«الماتى قالاسى پروكۋرورىنىڭ ورىنباسارى ن.ج. اۋعانباەۆتىڭ ۇستالعانى تۋرالى اقپارات شىندىققا جاناسپايدى. بۇگىنگى كۇنى ول كەزەكتى ەڭبەك دەمالىسىندا», - دەپ حابارلادى پروكۋراتۋرادان.
ۆەدومستۆو قازاقستان رەسپۋبليكاسى قىلمىستىق كودەكسىنىڭ 274-بابىنا سايكەس كورىنەۋ جالعان اقپارات تاراتقانى ءۇشىن سونداي-اق «بۇقارالىق اقپارات قۇرالدارى تۋرالى» قازاقستان رەسپۋبليكاسى زاڭىنىڭ 25-بابىنا سايكەس شىندىققا سايكەس كەلمەيتىن مالىمەتتەردى تاراتۋ, قازاقستان رەسپۋبليكاسىنىڭ زاڭنامالىق اكتىلەرىندە كوزدەلگەن جاۋاپتىلىققا اكەپ سوعاتىنىن ەسكە سالدى.
الماتى قالاسىنىڭ پروكۋراتۋراسى ازاماتتاردى, باق وكىلدەرىن, الەۋمەتتىك جەلىلەردى پايدالانۋشىلاردى, قازاقستان رەسپۋبليكاسىنىڭ زاڭناماسىن مۇلتىكسىز ساقتاۋعا جانە تەك شىنايى اقپارات كوزدەرىنە عانا سەنۋگە شاقىرادى.
ايتا كەتەيىك, بۇعان دەيىن بۇقارالىق اقپارات قۇرالدارىنىڭ بىرىندە الماتى قالاسى پروكۋرورىنىڭ ورىنباسارى نۇرلان اۋعانباەۆتىڭ قاماۋعا الىنعانى تۋرالى اقپارات تاراعان بولاتىن.
