاراتال اۋدانى.
