فوتو: استانا قالاسى اكىمدىگىنىڭ ءباسپاسوز قىزمەتى
ۇلى دالانىڭ باتىرلارىن ناسيحاتتاپ, قازاقتىڭ ەتنو-ويىندارىن دارىپتەۋ ماقساتىندا وتكىزىلەتىن تۋرنيرگە بىلەگى توقپاقتاي, جاۋىرىنى قاقپاقتاي ەلوردالىق سپورتشىلار باق سىناي الادى.
بىلەكتى باتىرلار سايىستىڭ 5 ءتۇرى بويىنشا ياعني, 1,5 م ۇزىندىقتاعى تەمىردى مويىنعا سالىپ مايىستىرۋ, سالماعى 100 كەلىلىك تاستى مەجەلى قاشىقتىققا دەيىن اپارۋ, 130 كەلى اۋىر بورەنەنى جەلكەگە سالىپ وتىرىپ-تۇرۋ, 200 كەلىلىك جۇك ارتىلعان اربانى سۇيرەۋ, ون كەلىلىك نايزانى قاشىقتىققا لاقتىرۋ سياقتى ەرەكشە سايىس تۇرلەرى بويىنشا سىنعا تۇسەدى.
«بۇل سايىس قىركۇيەك ايىندا وتەتىن V دۇنيەجۇزىلىك كوشپەندىلەر ويىندارىنا استانا قالاسى بويىنشا ىرىكتەۋ كەزەڭى بولىپ سانالادى. ياعني, بەس سايىستىڭ قورىتىندىسى بويىنشا انىقتالعان ۇزدىكتەر الداعى رەسپۋبليكالىق تۋرنيردە باق سىنايدى», دەيدى ۇيىمداستىرۋشىلار
جارىستىڭ اشىلۋ سالتاناتى 2 ماۋسىم كۇنى ساعات 16.00-دە, قاتىسۋشىلاردى تىركەۋ جارىس كۇنى ساعات 14.00-دە جوسپارلانعان.
ايتا كەتەيىك, جالپى جۇلدە قورى ءبىر ميلليون تەڭگەنى قۇرايتىن تۋرنير استانا قالاسى اكىمدىگىنىڭ قولداۋىمەن ەلوردا تورىندە ەكىنشى مارتە وتەدى.
التىناي ابدىش,
ل.ن.گۋميلەۆ اتىنداعى ەۇۋ ستۋدەنتى
