قارۋلاستارى مەن كومانديرلەردىڭ, سونداي-اق اتا-انالارىنىڭ قاتىسۋىمەن وتكەن ءىس-شارادا جاس جاۋىنگەرلەر وتانىن قورعاۋعا, اسكەري قىزمەتتىڭ اۋىرتپالىقتارىن تاباندىلىقپەن كوتەرۋگە, قازاقستان حالقى مەن ونىڭ زاڭدى سايلانعان پرەزيدەنتىنە ادال بولۋعا انت بەردى.
– اسكەري انتتاعى ءار ءسوز ۇلكەن ماعىناعا يە. ونى سالتاناتتى جاعدايدا وقىعان سوڭ عانا اسكەرگە شاقىرىلۋشى تولىققاندى اسكەري قىزمەتشىگە اينالادى. سول ارقىلى اسكەري قىزمەتتى دۇرىس اتقارۋ مەن انتقا ادال بولۋ جاۋاپكەرشىلىگىن ءوز موينىنا الادى, – دەپ اتاپ ءوتتى «وڭتۇستىك» وڭىرلىك اسكەرلەرى قولباسشىسىنىڭ تاربيە جانە يدەولوگيالىق جۇمىستار جونىندەگى ورىنباسارى, پولكوۆنيك وراز كۋچۋكوۆ.
انت بەرۋ راسىمىنە تاۋ قورىقشىسى پولكىنىڭ ساربازدارى ءبىر اي بويى دايىندالدى. وسى ۋاقىت ىشىندە ولار اسكەري ءومىر سالتىمەن, پولك تاريحىمەن تانىسىپ, جاس جاۋىنگەر كۋرسىن يگەردى. جالپى, اسكەري جارعىلاردى, قارۋدىڭ تاكتيكالىق-تەحنيكالىق سيپاتتامالارىن زەردەلەپ, ساپتىق, اتىس جانە دەنە دايىندىعىنان ءوتتى.
– مەن قىزمەت ەتۋگە كەلگەن اسكەري ءبولىم ەلىمىزدەگى بىرەگەي ءبولىم ءارى حالىق باتىرى باۋىرجان مومىش ۇلىنىڭ تۋعان جەرىندە ورنالاسقان. بۇل بىزگە قوسىمشا جاۋاپكەرشىلىك جۇكتەيدى. سول سەبەپتى, ۇلى قولباسشىنىڭ ەسىمى مەن داڭقىنا ساي بولۋىمىز كەرەك, – دەدى شىمكەنتتەن شاقىرىلعان قاتارداعى جاۋىنگەر رامازان ايدوس ۇلى.
تاۋ قورىقشىسى پولكى تابيعاتى كوركەم تەرىسبۇلاق سۋ قويماسىنىڭ جاعاسىندا, تاۋ جوتاسىنىڭ ەتەگىندە ورنالاسقان.
– ماعان بۇل ولكەنىڭ تابيعاتى قاتتى ۇنادى. اينالانىڭ ءبارى تاماشا. ءار تاڭ سايىن كوڭىل كۇيىم كوتەرىلىپ ويانامىن, – دەيدى وسكەمەن قالاسىنان قىزمەت ەتۋگە كەلگەن مەرزىمدى قىزمەتتەگى قاتارداعى جاۋىنگەر دانيل ەنيكۋشكين. – شىنىمدى ايتسام, مەن قازىردىڭ وزىندە كەلىسىمشارت بويىنشا وسىندا قىزمەت ەتۋدى ويلاستىرىپ جاتىرمىن. ارينە, ونى ۋاقىت كورسەتەدى.
«وڭتۇستىك» وڭىرلىك قولباسشىلىعى اسكەري وركەسترىنىڭ ورىنداۋىنداعى اسكەري مارشتار سالتاناتقا قاتىسۋشىلاردىڭ جاۋىنگەرلىك رۋحى مەن كوڭىل كۇيىن كوتەرىپ تاستادى. ساربازداردىڭ اتا-انالارى ءۇشىن قارۋ-جاراق پەن اسكەري-تەحنيكالىق م ۇلىك كورمەسى ۇيىمداستىرىلىپ, اسكەري ءبولىم اۋماعىندا ەكسكۋرسيا جۇرگىزىلدى.
