فوتو: aqmeshit-aptalygy.kz
عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆتىڭ بيىل 10 576 ورىنعا شاقتالعان 27 جاتاقحانانى قولدانىسقا بەرۋ جوسپارلانعانىن ايتتى. ونىڭ 19-ى جوعارى وقۋ ورىندارىنا, 8-ءى كوللەدجدەردىڭ ستۋدەنتتەرىنە پايدالانۋعا بەرىلەدى.
«قازىردە 1540 ورىنعا ارنالعان 7 جاتاقحانادا ءتيىستى جۇمىستار تولىعىمەن اياقتالىپ, كەلەر وقۋ جىلىنا ستۋدەنتتەردى قابىلداۋعا ءازىر. قۇرىلىس نەمەسە رەكونسترۋكتسيا جۇمىستارىن جۇرگىزۋ بويىنشا وبلىستار مەن رەسپۋبليكالىق ماڭىزى بار قالالاردا جول كارتالارى دايىندالدى. جوسپارلانعان نىسانداردىڭ دەنى قىركۇيەككە دەيىن پايدالانۋعا بەرىلمەك», دەدى تالعات ەشەنقۇلوۆ.
قازىر جاتاقحانا قۇرىلىستارىنداعى جۇمىستىڭ 75 پايىزى اياقتالعان. ال ءۇش نىسانداعى ءتيىستى جۇمىستار 50% شاماسىندا اتقارىلعان. ولار الماتى قالاسى مەن اقمولا, قىزىلوردا وبلىستارىنا تيەسىلى. ءوز كەزەگىندە ءوڭىر اكىمدەرى ستۋدەنتتەرگە ارنالعان ۇيلەردى ۋاقتىلى اياقتاۋعا ۋادە بەرىپ وتىر.
«قۇرىلىس ماۋسىمىنىڭ ۋاقىتى شەكتەۋلى. سوندىقتان جاۋاپتى مينيسترلىكتەرمەن قاتار وبلىس اكىمدىكتەرى جۇمىستىڭ ۋاقتىلى ءارى ساپالى اتقارىلۋىن تۇراقتى تۇردە قاداعالاۋى كەرەك. نىساندارداعى قۇرىلىس, رەكونسترۋكتسيا شارالارىنىڭ قارقىنىن اپتا سايىن قاراستىراتىن بولامىز. بۇل جۇمىسقا جەكە كاسىپكەرلەردىڭ قىزىعۋشىلىعى جوعارى ەكەنى بايقالادى. سول سەبەپتى جاتاقحانا سالۋعا نيەتتى بيزنەس وكىلدەرىنە قاجەتتى جاعداي جاساۋعا قاتىستى شارالاردى قاراستىرۋ قاجەت», دەدى تامارا دۇيسەنوۆا.
