فوتولار: ۇلتتىق ۇلاننىڭ ءباسپاسوز قىزمەتى
سالتاناتتى ءىس-شارادا ماگيسترانتتاردى قۇتتىقتاعان قورعانىس ءمينيسترىنىڭ ءبىرىنشى ورىنباسارى گەنەرال-لەيتەنانت سۇلتان قامالەتدينوۆ: «تاۋەلسىز ەلىمىزدىڭ ارمياسى قۇرىلعان كۇننەن باستاپ نورماتيۆتىك-قۇقىقتىق بازانى قالىپتاستىرۋ, ۇيىمدىق-شتاتتىق قۇرىلىمدى وڭتايلاندىرۋ جانە اسكەرلەردى تەحنيكالىق جاراقتاندىرۋ ماسەلەرىنە ەرەكشە دەن قويىپ كەلەدى. سونىمەن قاتار, اسكەري كادرلاردى دايىنداۋدىڭ كوپ دەڭگەيلى جۇيەسىن قۇرۋ – باسىم باعىت بولعانىن اتاپ وتكەن ءجون. بۇل قادام بۇگىندە ءوزىن تولىقتاي اقتاپ, وڭ جەمىسىن بەرىپ وتىر!», دەدى.
اتالعان جوعارى اسكەري وقۋ ورنى جىل سايىن جەدەل-ستراتەگيالىق جانە جەدەل-تاكتيكالىق باسقارۋ بۋىندارىنا ماماندار دايىنداپ شىعارادى. ۇلتتىق قاۋىپسىزدىك جانە اسكەري ىستەر ماگيسترى دارەجەسىنە يە بولعان 158 وفيتسەردىڭ 23-ءى قازاقستان رەسپۋبليكاسى ءىىم ۇلتتىق ۇلانىنان جىبەرىلگەن ەدى. ولار ماگيستراتۋرالىق ءبىلىم بەرۋ باعدارلاماسىنا سايكەس, تەوريالىق وقىتۋدان بولەك, اسكەري تاعىلىمدامانىڭ تولىق كۋرسىنان ءوتتى.
ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى گەنەرال-لەيتەنانت ەركىن بوتاقانوۆ شىعارىلىم سالتاناتىندا وفيتسەرلەردى جاڭا ستاتۋستارىمەن قۇتتىقتادى.
ء«تول اسكەرىمىزدىڭ قاتارى ماگيسترلىك ءبىلىمى بار وفيتسەرلەرمەن تولىعىپ وتىر. ەلىمىزدەگى ەڭ بەدەلدى اسكەري وقۋ ورنىنان العان بىلىمدەرىڭىز بەن بىلىكتىلىكتەرىڭىزدى ۇلتتىق ۇلاننىڭ الدىنا قويىلعان مىندەتتەردى ورىنداۋ بارىسىندا وڭتايلى قولداناسىزدار دەپ سەنەمىن», دەدى باس قولباسشى.
ۇلتتىق قورعانىس ۋنيۆەرسيتەتىنىڭ ۇلتتىق ۇلان فاكۋلتەتىن 2023 جىلدىڭ اقپان ايىنان بەرى پولكوۆنيك ساۆەردين يميروۆ باسقارادى. ساۆەردين كارلوۆيچ فاكۋلتەتتىڭ بيىلعى, ياعني ون ءبىرىنشى شىعارىلىمىنا قاتىستى ويىمەن ءبولىستى.
«ماگيسترانتتار اسكەردى وپەراتيۆتى تاكتيكالىق باسقارۋ جانە قىزمەتتىك-جاۋىنگەرلىك قىزمەتىن قامتاماسىز ەتۋ كافەدرالارىندا ءبىلىم الدى. ءبىرىنشى اتالعان كافەدرادا باتالوننان باستاپ جوعارى دەڭگەيدەگى كومانديرلەر وقىتىلسا, ەكىنشى كافەدرادا تاربيە جانە الەۋمەتتىك-قۇقىقتىق جۇمىستار, تىل, تەحنيكا جانە قارۋ-جاراق وفيتسەرلەرى بىلىكتىلىكتەرىن شىڭدادى. ولار ەندى ۇلتتىق ۇلان باس قولباسشىلىعى باسقارمالارىندا, وڭىرلىك قولباسشىلىق باسقارمالارىندا وفيتسەرلىك, اعا وفيتسەرلىك لاۋازىمدارعا تاعايىندالادى, پولك كومانديرلەرىنىڭ ورىنباسارى, شتاب باستىقتارى قىزمەتىن اتقارادى. اكادەمياعا دا ەكى وفيتسەر كەتىپ جاتىر, ءبىرى وقىتۋشى بولىپ, ەكىنشىسى وقۋ باتالونىنىڭ كومانديرى رەتىندە. بارىنە ساتتىلىك تىلەيمىن», دەدى فاكۋلتەت باسشىسى.
«بۇگىن زاماناۋي وفيتسەرلەر, بولاشاق اسكەري باسقارۋ ورگاندارىنىڭ باسشىلارى وقۋ ورنىن ءبىتىرىپ وتىر. وسى ساناتتان تابىلعانىما وتە قۋانىشتىمىن. ۇلتتىق ۇلاندىق تۇلەكتەر اراسىندا باس شتاب اكادەمياسىنىڭ, دوكتورانتۋرانىڭ جانە ارنايى دايىندىق كافەدراسىنىڭ وفيتسەرلەرى دە بار. بۇگىن ولار باس قولباسشى قولىنان ديپلوم الدى. ءبىلىم ورداسىندا زامان تالابىنا ساي كاسىبي جەتىلۋ, اسكەر بولىنىستەرىن زاماناۋي باسقارۋ جۇيەسىن مەڭگەرۋ ءۇشىن بارلىق جاعداي جاسالعان», دەيدى تۇلەكتىڭ ءبىرى, وسكەمەن قالاسىنداعى 3477 اسكەري ءبولىمىنىڭ بۇرىنعى كومانديرى پودپولكوۆنيك ازامات سەيىلحانوۆ.
سالتاناتتى ءىس-شارا قورعانىس مينيسترلىگى مەن ءىىم ۇلتتىق ۇلانى ونەرپازدارىنىڭ كونتسەرتتىك باعدارلاماسىمەن اياقتالدى.
