جۋىردا پەتروپاۆل قالاسى پوليتسيا باسقارماسىنىڭ ەسىرتكىگە قارسى كۇرەس ءبولىمىنىڭ باسشىسى, مايور جانگەلدى اپەنوۆ الەۋمەتتىك جەلىلەردەگى تىكەلەي ەفيرى ارقىلى جىل باسىنان بەرى 18 كيلو ەسىرتكىنى زاڭسىز اينالىمنان شىعارىپ, كىنالىلەردى ۇستاۋ بارىسىندا 104 ادامعا قاتىستى قىلمىستى ءىس قوزعالعانىن مالىمدەدى. «انىقتالعان 54 دەرەك ەسىرتكىنى تاراتۋ, 4-ەۋى ۇلكەن كولەمدەگى ەسىرتكىنى ساقتاۋعا قاتىستى بولىپ وتىر. تاركىلەنگەن 18 كيلو ەسىرتكىنىڭ 4 كيلوسى سينتەتيكالىق بولسا, 14 كيلوسى ماريحۋانا», دەدى ول.
پوليتسيا قىزمەتكەرلەرىن ەسىرتكى تاسىمالداۋ ىسىنە كانىگى ناشاقورلاردىڭ جاسوسپىرىمدەردى تارتۋى الاڭداتىپ وتىر. ەسىرتكى تاراتۋشىلار وڭ-سولىن باعامداپ ۇلگەرمەگەن جەتكىنشەكتەردى «ۇستاسا دا, كامەلەتكە تولماعان ساعان كوپ جىل بەرمەيدى, ال ۇستاعانعا دەيىن قىرعىن اقشا تاباسىڭ» دەپ الداپ, ازعىرىپ, الەۋمەتتىك جەلىلەر, ءتۇرلى چاتتار ارقىلى حابارلار تاراتادى. مۇنداي جەڭىل «جۇمىسقا» قالاي تۇرىپ, قىرۋار اقشاعا قارىق بولۋ ءۇشىن قايدا, كىمگە بارۋ كەرەكتىگىن دە وزدەرىنىڭ جاسىرىن ىم-جىم سوزدەرى ارقىلى ءبىلدىرىپ, قىزىقتىرادى. سوسىن ءجاسوسپىرىمنىڭ باسىنا جەلىك كىرىپ, وڭاي ولجاعا تەزىرەك قول جەتكىزۋگە تىرىسادى. كوبىنە تۇرمىسى تومەن وتباسىلاردان شىققان جاسوسپىرىمدەر وسىندايعا الدانىپ, كوپ اقشاعا قىزىعىپ, بولاشاق تاعدىرىنا وزدەرى بالتا شابادى. ءتىپتى اۋىلدى جەرلەردەن ەسىرتكى تاراتۋ ءۇشىن قالاعا كەلەتىن جەتكىنشەكتەر دە بار كورىنەدى.
«جاس بۋىنعا ءبىز ءوز تاراپىمىزدان ەسىرتكى بيزنەسىنىڭ قىلمىس ەكەنىن اشكەرەلەپ, الەۋمەتتىك جەلىلەر ارقىلى ءوتىمدى حابارلار ۇيىمداستىرامىز. مۇنداي حابارلاما-تۇسىنىكتەمەلەردى ءتۇرلى كونكۋرس, چەللەندج, سپورتتىق ءىس-شارا ارقىلى تاراتىپ, ءجاسوسپىرىمنىڭ ساناسىنا اسەرلى ەتىپ جەتكىزۋگە تىرىسامىز. جىل باسىنان بەرى وسىنداي باعىتتا ۇيىمداستىرىلعان 337 ءىس-شاراعا 15 مىڭداي ۆولونتەر مەن وقۋشى قاتىستى. سونىمەن قاتار ەسىرتكى تابۋدىڭ جولىن كورسەتكەن 88 سىلتەمەنى بۇعاتتادىق», دەدى مايور ج.اپەنوۆ.
ينتەرنەت-دۇكەندەردەن ەسىرتكى الىپ, ولاردى وزدەرىنە بەلگىلى نۇكتەلەرگە جاسىرۋ ارقىلى تاراتۋ جۇمىسىمەن اينالىسىپ, اقشا تابۋعا جاسوسپىرىمدەر عانا ەمەس, ءتىپتى كامەلەتكە تولعان جاستار دا جالدانادى. جۋىردا اقمولا وبلىسىنان پەتروپاۆلعا كەلىپ, ەسىرتكى بيزنەسىنە «جۇمىسقا تۇرعان» 17 جانە 20 جاستاعى ەكى جىگىت ۇستالدى. ولاردىڭ جۇمىس ۇزاقتىعى بار بولعانى 3-اق اي بولدى. ەندى ەسىرتكى تاراتقاندارى ءۇشىن ەكەۋىن دە 15 جىلعا باس بوستاندىعىنان ايىرۋ جازاسى كۇتىپ تۇر. قازىر ەرەسەگى قىلمىسكەردى قاماۋ وقشاۋلاعىشىندا, ال جاسى ءۇي قاماقتا وتىر. ەكەۋى دە ەسىرتكى بيزنەسىندەگىلەردىڭ وتىرىگىنە الدانىپ قالعانىن ايتىپ, شىر-پىر بولعان. پەتروپاۆلداعى جالداعان ۇيلەرىنەن 664 گرامم مەفەدرون جانە 358 گرامم α-PvP دەپ ورنەكتەلەتىن سينتەتيكالىق ەسىرتكى تابىلعان. سالماعى 1 كگ-دان اسقاندىقتان بۇل ەسىرتكىنى ۇلكەن كولەمدە تاراتۋ دەپ باعالانادى. ءسويتىپ, پەتروپاۆلعا كەلىپ, وڭاي اقشاعا قارىق بولامىز دەگەن ەكى جاس ەندى 15 جىل باس بوستاندىقتارىنان ايىرىلۋى مۇمكىن.
ال وبلىستىڭ ءبىر اۋدانىنان قالاعا كەلىپ, وسىنداي «جۇمىسقا» تۇرعان 23 جاستاعى جىگىتتىڭ ەسىرتكى تاراتۋمەن اينالىسۋى بار بولعانى ءبىر-اق اپتاعا سوزىلعان. پەتروپاۆلدىڭ گاراج كووپەراتيۆتەرىنىڭ ءبىرىنىڭ اراسىندا جۇرگەن ونى پوليتسەيلەر «بەللا» دەگەن ءيتتىڭ كومەگىمەن ۇستاپ, تاراتۋعا الىپ شىققان 25 تۇيىنشەكتى تاركىلەدى. بۇلار سالماعى 28 گرامم بولاتىن مەفەدرون اتتى سينتەتيكالىق ەسىرتكى ەكەن. «ەندى بۇل ادام ەسىرتكىنى اسا ۇلكەن كولەمدە تاراتقانى ءۇشىن 10-نان 15 جىل مەرزىمگە دەيىن باس ەركىنەن ايىرىلۋى مۇمكىن», دەدى وبلىستىق پد ەسىرتكىگە قارسى كۇرەس باسقارماسىنىڭ باسشىسى, پودپولكوۆنيك رۋسلان ساپاروۆ.
ال بىلتىر قاراشا ايىندا وسىنداي قىلمىسپەن ۇستالىپ, سوتتىڭ شەشىمىن كۇتىپ جاتقان قالاداعى كوللەدجدەردىڭ بىرىندە وقيتىن 17 جاسار جەتكىنشەك جۋىردا 5 جىلعا باس ەركىنەن ايىرىلدى. سوت ونىڭ باسقا قىلمىستاردى اشۋعا تەرگەۋ ورىندارىمەن ىنتىماقتاسقانىن جانە جاسىنىڭ ءالى 18-گە تولماعانىن ەسكەرىپ, جازانى بارىنشا جەڭىل بەرگەن. سونىڭ وزىندە «جەڭىل اقشا» تابامىن دەگەن جىگىت بەس جىل ءومىرىن قاپاستا وتكىزەدى. پوليتسيا قىزمەتكەرلەرى ەسىرتكىنى تۇيىنشەكپەن جاسىرۋعا جالداناتىنداردىڭ «جۇمىس ۋاقىتى» كوپ بولسا ءۇش ايعا سوزىلاتىنىن ايتادى. سودان كەيىن ءبارىبىر قولعا تۇسەدى.
سولتۇستىك قازاقستان وبلىسى
