سالتاناتتى ءىس-شارانىڭ باسىندا مەملەكەتتىك ءانۇران ورىندالدى. ودان كەيىن وبلىس اكىمىنىڭ ورىنباسارى رينات مۇحامەتقالي ەلدىگىمىز بەن تۇعىرلى تۇتاستىعىمىزدى ايشىقتايتىن مەملەكەتتىك رامىزدەر كۇنىمەن قۇتتىقتاپ, كوپشىلىككە جىلى لەبىزىن ارنادى.
«اسپان تۇستەس بايراعىمىز بەن ەلتاڭبامىزدىڭ ءاربىر ەلەمەنتىندە جانە ءانۇرانىمىزدىڭ ءاربىر سوزىندە حالقىمىزدىڭ وتانعا دەگەن ماحابباتى مەن ارمان-مۇراتى جاتىر. مەملەكەتتىك رامىزدەر – رۋحىمىزدى اسقاقتاتىپ, كەۋدەمىزگە نۇر قۇياتىن, باقىتقا جەتەلەپ, ومىرگە قۇشتار ەتەتىن ەرەكشە قاسيەتكە يە. بىرتۇتاستىعىمىزدى ساقتاپ تۇرۋ ءۇشىن ءبىز ارقاشان ءوزىمىزدىڭ مەملەكەتتىك, ۇلتتىق مۇددەمىزدى, تاۋەلسىزدىگىمىزدى قورعاۋعا دايىن بولۋىمىز قاجەت. مەملەكەت باسشىسى قاسىم-جومارت توقاەۆ ۇلتتىق قۇرىلتايدىڭ ءۇشىنشى وتىرىسىندا تاۋەلسىزدىك, وتانشىلدىق, بىرلىك, ىنتىماق, ادىلدىك جانە جاۋاپكەرشىلىك, زاڭ جانە ءتارتىپ, ەڭبەكقورلىق پەن كاسىبي بىلىكتىلىك, جاسامپازدىق ءھام جاڭاشىلدىق دەگەن ۇعىمداردىڭ ءمانىن تارقاتا كەلىپ, «ۇلتىمىز وسى يدەيالىق نەگىزدەردى باسشىلىققا السا, بولجاۋسىز جانە قارقىندى دامىپ كەلە جاتقان ءححى عاسىردان لايىقتى ورنىن تابادى», دەگەن ەدى. وتاندى ءسۇيۋ, تۋعان جەرگە, ەلگە, حالقىڭا دەگەن سۇيىسپەنشىلىك, پەرزەنتتىك ماحاببات ەلىڭنىڭ رامىزدەرىن تانۋدان باستالادى. سونىمەن قاتار مەملەكەتتىك ءرامىزدىڭ اجىراماس, ەنشىلەس بولىگى – مەملەكەتتىك ءتىل. بۇگىن ءبىز وتانعا دەگەن سۇيىسپەنشىلىگىن كۇندەلىكتى ەڭبەگىمەن, ناقتى جەتىستىكتەرىمەن دالەلدەي بىلگەن, وسىلايشا حالىقتىڭ ىقىلاسىنا بولەنگەن ناعىز قازاق پاتريوتتارىنىڭ بەينەسىن ناسيحاتتاپ جۇرگەن ازاماتتاردى ماراپاتتايمىز. بارشاڭىزدى مەملەكەتتىك رامىزدەر كۇنىمەن قۇتتىقتايمىن. كوك بايراعىمىز تۇعىرىنان ماڭگى تۇسپەسىن, ەلىمىزدىڭ مارتەبەسى اسقاقتاي بەرسىن!» دەدى رينات زاكي ۇلى.
بۇدان سوڭ كەزەك جىل پاتريوتتارىن ماراپاتتاۋ راسىمىنە بەرىلدى. ءوڭىردىڭ دامۋىنا, ءوسىپ-وركەندەۋىنە اتسالىسىپ جۇرگەن عىلىم, ءبىلىم, مادەنيەت, سپورت, مەديتسينا, ۆولونتەرلىك, ونەركاسىپ, اۋىل شارۋاشىلىعى, تەحنولوگيا, بيزنەس سالاسىنىڭ وكىلدەرى جانە ەرلىك ىسىمەن كوزگە تۇسكەن ازاماتتار 11 اتالىم بويىنشا ماراپاتتالىپ, ارنايى سىيلىقتارعا يە بولدى.
ەڭبەگى ەلەنىپ, ەسىمى ارداقتالعان قۋانىش يەلەرىنىڭ ءبىرى – جەرگىلىكتى مال شارۋاشىلىقتارىنا مال باسىن اسىلداندىرۋعا, ەتتى ءىرى قارا تۇقىمىنىڭ بابىن تابۋعا عىلىمي كەڭەس بەرىپ, تەحنولوگيا جولىن كورسەتىپ جۇرگەن جاس عالىم ينديرا ايتجانوۆا.
«مەملەكەتتىك رامىزدەر كۇنى مەرەكەسىنە وراي وبلىس اكىمىنىڭ ارنايى ديپلومىن الىپ, قۋانىپ قالدىق. ءانۇرانىمىز ايتىلعاندا تولقىمايتىن قازاق جوق شىعار. مەملەكەتتىك رامىزدەردى ءبىز ءوز وتانىمىزدى ءسۇيۋ, ءوز وتانىمىزدىڭ دامۋى ءۇشىن ادال ەڭبەك ەتۋ ارقىلى قۇرمەتتەيمىز», دەيدى ينديرا.
مەرەكەلىك ءىس-شارادا تابيعي اپاتقا قارسى كۇرەستە بار كۇش-جىگەرىن جۇمىلدىرعان, سۋ تاسقىنىنا توسقاۋىل قويۋعا بەلسەندى ارالاسقان ۇجىمداردىڭ دا ەسەلى ەڭبەگى ەلەۋسىز قالمادى. ءىىم شىراقبەك قابىلباەۆ اتىنداعى قوستاناي اكادەمياسى, قارۋلى كۇشتەرىنىڭ 99260 اسكەري ءبولىمى, ۇلتتىق ۇلاننىڭ 6697 اسكەري ءبولىمى, وبلىستىق پد, «نادەجدا پليۋس kst» قوعامدىق بىرلەستىگى, «بارىس», «رەگيون-10», «دوس» ەرىكتى ىزدەۋ-قۇتقارۋ جاساقتارى, احمەت بايتۇرسىن ۇلى اتىنداعى ۋنيۆەرسيتەت, وبلىستىق قحا, وبلىستىق جرو, «قوستاناي-سۋ» مەكەمەسى جانە تاعى باسقا دا ۇجىمدار قالا اكىمى مارات جۇندىباەۆتىڭ قولىنان ماراپات الدى. سونىمەن قاتار ءار اۋدان, اۋىلداعى جاستار رەسۋرستىق ورتالىعى, اكىمدىك قىزمەتكەرلەرى, جەكە كاسىپكەرلەر دە وبلىس اكىمىنىڭ گراموتاسىن يەلەندى.
ساحنا تورىندە تۋعان ولكەنىڭ قادىر-قاسيەتىن تەرەڭ تۇيسىندىرەتىن كورىنىستەر كوڭىلدى باۋراپ, رۋحتى قاناتتاندىراتىن ءان-جىر اۋەلەپ, كۇي كۇمبىرلەگەن ونەر دۋمانى سالتاناتتى ءىس-شارانىڭ كوركىن قىزدىرا ءتۇستى.
قوستاناي وبلىسى
