جاڭا جەلىنىڭ اشىلۋ سالتاناتىنا وبلىس اكىمى قۇمار اقساقالوۆ, بەلارۋس رەسپۋبليكاسىنىڭ ونەركاسىپ ءمينيسترى الەكساندر روگوجنيك, اتالعان ەلدىڭ قازاقستانداعى توتەنشە جانە ۋاكىلەتتى ەلشىسى پاۆەل ۋتيۋپين, «متز» ااق باس ديرەكتورى ۆيتالي ۆوۆك, سونداي-اق ەكى ەلدىڭ بىرنەشە سالالىق مينيسترلىگىنىڭ وكىلدەرى قاتىستى. جيىندا جاڭا تسەحتىڭ اشىلۋى ەلىمىزدىڭ ونەركاسىپ سالاسىنداعى ەلەۋلى وقيعا ەكەنى, زاۋىت بۇدان بىلاي ءوندىرىستىڭ جەرگىلىكتى ۇلەسىن بىرتە-بىرتە ارتتىرا بەرەتىنى ايتىلدى. بۇعان دەيىن سىرتتان تۇگەلدەي بولشەك تۇرىندە كەلەتىن ايگىلى تراكتوردىڭ ءبىرسىپارا بولشەگى از ۋاقىتتان سوڭ قوستانايدا جاسالاتىن بولادى. مامانداردىڭ ايتۋىنشا, تراكتوردىڭ كابيناسى جالپى ءوندىرىستىڭ 40 پايىزىن قۇرايدى. ال ءۇشىنشى, ءتورتىنشى كەزەڭدە بولشەك وندىرىسىندەگى جەرگىلىكتى قامتۋ ۇلەسىن بارىنشا ارتتىرۋ ماقساتى تۇر.
ء«وندىرىستىڭ كەلەسى كەزەڭدەرىن جۇزەگە اسىرۋ مۇمكىندىگى جان-جاقتى تالقىلانىپ, ابدەن پىسىقتالدى. بولاشاقتا تراكتوردىڭ الدىڭعى بەلدەمەسىن, جەكەلەگەن پلاستيك بۇيىمدارىن, باسقا دا بولشەكتەردى وسىندا شىعارساق دەيمىز. قوزعالتقىش بلوگىن دە جاساۋعا مۇمكىندىك بار. بيىل شويىن قۇياتىن زاۋىت اشىلسا, ماشينالاردىڭ قانداي تۇرىنە دە ساپالى قوزعالتقىش بلوگىن دايىنداپ بەرە الامىز», دەدى وبلىس اكىمى قۇمار اقساقالوۆ.
اۋماعى 10 جارىم مىڭ شارشى مەتر بولاتىن ءوندىرىس الاڭىندا التى بىردەي قۇرال-جابدىق ۋچاسكەسى جۇمىس ىستەپ تۇر. زاماناۋي لازەرلى ستانوك, تەمىر يەتىن اپپارات, ەكى روبوت كەشەنى جانە اۆتوماتتاندىرىلعان بوياۋ كامەراسى بار. جەلىنىڭ بويىنان «بەلارۋس» تراكتورىنىڭ 9 تۇرىنە ارنالعان كوپفۋنكتسيالى امبەباپ كابينالار شىعارىلادى.
«جاڭا جەلى ءوندىرىس قۋاتىنا تولىق كوشسە, جىلىنا 10 مىڭ كابينا شىعارۋعا مۇمكىندىك بار. بۇل مەجەگە ءبىز 2026 جىلى جەتەمىز. ودان بولەك, قازىردىڭ وزىندە تراكتوردىڭ جوعارى قىسىمدى بولشەگىن, كابينانىڭ اياقباسقىشىن ءوزىمىز جاساپ جاتىرمىز. كەلەشەكتە باسقا دا ماڭىزدى بولشەكتەردى ءوندىرۋدى قولعا الامىز», دەيدى «متز-قازاقستان ماشينا جاساۋ زاۋىتى» جشس باس ديرەكتورى ۆالەنتين داشكەۆيچ.
«بەلارۋستىڭ» قوستانايعا ىقىلاسى اۋىپ وتىرعانى تەگىن ەمەس. بىرىنشىدەن, كەيىنگى جىلدارى وڭىردە ماشينا جاساۋ سالاسى قارقىندى دامىپ كەلەدى. ەكىنشىدەن, وبلىستا ينۆەستيتسيالىق احۋال وتە قولايلى.
«قوستاناي وبلىسى لوگيستيكالىق ورنالاسۋى جاعىنان دا اسا ءتيىمدى. بۇل الاڭدى ەكسپورت كوزى دەپ بىلەمىز. تەك تراكتوردى ەمەس, كومباين, ءورت ءسوندىرۋ ماشينالارى سياقتى تەحنيكالاردى دا وسىندا قۇراستىرىپ, جيناۋ ويىمىزدا بار. قازاقستان مەن بەلارۋس اراسىنداعى تاۋار اينالىمى جىلدان-جىلعا ارتىپ كەلەدى. قازىر ول ميلليارد دوللاردان استى. ونىڭ ىشىندە, اسىرەسە, ونەركاسىپتىك كووپەراتسيا جاقسى دامىعان», دەيدى بەلارۋس رەسپۋبليكاسىنىڭ ونەركاسىپ ءمينيسترى الەكساندر روگوجنيك.
يندۋستريالىق دامۋ كوميتەتىنىڭ توراعاسى ازامات پانباەۆتىڭ ايتۋىنشا, بۇگىندە قازاقستان مەن بەلارۋس رەسپبۋليكاسى جالپى قۇنى 85 ملن دوللار بولاتىن بىرلەسكەن توعىز جوبانى قولعا الىپ وتىر. سونىڭ جەتەۋى تولىقتاي ىسكە اسىرىلعان.
«جوبالار نەگىزىنەن ماشينا جاساۋ سالاسىنا قاتىستى. ماسەلەن, تراكتور زاۋىتىن ىسكە قوسۋعا 7,5 ميلليارد تەڭگە تىكەلەي ينۆەستيتسيا سالىندى. ونىڭ ءوندىرىس قۋاتى ارتقان سايىن, سالىق ءتۇسىمى دە ەسەلەنە بەرەدى. بۇل كاسىپورىننىڭ بيۋدجەتكە تولەمى شامامەن ءتورت ەسە ۇلعايادى دەگەن بولجام بار», دەيدى كوميتەت توراعاسى.
بۇگىندە ەلىمىزدە «بەلارۋس» تراكتورلارىن قۇراستىراتىن 3 كاسىپورىن جۇمىس ىستەيدى. ماماندار جاڭا تسەح ءوندىرىستى لوكاليزاتسيالاۋعا جانە تۇتىنۋشى ءۇشىن ءونىم قۇنىن تومەندەتۋگە ۇلكەن مۇمكىندىك بەرەدى دەپ وتىر. قوستانايدا شىعارىلعان كابينالار وتاندىق وندىرىستە پايدالانىلادى. سونىمەن قاتار ءدال وسىنداي تراكتور شىعارىپ جاتقان «قازاگرويننوۆاتسيالىقكورپوراتسيا» جانە «سەماز» كومپانيالارىنا جىبەرىلەتىن بولادى.
«كەزىندە ەكى بىردەي كەڭشاردا ءبىراز جىل باس ينجەنەر بولىپ جۇمىس ىستەدىم. «بەلارۋس» تراكتورلارىنىڭ وتە سەنىمدى تەحنيكا ەكەنىنە سول جىلدارداعى ەڭبەك تاجىريبەمدە كوز جەتكىزدىم. جاڭا ءوندىرىس ورنى وبلىس ەكونوميكاسىنىڭ دامۋىنا ۇلكەن سەرپىن اكەلەدى. بۇل تراكتورلار ءبىزدىڭ ەگىن القاپتارىمىزدا بۇرىننان جۇمىس ىستەپ جاتىر. ءوزىن وتە سەنىمدى تەحنيكا رەتىندە كورسەتتى. كەيىنگى 30 جىلدىڭ ىشىندە «بەلارۋس» تراكتورلارى ەداۋىر جەتىلدىرىلدى. زاۋىتتىڭ ۇنەمى ساپا ماسەلەسىن ءبىرىنشى كەزەككە قوياتىنى قۋانتادى. مۇنى وسى تراكتوردىڭ يگىلىگىن كورىپ جاتقان جەرگىلىكتى شارۋالار دا راستاپ بەرەدى. سوندىقتان ءبىز وبلىس بيۋدجەتى ەسەبىنەن بۇل زاۋىتتى ەلەكتر ەنەرگياسى, گاز, سۋ, باسقا دا كوممۋنيكاتسيا قاجەتتىلىگىمەن قامتاماسىز ەتىپ, ۇلكەن قولداۋ كورسەتتىك. ينفراقۇرىلىمعا جۇمسالعان شىعىن مەملەكەتتىك سالىق ءتۇسىمى رەتىندە ەسەلەنىپ قايتادى», دەيدى وبلىس اكىمى قۇمار اقساقالوۆ.
زاۋىت «بەلارۋس» تراكتورلارىنىڭ 11-دەن باستالىپ, 364 ات كۇشىنە دەيىن تەڭ كەلەتىن 20 ءتۇرىن شىعارادى. جالپى, «متز-قازاقستان ماشينا جاساۋ» سەرىكتەستىگىندە جىلىنا 3 مىڭ تراكتور قۇراستىرۋ كوزدەلگەن.
سالتاناتتى ءىس-شارادان كەيىن تاراپتار بىرقاتار ەكىجاقتى ءتيىمدى كەلىسىمشارتتارعا قول قويدى. قول قويۋ ءراسىمى بارىسىندا ەندى مىرجاقىپ دۋلات ۇلى اتىنداعى قوستاناي ينجەنەرلىك-ەكونوميكالىق ۋنيۆەرسيتەتىنىڭ ستۋدەنتتەرى «متز-قازاقستان» زاۋىتىندا تاجىريبەدەن وتەتىنى ايتىلدى. ايتپاقشى, مينسكىدەن كەلگەن «متز» ااق باسشىلارى وبلىس اكىمىنە كونۆەيەردەن جاڭا شىققان «بەلارۋس» تراكتورىن تارتۋ ەتتى. سۋ جاڭا قۋاتتى تەحنيكا قوستانايداعى وقۋ ورىندارىنىڭ بىرىنە بەرىلەتىن بولادى.
قوستاناي وبلىسى
