جىل باسىنان قازاقستانعا كەلگەن قانداستاردىڭ جارتىسىنان كوبى (50,3%) قىتايدان, 33,4%-ى – وزبەكستاننان, 6,4%-ى – تۇرىكمەنستاننان, 5,2%-ى – موڭعوليادان, 3,4%-ى – رەسەيدەن جانە 1,3%-ى باسقا ەلدەردەن قونىس اۋدارىپتى.
وسى جىلعى 1 مامىرداعى جاعداي بويىنشا ەڭبەككە قابىلەتتى جاستاعى ەتنوستىق قونىس اۋدارۋشىلار سانى 58,9%-دى, ەڭبەككە قابىلەتتى جاستان كىشىلەرى 31,6%-دى جانە زەينەتكەرلەر 9,5%-دى قۇرايدى.
ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيىنە كەلسەك, 17%-ى جوعارى ءبىلىمدى, 22,6%-ى ورتا كاسىبي ءبىلىمدى, 55,1%-ى جالپى ورتا ءبىلىمدى, جانە 5,3%-ىنىڭ ءبىلىمى جوق.
قونىس اۋدارعان ەتنوستىق قازاقتار ءبىر جەرگە شوعىرلانباي, رەسپۋبليكانىڭ ءار ايماعىنا قونىستانعان. سونىمەن بىرگە, ۆەدومستۆونىڭ حابارلاۋىنشا, قانداستاردى قونىستاندىرۋ ماقساتىندا ەڭبەك كۇشى تاپشى وڭىرلەر انىقتالعان. ماسەلەن, قانداستار اقمولا, اباي, قوستاناي, پاۆلودار, شىعىس جانە سولتۇستىك قازاقستان وبلىستارىنا بارا الادى.
قونىستاندىرۋ وڭىرلەرىندە بيىلعا ارنالعان قانداستاردى قابىلداۋ كۆوتاسى 2 433 ادامدى قۇرايدى. 2024 جىلعى 1 مامىرداعى جاعداي بويىنشا قونىستاندىرۋ وڭىرلەرىنە 1 453 قانداس قونىس اۋدارعان ەكەن.
«جوعارىدا اتالعان وڭىرلەردە قونىستانعان قانداستارعا كوشۋگە سۋبسيديا تۇرىندە مەملەكەتتىك قولداۋ شارالارى ۇسىنىلادى. ياعني ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 اەك (258,4 مىڭ تەڭگە) مولشەرىندە, تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە – ءبىر جىل ىشىندە 15-تەن 30 اەك (55,3-دەن 110,7 مىڭ تەڭگەگە دەيىن) مولشەرىندە سۋبسيديا بەرىلەدى. جىل باسىنان بەرى 1 246 قانداسقا ءتۇرلى قولداۋ شارالارى كورسەتىلدى. اتاپ ايتقاندا, 401 ادام تۇراقتى جۇمىسقا ورنالاستىرىلدى», دەلىنگەن مينيسترلىكتىڭ اقپاراتىندا.
سونىمەن قاتار ەرىكتى قونىس اۋدارۋدىڭ تيىمدىلىگىن ارتتىرۋ ماقساتىندا ازاماتتاردى سولتۇستىك وڭىرلەرگە قونىس اۋدارۋعا قاتىساتىن جۇمىس بەرۋشىلەردى قولداۋ بويىنشا ينستيتۋتسيونالدىق شارالار قابىلدانعان. تۇرعىن ءۇي ساتىپ الۋ, سالۋ ءۇشىن نەمەسە يپوتەكالىق تۇرعىن ءۇي قارىزدارى بويىنشا باستاپقى جارنانىڭ ءبىر بولىگىن جابۋ ءۇشىن ەكونوميكالىق ۇتقىرلىق سەرتيفيكاتى تۇرعىن ءۇي قۇنىنىڭ 50%-ى نەمەسە ءبىر وتباسىنا 4,28 ملن تەڭگەگە دەيىن مولشەرىندە ءبىر جولعى وتەۋسىز جانە قايتارىمسىز نەگىزدە ەنگىزىلدى.
ەستەرىڭىزگە سالا كەتسەك, بىلتىردان باستاپ قاناتقاقتى رەجىمدە قازاقستان ەلشىلىكتەرى ارقىلى ء«بىر تەرەزە» قاعيداتى بويىنشا قانداس مارتەبەسىن بەرۋ تەتىگى ىسكە اسىرىلىپ كەلەدى. قاناتقاقتى جوبا اياسىندا ەلىمىزگە بارۋ, جۇمىس ورنى, تۇرعىن ءۇي بەرۋ مۇمكىندىكتەرى تۋرالى ماسەلەنى شەشۋگە جانە رەسپۋبليكا اۋماعىنا كىرمەي-اق قانداس مارتەبەسىن الۋعا بولادى. بۇگىنگى تاڭدا ەتنوستىق قازاقتاردان جاڭا فورماتتا 8 326 ءوتىنىش قابىلدانعان ەكەن.
