قىمباتتى وتانداستارىم!
وزدەرىڭىزگە ءمالىم, 26 ءساۋىر كۇنى قازاقستان رەسپۋبليكاسى پرەزيدەنتىنىڭ سايلاۋى وتەدى. حالقىمىز بۇل جونىنەن جان-جاقتى حاباردار. قولداۋشىلار مەن كانديداتتار وبلىستاردا بولىپ, جۇرتشىلىقپەن جۇزدەستى. بۇكىلحالىقتىق سايلاۋ – ءبىزدىڭ كونستيتۋتسيامىزدا, ارنايى زاڭىمىزدا كورىنىس تاپقان اسا ماڭىزدى ساياسي ءىس-شارا. سايلاۋ ارقىلى ازاماتتارىمىز, بىرىنشىدەن, ءوزىنىڭ كونستيتۋتسيالىق قۇقىعىن جۇزەگە اسىرادى, ەكىنشىدەن, ەل باسقارۋ ءىسىنە تىكەلەي قاتىسادى. ءاربىر ازامات وزىنە ۇنايتىن, ساياساتىن ءتۇسىنەتىن, حالىقتى العا باستاي الادى دەپ سەنەتىن كانديداتقا داۋىس بەرەدى. بۇل – الەمدىك قوعامداستىق وكىلدەرىنىڭ نازارىن اۋداراتىن ەل ومىرىندەگى ەلەۋلى وقيعا. سايلاۋدى باقىلاۋ ءۇشىن ەلىمىزگە 1 مىڭنان استام بايقاۋشى, 200-گە جۋىق شەتەلدىك اقپارات قۇرالدارىنىڭ وكىلدەرى كەلەدى. ولاردىڭ الدىندا ءبىز ىنتىماعىمىزدى كورسەتۋىمىز كەرەك. حالىق نەعۇرلىم بەلسەنە قاتىساتىن بولسا, سوعۇرلىم ەلىمىزدىڭ بىرلىگى نىعايادى, بولاشاققا دەگەن سەنىمى بەكي تۇسەدى. بارشاڭىزدى سايلاۋعا قاتىسىپ, داۋىس بەرۋگە شاقىرامىن.
