تاكسيستى ولتىرگەن اقتوبە تۇرعىنى 16 جىلعا سوتتالدى

استانا. 25 ءساۋىر. اقتوبە قالاسىنىڭ تۇرعىنى 26 جاستاعى تاكسيستى ولتىرگەنى ءۇشىن 16 جىلعا تەمىر تورعا قامالدى. بۇل تۋرالى «موي گورود» پورتالى حابارلايدى. اتالعان پورتال تاراتقان مالىمەتتەرگە سۇيەنسەك, قىلمىسكەر كىناسىن جارتىلاي عانا مويىنداعان. سۋديا 21 جاستاعى اقتوبەلىكتى 16 جىلعا قاتاڭ رەجيمدەگى تۇرمەگە جاپتى. ال ونىڭ سىبايلاسى قىلمىستى جاسىرعانى ءۇشىن ەكى جىلعا باس بوستاندىعىنان ايىرىلدى. بۇل قاندى وقيعا 2014 جىلى 28 قازاندا بولعان. مارقۇم بولعان تاكسيست جەكە VIP-تاسىمالداۋمەن اينالىسقان. تۇتىنۋشىلارىن ول ءوزىنىڭ جەكە كولىگىمەن تاسىپ, تابىس تاۋىپ جۇرگەن. تاكسيستىڭ حابارلاندىرۋىن ينتەرنەتتەن كورگەن قىلمىسكەر ونىڭ قىمبات كولىگىن تارتىپ الۋدى ويلاپ, الدىن الا قاندى جوسپار قۇرادى. ارام ويىن ىسكە اسىرۋ ءۇشىن ول تاكسيگە تاپسىرىس بەرەدى. مارتوك اۋدانىنداعى جامبىل اۋىلىنا بارار جولدا ول جۇرگىزۋشىنى بىرنەشە جەردەن پىشاقتايدى. كوپ قان جوعالتقان جابىرلەنۋشى نۇربەكوۆ سول جەردە كوز جۇمادى. وسىدان كەيىن قانىپەزەر جىگىتتىڭ ءولى دەنەسىن ايدالاعا سۇيرەپ اپارىپ تاستاپ, ءوزى كولىگىن ءمىنىپ كەتكەن. قايتىس بولعان رۇسەم نۇربەكوۆتىڭ ارتىندا ءۇش قىزى جەتىم قالدى. بالالارىنىڭ ۇلكەنى 5-تە بولسا, ورتانشىسى ءبىر جارىم جاستا ەكەن. ال اكەسى ادام قولىنان قازا تاپقان كۇنى كەنجە قىزىنىڭ ومىرگە كەلگەنىنە ون-اق كۇن بولعان. ەلامان قوڭىر. دەرەك: «موي گورود». سۋرەت: ria.ru.