پاۆلوداردا 5 جاسىنان كوزگە تۇسكەن بوكسشى قىز شىقتى (ۆيدەو)

استانا. 25 ءساۋىر. وسىدان ءۇش جىل بۇرىن عالامتوردا «قازاقستاننان شىققان ەڭ جىلدام قىز» اتتى بەينەروليك جاريالانعانى بەلگىلى. شامامەن 3 ميلليون رەت قارالعان ۆيدەودا 5 جاسار پاۆلودارلىق ەۆنيكا سادۆاكاسوۆا بوكس سپورتى بويىنشا شەبەرلىگىن كورسەتەدى. ارادا ءۇش جىل وتكەن كەزدە تالانتتى قىزدىڭ اكەسى كەزەكتى بەينەروليكتى جاريالادى. بۇل تۋرالى «ەكسپرەسس ك» حابارلادى. جاڭا بەينەروليكتە دە ەۆنيكا بۇرىنعىداي جوعارى دەڭگەيدە تەحنيكالىق شەبەرلىگىن پاش ەتەدى. اكەسى رۋسلان سادۆاكاسوۆتىڭ ايتۋىنشا, قىزىنىڭ تەحنيكاسى مەن سوققىسىنا ماماندار جوعارى باعا بەرگەن. ءتىپتى كەيبىر كاسىپقوي بوكسشىلاردىڭ ءوزىن جولدا قالدىرادى ەكەن. «ەۆنيكا سوققى تەحنيكاسىن ۇيرەتەتىن جاتتىعۋ سپاررينگتەرىنە قاتىسپاسا دا, شەبەرلىگى اسا جوعارى دەڭگەيدە. مەن بارلىق بالالارىما بوكستىڭ قىر-سىرىن ۇيرەتىپ, وسى سپورتقا باۋلىدىم. بىراق مەنىڭ جاتتىقتىرۋشىلىق ءادىسىم بويىنشا ولار 15 جاسقا دەيىن شارشى الاڭعا شىقپايدى. ايتپەسە, بالانىڭ پسيحيكاسىنا زاقىم كەلەدى. ماسەلەن, انجا ەسىمدى قىزىم تەك ەسەيگەن كەزدە عانا جارىستارعا قاتىسا باستادى. ايتپاقشى, ول رەسەيدە ەرەسەكتەر اراسىندا وتكەن كۋنگ-فۋدان حالىقارالىق تۋرنيردە ءۇشىنشى ورىن الدى. بۇعان ەرەكشە نازار اۋدارىپ وتىرعان سەبەبىم, انجا وعان دەيىن ءتىپتى جاتتىعۋ سپاررينگتەرىنە دە قاتىسپاعان ەدى. مەكتەپتە قاتارلاستارى قىزدارىمدى ەشقاشان رەنجىتپەيدى. ويتكەنى, ولاردىڭ قانداي دەڭگەيدەگى شەبەر سپورتشى ەكەنىن ءبارى بىلەدى», – دەيدى قىزدارىن سپورتقا باۋلىعان اكە. ءبىر قىزىعى, رۋسلاننىڭ بالالارىنىڭ ەسىمدەرى وتە ەرەكشە. ماسەلەن, قىزدارىنىڭ ەسىمدەرى: ادەلايدا, حاتشەپسۋت, سەلياۆيرا جانە انجا. سونداي-اق, اينزي ماكاسي ەسىمدى ۇلى بار. ءوزىنىڭ ايتۋىنشا, قىزدارىنا ەجەلگى قۇدايلاردىڭ ەسىمدەرىن بەرگەن. ال ۇلىنىڭ ەسىمى جاپون حالقىنىڭ قۇرمەتىنە قويىلعان. «بالالارىمنىڭ قۇجاتتارىن راسىمدەۋ ءۇشىن احاج-عا بارعانىمدا, ول جەردەگىلەر كۇلگەن ەدى. بىراق ءتيىستى قۇجاتتاردىڭ بارلىعىن رەتتەپ الدىم. مەنىڭ بۇل ارەكەتىمدى ايەلىم انيا دا قولدادى», – دەيدى رۋسلان. ايتا كەتەيىك, انيا – اكروباتيكادان قازاقستان چەمپيونى. ال رۋسلان – بوكستان سپورت شەبەرلىگىنە ۇمىتكەر. ولاردىڭ قىزدارىندا وزدەرىنىڭ قۇپيا قارۋلارى بار ەكەن. ناقتى ايتار بولساق, اكەلەرى بىرەگەي جاتتىعۋ ەسپاندەرىن ويلاپ تاپقان. اتالعان جاتتىعۋ قۇرالى ادامنىڭ بۇلشىق ەتىنىڭ رەاكتسياسىن وتە جوعارى دەڭگەيدە جەتىلدىرەدى. «ءبىز ول قۇرالدى ەۆنيك دەپ اتادىق. ونىمەن جاتتىققان كەزدە سوققىنىڭ جىلدامدىعى ادامنىڭ رەفلەكسىمەن ءبىر دەڭگەيدە جەتىلەدى. ول جاتتىعۋ قۇرالىن بۇگىندە اقش, اۆستراليا جانە باتىس ەۋروپادان ادامدار ارنايى كەلىپ ساتىپ الادى», – دەيدى بالالارىنىڭ ءومىرىن سپورتپەن ورگەن رۋسلان سادۆاكاسوۆ. ەلامان قوڭىر. دەرەك, سۋرەت: «ەكسپرەسس ك».