جوبا ەلگە عانا ەمەس, شەت مەملەكەتتەرگە دە تانىمال بولعان ايگىلى وتانداستارىمىزدى تارتۋ ارقىلى ەلىمىزدىڭ وڭ ءيميدجىن ءارى قاراي قالىپتاستىرۋ, تانىمالدىعىن ارتتىرۋ جانە زاماناۋي قازاقستاننىڭ جەتىستىكتەرىن دارىپتەۋگە باعىتتالعان. جوبا يۋنەسكو, يۋنيسەف, بۇۇدب سەكىلدى بىرقاتار بۇۇ جۇيەسىنىڭ حالىقارالىق ينستيتۋتتارىنىڭ قازىرگى قولدانىستاعى نوميناتسيالارىنا ۇقساس جاسالعان.
پرەزيدەنت اكىمشىلىگى قولعا العان يگى جوباعا ەڭبەگىمەن جانە دارىنىمەن ونەر, سپورت, عىلىم جانە باسقا دا سالالاردا جەتىستىكتەرگە جەتكەن, سونداي-اق قايىرىمدىلىق جۇمىستارىنا بەلسەنە قاتىسقان وتانداستار كىرىپ وتىر.
مينيسترلىكتە وتكەن رەسمي ءىس-شاراعا سكريپكاشى, ازيا-تىنىق مۇحيتى ءوڭىرى وركەسترلەرى اليانسىنىڭ ديرەكتورى مارات بيسەنعاليەۆ, وليمپيادا چەمپيونى, ۆەلوشاباندوز الەكساندر ۆينوكۋروۆ, سۋرەتشى جانە انتيادرولىق قوزعالىس بەلسەندىسى كارىپبەك كۇيىكوۆ, ساياساتتانۋ عىلىمدارىنىڭ دوكتورى جانە تاريحي كارتالاردى زەرتتەۋشى مۇحيت-ارداگەر سىدىقنازاروۆ, ن.تىلەنديەۆ اتىنداعى مەملەكەتتىك اكادەميالىق فولكلورلىق-ەتنوگرافيالىق «وتىرار سازى» وركەسترىنىڭ باس ديريجەرى دينارا تىلەنديەۆا, «Adam» لاقاپاتىمەن تانىلعان ەسترادا ءانشىسى ميرحيداي ميرفارۋح جانە الەم رەكوردىن جاڭارتقان الىپ كۇش يەسى ءارى گيننەستىڭ رەكوردتار كىتابىنا ەنگەن سەرگەي تسىرۋلنيكوۆ قاتىستى.
كەزدەسۋدە مينيستر مۇرات نۇرتىلەۋ پرەزيدەنت قاسىم-جومارت توقاەۆتىڭ وسى باستاماسىنىڭ ماڭىزى ەرەكشە زور ەكەنىن اتاپ ءوتتى. سونداي-اق بۇگىندە ەلىمىز دۇنيەجۇزىلىك قاۋىمداستىقتا بەيبىتشىلىك پەن تۇراقتىلىقتى تۋ ەتكەن ءارى قارقىندى دامۋ جولىنداعى مەملەكەت رەتىندە كەڭىنەن تانىلعانىن ايرىقشا اتادى.
– الەمنىڭ 75 ەلىندە 114 شەتەلدىك مەكەمەمىز بار. وتكەن جىلى ءبىز شەتەلدە 3 جاڭا مەكەمە اشتىق. بيىل قوسىمشا 2 ەلشىلىك, 1 تۇراقتى وكىلدىك جانە 4 باس كونسۋلدىق ءوز جۇمىسىن باستادى. جىلدىڭ سوڭىنا دەيىن تاعى 5 مەكەمە اشۋدى جوسپارلاپ وتىرمىز. قازاقستاندا شەتەلدەردىڭ 71 ەلشىلىگى مەن 25 كونسۋلدىق مەكەمەسى جانە 33 حالىقارالىق ۇيىمنىڭ وكىلدىكتەرى اككرەديتاتسيا العان.
قازاق ەلىنىڭ جەتى بىردەي كورنەكتى وكىلىن «ىزگى نيەت ەلشىسى» رەتىندە تاعايىنداۋ دا وسى باعىتتاعى مەملەكەت باسشىمىزدىڭ ءبىرىزدى ءارى ءتورت شۇعىلاسى تەڭ سىرتقى ساياساتىنا ۇلكەن قولداۋ دەپ بىلەمىز, – دەدى سىرتقى ىستەر ءمينيسترى.
سونىمەن قاتار ول كوپۇلتتى حالقىمىزدىڭ كەلىسىم مەن ديالوگكە دەگەن ءداستۇرلى ىقىلاسىنا ساي گەنەتيكالىق كودى سىرتقى الەممەن مازمۇندى جانە ءوزارا ءتيىمدى قارىم-قاتىناستاردىڭ كەپىلى ەكەنىنە توقتالدى.
– ءبىز مۇنى شەتەلدە ناسيحاتتاۋىمىز ابزال. وسى تۇستا بىرىككەن ۇلتتار ۇيىمىنىڭ جارعىسى مەن حالىقارالىق قۇقىق نەگىزىندەگى كوپۆەكتورلى جانە سىندارلى سىرتقى ساياساتقا بالاما جوق ەكەندىگى ايقىن. ءبىزدىڭ كوزىمىزدىڭ قاراشىعىنداي ساقتايتىن ەڭ جوعارى قۇندىلىقتارىمىز – ەلىمىزدىڭ ەگەمەندىگى, تاۋەلسىزدىگى جانە اۋماقتىق تۇتاستىعى. بۇل ەكونوميكالىق ءوسۋ جانە حالىقتىڭ ءال-اۋقاتىن ارتتىرۋمەن قوسا, قازاقستاننىڭ حالىقارالىق بەدەلى مەن ءرولىن پاش ەتەدى, – دەگەن م.نۇرتىلەۋ الداعى ۋاقىتتا «ىزگى نيەت ەلشىلەرىنىڭ» يگى ميسسياسى بۇرىنعىدان دا وزەكتى بولا تۇسەتىنىن جەتكىزدى.
مينيستر ءسوزىنىڭ سوڭىندا ىزگى نيەت ەلشىلەرىنىڭ الەم قاۋىمداستىعىنا قازاقستان تۋرالى وبەكتيۆتى حابار جەتكىزەتىن پاراسات ءۇنى بولاتىنىنا ەل سەنىم ارتاتىنىن اتاپ ءوتتى.
كەزدەسۋدە ديريجەر دينارا تىلەنديەۆا, ۆەلوشاباندوز الەكساندر ۆينوكۋروۆ ءسوز سويلەپ, وزدەرىنە وسىنداي قۇرمەتتى ميسسيا جۇكتەلگەنىنە ريزاشىلىقتارىن ءبىلدىرىپ, الەمدىك اۋقىمداعى يگى باستاماعا ۇيىتقى بولعان مەملەكەت باسشىسىنىڭ اتىنا العىس ءبىلدىردى.
ءىس-شارا بارىسىندا قازاقستاننىڭ ىزگى نيەت ەلشىلەرىنە ولاردىڭ ەلشى ەكەنىن راستايتىن «Qazaqstan for Peace» توسبەلگىسى, سەرتيفيكاتى مەن كۋالىگى تاپسىرىلدى.
