چايكوۆسكي اتىنداعى مۋزىكالىق كوللەدجىنىڭ تۇلەگى شەكارا اسىپ, تاجىريبە جيناپ, قازىر تاياۋ شىعىستاعى بەدەلدى وركەسترلەرگە ساباق بەرەدى. 9 جاسىنان مۋزىكاعا قۇمار الت اسپابىنىڭ شەبەرى وماننىڭ ايدىك ونەر ورداسىندا شاكىرت دايارلايدى. ماسكاتتا ەكى جىلداي ەڭبەك ەتكەن مۋزىكانت جەرگىلىكتى جاس ونەرپازدارعا بىردەن ۇناپتى.
«مەنى وماندا جىلى شىرايمەن قارسى الدى. كەلە سالعانىمدا وقۋعا قۇشتار ستۋدەنتتەر بىردەن ساباق كەستەلەرىنە دارىستەرىمدى سۇراپ ەنگىزىپ, دەرەۋ ىسكە كىرىسىپ كەتتىك. بۇل جاقتىڭ مۋزىكانتتارى قازاقستاننىڭ قايدا ەكەنىن, ۇلكەن تەرريتورياعا يە ەكەنىن بىلەدى. بىراق بارىپ كورمەگەن. مەن دە قوناقجايلىق تانىتىپ, ەلگە شاقىرىپ تۇرامىن. اراسىندا ەلىمىز تۋرالى تانىمدىق ۆيدەولار كورسەتەمىن. ولار تۇمسا تابيعاتىمىزعا قاتتى قىزىعادى», دەيدى ومان سۇلتاندىعى فيلارمونيا وركەسترىنىڭ وقىتۋشىسى ساكەن بەرعاليەۆ.
ومان سۇلتانىنىڭ قولداۋىمەن قۇرىلعان وركەستردە 300-گە جۋىق ادام ونەر كورسەتەدى. سونىڭ ىشىندەگى قوڭىر ءۇندى الت اسپابىندا 20-عا جۋىق شاكىرت ساكەننەن ساباق الادى. «ماسكەۋ, مانچەستەر, ۆەنادا ونەر كورسەتىپ, شەبەرلىگىن شىڭداعان پەداگوگتەن ۇيرەنەرىمىز كوپ», دەيدى ولار.
«ۇستازىمنىڭ كەيىنگى ءبىر جىلدا بەرگەن ساباعى – مەن ءۇشىن ۇلكەن مارتەبە ءارى زور قۇرمەت. وسى ۋاقىت ىشىندە اسپاپتاعى ورىنداۋشىلىق شەبەرلىگىم جىلدام شىڭدالىپ, قاتەلىكتەرىم تۇزەلدى. مۇنداي جەتىستىككە تەز جەتكەنىمە كەيدە ءوزىم دە تاڭعالامىن. ۇستازىم ايتپاقشى, تاباندى ەڭبەك باستى قاعيداما اينالدى», دەيدى وركەستر مۇشەسى اسيل ءال-حاساني.
بۇگىندە وتانداسىمىزدىڭ وقۋشىلارى گەرمانيادا, تاياۋ شىعىستىڭ ءبىرشاما ەلىندە ونەر كورسەتىپ ۇلگەرگەن. رەپەرتۋارلارىندا گايدن مەن مەندەلسوننىڭ شىعارمالارىمەن قاتار اراب-پارسى حالىقتارىنىڭ تۋىندىلارى بار. بولاشاقتا قازاق كلاسسيكتەرىنىڭ كومپوزيتسيالارى دا ومان كونتسەرتتەرىندە ورىندالۋى بەك مۇمكىن.
ء«بىزدىڭ ەلدە دە تالانتتى كومپوزيتورلار جەتەرلىك. مۇمكىندىگىنشە ولاردىڭ دا مۋزىكاسىن شاكىرتتەرىمە ۇيرەتۋگە تىرىسامىن. ولارعا نوتالارىن بەرگەن ساتتەن-اق زور قىزىعۋشىلىقپەن كوڭىل اۋدارادى. ءوزىم ويناعانىمدا ۇيىپ تىڭدايدى. ءتىپتى ۇيرەنىپ الۋعا تالاپتاناتىندار بار», دەيدى ساكەن.
ومانداعى قازاق وقىتۋشىسى شاكىرتتەرىنىڭ ونەرگە دەگەن ىقىلاسىن ودان ءارى ەسەلەۋدى ماقسات ەتەدى. قازاق مۋزىكا مەكتەبى وكىلىنىڭ ءبىلىمى ءالى تالاي تالانتتىڭ باعىن اشارى ءسوزسىز.
