فوتو:qr-pib.kz
ارعىنبەكوۆانىڭ ايتۋىنشا, بۇل ىستە مولەكۋلالىق دياگنوستيكا تەحنولوگياسى, ونىڭ ىشىندە كومپيۋتەرلىك توموگرافياسى بار پوزيتروندى-ەميسسيالىق توموگرافيا ماڭىزدى ءرول اتقارادى. ولار پاتولوگيالىق وشاقتاردا جينالاتىن مامانداندىرىلعان جابدىقتار مەن راديوفارماتسەۆتيكالىق دارىلىك پرەپاراتتاردىڭ (رفدپ) ارقاسىندا اۋرۋلاردىڭ ءورشۋىن انىقتاۋعا جانە باقىلاۋعا مۇمكىندىك بەرەدى.
«الەمدە 100-دەن استام راديوفارماتسەۆتيكالىق دارىلىك پرەپاراتتار تىركەلگەن, بىراق قازاقستاندا ولاردىڭ تەك ەكەۋى عانا بار, بۇل تىركەۋ جانە ليتسەنزيالاۋ ىسىندەگى شەكتەۋلەرگە بايلانىستى. بۇل جاعداي, ءبىر جاعىنان بىزدەگى وتكىزۋ نارىعىنىڭ ازدىعىنا, ەكىنشى جاعىنان, راديوفارماتسەۆتيكالىق دارىلىك پرەپاراتتاردى تىركەۋ جانە راديونۋكليدتىك دياگنوستيكا قىزمەتىن ليتسەنزيالاۋ ءىسىنىڭ تىم كۇردەلى راسىمىنە بايلانىستى. وسىنىڭ ءبارى, يادرولىق مەديتسينا قارىشتاپ دامىپ بارا جاتقان بۇكىل الەمنەن ايىرماشىلىعى, بىزدە كەشەندى تۇردە قاراعاندا, سوڭعى ونجىلدىقتا راديونۋكليدتىك دياگنوستيكا قىزمەتىنىڭ سانى مەن اياسى وزگەرىسسىز قالىپ وتىر. كوپتەن بەرى جاڭا پرەپاراتتار دا جاسالعان جوق», دەدى سەناتور.
سەناتور ەلىمىزدەگى پاتسيەنتتەردىڭ جىلدام ساۋىعۋى مەن قىزمەت كورسەتۋ مۇمكىندىگىن شەكتەيتىن ۇزاق جانە قىمبات تىركەۋ پروتسەسىنە نازار اۋداردى. مىسالى, قازىرگى ۋاقىتتا تسيكلوتروننىڭ بۇزىلۋى جانە تىركەلگەن رفدپ-نىڭ بولماۋى ناتيجەسىندە سىرقاتتاردى زەرتتەۋ توقتاتىلادى, بۇل مەديتسينالىق كومەككە مۇقتاج كوپتەگەن ادامدارعا كەزەك پەن كۇتۋ ۋاقىتىنىڭ كوبەيۋىنە اكەلەتىنىن ايتا كەتتى.
«وسى پروبلەمالاردى جويۋ ءۇشىن يادرولىق مەديتسينا ورتالىقتارىنا راديوفارماتسەۆتيكالىق دارىلىك پرەپاراتتاردى مەملەكەتتىك تىركەۋ جانە ساراپتاۋ قاعيدالارىن حالىقارالىق مەديتسينالىق پراكتيكادا جاقسى زەرتتەلگەن پرەپاراتتاردى تىركەۋدى جەدەلدەتۋ جانە ۋلترا قىسقا ءومىر سۇرەتىن راديوفارمپرەپاراتتارعا ارنالعان ۇلتتىق ءراسىم اياسىندا ساراپتاما جۇرگىزۋ جونىندە وزگەرتۋ قاجەت دەپ سانايمىن», دەپ قوستى اينۇر ارعىنبەكوۆا.
قىرمىزى جۇماعاليقىزى,
ەۇۋ ستۋدەنتى
