وتكەن جولى ۇيلەردىڭ ساپالى بولىپ سالىنىپ جاتقانىن, كولەمى 80 شارشى مەتر ەكەنىن, جەر كولەمى 10 سوتىق بولاتىنىن, ءتىپتى اۋلاسىنا ورنەكتاس توسەلىپ, دۋالى ەكى مەترگە جۋىق قورشاۋمەن قورشالاتىنىن دا ايتقانبىز. ونىڭ ۇستىنە ءۇيدىڭ ىشىنە سانۋزەل ورناتىلادى, ىستىق, سۋىق سۋلار قالالىق كارىز قۇبىرلارىمەن كەلەدى. شايىندى سۋلار سەپتيك ارقىلى شىعارىلادى. سوندىقتان كوپ ادامعا ارمان بولعان جايلى جەر ۇيلەر 700 وتباسىن قۋانىشقا كەنەلتەرى ءسوزسىز.
قازىر بۇل اۋدانعا جاڭا بالاباقشا تۇرعىزۋ دا قولعا الىنىپ جاتىر. 90 بوبەككە شاقتالعان بالاباقشانىڭ جوباسى كوز سۇرىندىرەدى, تەك ەندى ونى سالۋدى مىندەتىنە العان «ميراس Group» جشس قۇرىلىس كومپانياسى جوبادان اۋىتقىماي جايناتىپ سالىپ شىقسا بولعانى. بۇل قۇرىلىسقا بيۋدجەتتەن 500 ملن تەڭگە ءبولىنىپتى. «قۇرىلىس جۇمىسىن بيىلعى قىركۇيەكتىڭ بىرىندە اياقتايمىز. قازىر جەردەگى جۇمىستار جاسالىپ جاتىر. ازىرگە بەس تەحنيكا مەن ون ادام تارتىلعان. قۇرىلىس كولەمى ارتقان كەزدە بۇل جەردە 50 ادام جۇمىس ىستەيتىن بولادى. بالاباقشانىڭ قابىرعالارى گازبلوك كىرپىشتەردەن تۇرعىزىلادى», دەدى قۇرىلىس ۋچاسكەسىنىڭ باستىعى فارحات سەيپىلوۆ.
جاڭا اۋداندا سالىنا باستاعان 100 ءۇيدىڭ قۇرىلىسى 90 پايىزعا اياقتالدى. بەسىنشى ماۋسىمدا ونىڭ 50-ءىن پايدالانۋعا بەرەدى.
بولاشاقتا جاڭا اۋدانعا مەكتەپ, مادەنيەت ۇيلەرى دە سالىنادى. جاڭا كەنتتى اباتتاندىرۋ جۇمىسىنا دا بارلىق قالالىق تارتىلۋدا. «تازا قازاقستان» رەسپۋبليكالىق اكتسياسى اياسىندا وبلىس اكىمى عاۋەز نۇرمۇحامبەتوۆتىڭ ءوزى قاتىسىپ, قۇرىلىس كومپانيالارىنىڭ باسشىلارىمەن بىرگە جاڭا ساياباققا اعاشتار وتىرعىزدى. قازىر اكىمنىڭ جۇمىسىنداعى باستى پريوريتەت تە وسى اۋدان.
وسىنداعى تاماشا ۇيلەردىڭ نەگىزگى بولىگى ەلىمىزدەگى ءتۇرلى ەتنوس وكىلدەرىنە بۇيىرعالى وتىر.
بۇل جاعداي وسىنداي سىن ساعاتتا جۇرتشىلىقتى بىرىكتىرىپ, حالىقتىڭ تۇتاستىعىن ودان ءارى نىعايتا تۇسەرى ءسوزسىز. تۇرعىندار قيىن كەزەڭدە قولتىقتان دەمەگەن مەملەكەتكە شىنايى العىسىن ءبىلدىرىپ وتىر.
جاڭا اۋدان قۇرىلىسى وسىلاي ءجۇرىپ جاتسا 98 وتباسىنا قايتالاما نارىقتان ۇيلەر ساتىپ اپەرىلدى. وبلىس بويىنشا جالپى سانى 3 898 ءۇي زارداپ شەككەن. سونىڭ 1 720-سىن باعالاۋ كوميسسياسى قالپىنا كەلتىرىلمەيدى دەپ شەشتى. قالادا وسىنىڭ 700-نە جاڭا ۇيلەر سالىنىپ جاتقانىن ايتتىق, ودان باسقا جۇزگە جۋىق وتباسىنا وزدەرى قالاعان پاتەرلەر ساتىپ اپەرىلدى. الايدا ءالى دە مىڭعا جۋىق وتباسىن كۇزگە دەيىن ۇيمەن قامتاماسىز ەتۋ جۇمىسى الدا تۇر.
وبلىس بويىنشا زارداپ شەككەن ۇيلەر اراسىنان 2 178 ءۇي قالپىنا كەلتىرۋگە بولادى دەپ شەشىلگەن. پەتروپاۆلدىڭ ونداي ۇيلەرى – ويقالا, تەرى زاۋىتى, زارەچنىي شاعىن اۋداندارى مەن تەپليچنىي, پريبرەجنىي اۋىلدارىنداعى 270 ءۇي. بۇل ۇيلەرگە اۋدانداردا قۇرىلعان مەحبريگادالار جوندەۋ جۇمىستارىن جۇرگىزۋدە.
بۇدان باسقا 1055 ءۇيدىڭ قوجايىندارى شاڭىراقتارىن ءوز كۇشىمەن جوندەۋگە شەشكەن. ولارعا شىعىننىڭ كولەمى انىقتالىپ, بيۋدجەتتەن قاراجاتتاي كومەك بەرىلەتىن بولادى.
جالپى, حالىق تاسقىننىڭ ابىگەرىنەن ارىلىپ, قازىر قالىپتى تىرلىككە جاپپاي كوشكەن. مامىردىڭ قارا سۋىقتارى شىققاننان بەرى جەمىس-جيدەكتەرىن, كوكونىستەرىن وتىرعىزۋعا اسىققاندار دا كوپ. تەك قالا كوشەلەرىنىڭ ابدەن تالقانى شىققان جولدارى اشۋ-ىزانى تۋعىزادى. بيلىكتىڭ قولى وعان دا جەتەر دەگەن ءۇمىت بار. جايلى ءومىر, جارقىن تۇرمىسقا نە جەتۋشى ەدى.
سولتۇستىك قازاقستان وبلىسى
