وڭىردە جۇزگە جۋىق ادام اۋماقتى تازالاۋعا قاتىستى. ەكولوگيالىق ءىس-شاراعا «Amanat» پارتياسىنىڭ مۇشەلەرى, «جاستار رۋحى» جق بەلسەندىلەرى, جەرگىلىكتى كوللەدجدەردىڭ وقۋشىلارى, ءوڭىردىڭ قوعامدىق ۇيىمدارىنىڭ وكىلدەرى قاتىستى. تازالاۋ ورنى رەتىندە زەلەنستروي شاعىن اۋدانىنداعى قوقىس جىلدار بويى جينالعان ۋچاسكە تاڭدالدى.
«كوممۋنالدىق مەكەمە قىزمەتكەرلەرى قالانىڭ بارلىق اۋماعىن جەدەل قامتي المايتىنى ءمالىم. ءبىز ەلىمىزدەگى تازالىق مادەنيەتىن قالىپتاستىرۋ جانە ەكولوگيالىق تەپە-تەڭدىكتى ساقتاۋ ماقساتىنداعى باستامالاردى بارىنشا قولدايمىز. بۇگىنگى ءىس-شاراعا جاستاردى بارىنشا تارتۋعا تىرىستىق. بۇل بىررەتتىك جوبا ەمەس, «تازا بەيسەنبى» اكتسياسى اپتا سايىن تۇراقتى وتكىزىلەدى», دەپ اتاپ ءوتتى پارتيالىق ۇيىمنىڭ وڭىرلىك فيليالىنىڭ توراعاسى يليا تەرەنچەنكو.
جەرگىلىكتى جاستار, ونىڭ ىشىندە اقپاراتتىق تەحنولوگيالار جانە ءتۇستى مەتاللۋرگيا كوللەدجدەرى اكتسياعا بەلسەنە قاتىستى. ولاردىڭ پىكىرىنشە, مۇنداي ءىس-شارالار شاھاردىڭ ەكولوگيالىق جاعدايىن جاقسارتا تۇسۋگە مۇمكىندىك بەرەدى.
«جاستاردى قوعام تاربيەلەپ وتىر. پايدالى ىسپەن اينالىسىپ, ءبىر-بىرىمىزگە كومەككە كەلۋ اسا ماڭىزدى. ال قوعام بىرىكسە, بىرلىگىمىز نىعايادى. بۇگىندە جاستاردىڭ دۇنيەتانىمى وزگەرۋ ۇستىندە. ءبىز ستۋدەنتتەرمەن بىرگە اۋماقتى قوقىستان تازارتا ءجۇرىپ, ءان سالدىق. باستىسى بىزگە كوڭىلدى بولدى», دەيدى ءتۇستى مەتاللۋرگيا كوللەدجىنىڭ پەداگوگى يسلامبەك ءالجانوۆ.
ەكولوگيالىق اكتسيانىڭ العاشقى كۇنىنىڭ قورىتىندىسى بويىنشا وبلىس ورتالىعىندا 11 تونناعا جۋىق تۇرمىستىق جانە قۇرىلىس قوقىستارى جينالدى. سونداي-اق بۇل كۇنى اقتوعاي جانە ەرتىس اۋداندارىندا, اقسۋ مەن ەكىباستۇز قالالارىندا وسىنداي تازالىق ءىس-شارالارى جۇرگىزىلدى.
پاۆلودار وبلىسى
