ەكولوگيا جانە تابيعي رەسۋرستار ءمينيسترى ەرلان نىسانباەۆتىڭ ايتۋىنشا, وتكەن جىلى تابيعاتتى قورعاۋ مەكەمەلەرىنىڭ ماتەريالدىق-تەحنيكالىق بازاسىن جاڭارتۋ ءۇشىن 25 ءورت ءسوندىرۋ ماشيناسى, 51 شاعىن ورمان پاترۋلدىك كەشەنى, 154 تراكتور, 73 پاترۋلدىك ماشينا, سونداي-اق 655 باسقا دا جابدىقتار ساتىپ الىنعان.
«ورمان جانە تابيعاتتى قورعاۋ مەكەمەلەرىندە تەحنيكالىق جاراقتاندىرۋدىڭ جەتكىلىكسىزدىگىن اتاپ ءوتۋ قاجەت. ورمان ءورتىن ءسوندىرۋ ستانساسىنىڭ سانى ستاندارت بويىنشا 729 بولۋعا ءتيىس. بىزدە بارى – 254, ولاردىڭ باسىم بولىگى وتكەن عاسىردىڭ 60-70-جىلدارىندا سالىنعان. ورمان ءورتىن ءسوندىرۋ ستانسالارىندا 1145 تەحنيكا بار, ونىڭ 510-ى عانا جۇمىس ىستەۋگە جارامدى, جارتىسىنان استامى اقاۋلى. سونىمەن قاتار ۇشقىشسىز ۇشۋ اپپاراتتارىنىڭ جەتىسپەۋشىلىگى (154 ورمان جانە تابيعاتتى قورعاۋ مەكەمەلەرىنە بارلىعى 99 دانا بەرىلگەن) ورمانداردى تولىعىمەن اەروۆيزۋالدى تەكسەرۋگە مۇمكىندىك بەرمەيدى. مىسالى, «سەمەي ورمانى» تابيعي رەزەرۆاتىندا بىردە-ءبىر ۇۇا جوق», دەدى مينيستر.
ورمان شارۋاشىلىقتارىنىڭ بالانسىندا ورتتەردى ءسوندىرۋ ءۇشىن 275 ءورت ءسوندىرۋ ماشيناسى قاراستىرىلعان, بۇل قولدانىستاعى نورمانىڭ شامامەن 111%-ىن قۇرايدى. الايدا ماشينالاردىڭ 198-ءى نەمەسە 72%-نىڭ توزىعى جەتكەن جانە ەسەپتەن شىعارىلۋعا ءتيىس. جابدىقتاۋ ماسەلەسى دە وزەكتى.
ءوز كەزەگىندە «Amanat» پارتياسىنىڭ حاتشىسى ەرجان جىلقىباەۆ جوعارى اۋديتورلىق پالاتا جۇرگىزگەن توتەنشە جاعدايلار مينيسترلىگىنىڭ اۋديت قورىتىندىلارىنا نازار اۋداردى. الماتى, باتىس قازاقستان جانە شىعىس قازاقستان وبلىستارىنىڭ جەكەلەگەن ەلدى مەكەندەرىندەگى ءورت ءسوندىرۋ بەكەتتەرىنىڭ ءورتتى سوندىرۋگە قاتىسپاعان جاعدايلارى تىركەلدى.
«وعان سەبەپ ماشينالاردىڭ ىستەن شىعۋى جانە جانارمايدىڭ بولماۋى. قازىرگى ۋاقىتتا ەل كولەمىندە تجم قاراماعىندا بارلىعى 432 ءورت ءسوندىرۋ دەپوسى بار, ونىڭ ىشىندە 172-ءسى (39%) كۇردەلى جوندەۋدى قاجەت ەتەدى, 28-دە (6%) عيماراتتار اپاتتى جاعدايدا. ەلىمىزدە قوسىمشا 121 ءورت ءسوندىرۋ دەپوسىن سالۋ قاجەت. ءوز كەزەگىندە ءورت ءسوندىرۋ قىزمەتتەرى تەحنيكالىق جابدىقتاۋدى تەك جەكەلەگەن پوزيتسيالار بويىنشا جۇزەگە اسىرادى, سونداي-اق پايدالانۋ مەرزىمى وتكەن جانە پايدالانۋعا جارامسىز ماتەريالدىق زاتتار ەسكەرىلەدى. وسىلايشا, ءورت ءسوندىرۋ قىزمەتتەرىن جابدىقتاۋدىڭ دەكلاراتسيالاناتىن دەڭگەيى ولاردىڭ شىنايى جاعدايىن كورسەتپەيدى», دەدى ە.جازىقباەۆ.
جابدىقتاۋ ماسەلەسىنىڭ ولقىلىعىنان بولەك, ورمان شارۋاشىلىقتارى جالاقىنىڭ تومەندىگىنە بايلانىستى كادر تاپشىلىعىن قاتتى سەزىنىپ وتىر. وسى ماسەلەنى كوتەرگەن قوعام قايراتكەرى ەرمەك ابىلعازيەۆ: «كاتونقاراعاي ۇلتتىق پاركى قىزمەتكەرلەرىنىڭ جالاقىسى تومەن, سەبەبى جۇرگىزۋشىلەر, تراكتورشىلار, تازالاۋشىلار ازاماتتىق قىزمەتشىلەر ساناتىنا جاتپايدى. اۋىلدىق جەرلەردە جۇمىس ىستەگەنى ءۇشىن 25% ۇستەمەاقى الۋعا قۇقىلى ەمەس, مەديتسينالىق جاردەماقى دا جوق. ورتا ەسەپپەن 80 مىڭ تەڭگە قولعا تۇسەدى, بۇل كادرلاردىڭ تۇراقتاماۋىنا بىردەن-ءبىر سەبەپ. اسىرەسە ورمان ارالايتىن ينسپەكتورلار مەن ورمان شەبەرلەرى جوقتىڭ قاسى», دەدى.
پارتيالىق باقىلاۋ كوميتەتىنىڭ جۇمىس توبى «سەمەي ورمانى» جانە «ەرتىس ورمانى» رەزەرۆاتتارىمەن بىرگە كاتونقاراعاي ۇلتتىق پاركىنە جۇمىس بابىمەن بارعان ەدى. مۇندا دا سول ماسەلەلەر الدان شىقتى – جالاقى تومەن, ماماندار تاپشى, ينفراقۇرىلىم ءوز دەڭگەيىندە دامىماي وتىر.
«جوعارى وقۋ ورىندارىن بىتىرگەن جاس ماماندار شالعايداعى ورمان شارۋاشىلىقتارىنا جۇمىسقا ورنالاسۋعا ىنتالى ەمەس, ويتكەنى ولارعا باسپانا مەن جايلى ءومىر ءسۇرۋ جاعدايلارىن ۇسىنۋعا مۇمكىندىك جوق. جەرگىلىكتى كادرلاردى ۇستاپ قالۋ ءۇشىن سالادا جۇمىس ىستەيتىن جەرگىلىكتى جاس ماماندارعا جانە جالپى جاستارعا اۋدان اكىمدىكتەرىنەن اۋداندا سۇرانىسقا يە ماماندىقتارعا ءبىلىم بەرۋ گرانتتارىن ءبولۋ, بىلىكتىلىكتى ارتتىرۋ كۋرستارىن ۇيىمداستىرۋ, تۇرعىن ءۇي, جۇمىس ورىندارىن بەرۋ تاجىريبەسىن كەڭەيتۋ قاجەت», دەدى پارتيالىق باقىلاۋ كوميتەتىنىڭ توراعاسى پاۆەل كازانتسەۆ.
كوميتەت مۇشەلەرى ورتالىق جانە جەرگىلىكتى اتقارۋشى ورگانداردىڭ اتىنا بىرقاتار ۇسىنىم قابىلدادى, ونىڭ ىشىندە: ورمان شارۋاشىلىقتارىنداعى ءورت وشاقتارىن ەرتە انىقتاۋ جۇيەلەرىن پايدالانۋدى كەڭەيتۋ, ەڭبەكاقى تولەۋ ۇلگىسىن اۋىستىرۋ, ورمان شارۋاشىلىقتارى ءۇشىن قىزمەتكەرلەرىنە تۇرعىن ءۇي ساتىپ الۋعا رۇقسات بەرۋ, مونيتورينگكە پارتيالىق باقىلاۋ بەكەتتەرىن تارتۋ جانە باسقالار. سونىمەن قاتار كوميتەت توراعاسى ورمان ورتتەرى تۋىنداعان جاعدايدا رەسپۋبليكالىق شتابتى ۋاقتىلى قۇرۋدىڭ ماڭىزدىلىعىنا ەرەكشە نازار اۋداردى.
«رەسپۋبليكالىق دەڭگەيدە شتاب قازىردىڭ وزىندە بولۋى, ول قاجەت بولعان جاعدايدا 1-2 ساعاتتىڭ ىشىندە كوماندانى جۇمىلدىرۋعا ءتيىس. سەبەبى ستاندارتتى رەجىمدەگى ۆەدومستۆوارالىق ءوزارا ءىس-قيمىل ءاردايىم كولدەنەڭ سۇراقتار تۋعىزادى. سۋ تاسقىنى بولعان كەزدە پرەزيدەنت دۇرىس شەشىم قابىلدادى, توتەنشە وكىلەتتىكتەرى بار شتاب قۇرىلدى. وسىلايشا, قازىر دە ورتكە قارسى جۇمىستار بويىنشا توتەنشە شتاب قۇرۋ كەرەك. مەملەكەت باسشىسىنىڭ نۇسقاۋىن كۇتىپ وتىرۋدىڭ قاجەتى جوق», دەپ تۇيىندەدى پ.كازانتسەۆ.
