جىل سوڭىنا دەيىن 3 مىڭ شارشى مەتر الاڭدا ورنالاسقان جاڭا ءبىلىم بەرۋ نىسانىن پايدالانۋعا بەرۋ جوسپارلانىپ وتىر. بۇگىندە نىساننىڭ ىرگەتاسى مەن ءمونوليتتى قاڭقاسىن ورناتۋ جۇمىستارى اياقتالعان. مەكتەپ قاجەتتى ينجەنەرلىك-كوممۋنيكاتسيالىق ينفراقۇرىلىممەن قامتاماسىز ەتىلىپ, قۇرىلىس جانە ءبىلىم بەرۋ سالاسىنداعى سونى تەحنولوگيالارمەن جابدىقتالادى. ۇكىمەت باسشىسى قۇرىلىس جۇمىستارىن بەلگىلەنگەن مەرزىمدە ساپالى جۇرگىزۋدىڭ ماڭىزدىلىعىن باسا ايتتى.
ەلىمىزدە 2024-2025 جىلدار ارالىعىندا ۇلتتىق جوبا بويىنشا بارلىعى 369 مەكتەپ اشۋ جوسپارلانىپ وتىر. اتاپ ايتقاندا, الماتى وبلىسىندا 2024-2025 جىلدارى 53 جايلى مەكتەپ سالىنادى. بيىل 600-دەن 1 500 ورىنعا دەيىنگى سىيىمدىلىعى ءارتۇرلى 26 جايلى مەكتەپتى پايدالانۋعا بەرۋ جوسپارلانعان.
ۇلتتىق جوبانىڭ شارتتارىنا سايكەس, بارلىق جايلى مەكتەپتەر وقۋشىلار مەن پەداگوگتەر ءۇشىن جوعارى قاۋىپسىزدىك شارالارىن, ءتيىستى ينفراقۇرىلىمدى جانە قولايلى جاعدايدى قامتاماسىز ەتە وتىرىپ, بىرىڭعاي ستاندارتقا ساي سالىندى.
پرەمەر-مينيستر جاڭا جوبالار ازىرلەۋدى جانە مەملەكەتتىك ساراپتامادان وتكىزۋدى جەدەلدەتۋدى جانە سالىنىپ جاتقان عيماراتتاردى پايدالانۋعا بەرۋ مەرزىمدەرىنىڭ ساقتالۋىن قاتاڭ باقىلاۋدا ۇستاۋدى تاپسىردى.
«بۇل – پرەزيدەنتتىڭ مەگاجوباسى. ونىڭ ساپالى ءارى ۋاقىتىندا ىسكە اسىرىلۋىن قاتاڭ باقىلاۋعا الۋ قاجەت. جايلى مەكتەپتەردىڭ قۇرىلىسى بالالارىمىزدىڭ ساپالى ءبىلىم الۋىنا بارلىق جاعداي جاساۋعا باعىتتالعان. ۇكىمەت الدىندا 2025 جىلدىڭ سوڭىنا قاراي 740 مىڭ جاڭا وقۋشى ورنىمەن قامتاماسىز ەتۋ مىندەتى تۇر. قۇرىلىس جۇمىستارىن جوعارى قارقىنمەن جۇرگىزۋ قاجەت», دەپ اتاپ ءوتتى و.بەكتەنوۆ.
سونىمەن قاتار پرەمەر-مينيستر قوناەۆ قالاسىن دامىتۋ جونىندەگى ۇزاقمەرزىمدى جوسپارمەن تانىستى. ۇكىمەت باسشىسى سونداي-اق ارنايى ەكونوميكالىق ايماق اۋماعىندا ءىرى جوبالاردى ىسكە اسىرۋ ماسەلەسى بويىنشا الاتاۋ قالاسى اكىمىنىڭ بايانداماسىن تىڭدادى.
پرەزيدەنت قاسىم-جومارت توقاەۆتىڭ تاپسىرماسىنا سايكەس, قوناەۆتىڭ دامۋى جوعارى ەكولوگيالىق, «اقىلدى» قالا تۇجىرىمداماسىنا سايكەس كەلۋگە ءتيىس. ۇكىمەت بەكىتكەن كەشەندى دامۋ جوسپارىندا 2023-2027 جىلدار ارالىعىندا 187 ءىس-شارانى جۇزەگە اسىرۋ كوزدەلگەن. قالانى اباتتاندىرۋ, كولىك جانە ينجەنەرلىك ينفراقۇرىلىممەن قامتاماسىز ەتۋ, الەۋمەتتىك نىسانداردى سالۋ جونىندەگى جوبالاردى ىسكە اسىرۋعا مەملەكەتتىك بيۋدجەتتەن دە, جەكە سەكتور تاراپىنان دا ايتارلىقتاي قولداۋ كورسەتىلەدى.
الماتى وبلىسىنىڭ اكىمى مارات سۇلتانعازيەۆ بايانداعانداي, قوناەۆ قالاسىندا اباتتاندىرۋ جۇمىستارى بەلسەندى جۇرگىزىلىپ كەلەدى. 2023 جىلدىڭ قورىتىندىسى بويىنشا 106 كم ينجەنەرلىك ينفراقۇرىلىم, ونىڭ ىشىندە 19 كم اۆتوجول, 61 كم ەلەكتر بەرۋ جەلىلەرى, 26 كم سۋمەن جابدىقتاۋ جانە سۋ بۇرۋ جەلىلەرى جوندەلدى. تۇرعىن ءۇي ورامدارى قارقىندى دامىپ كەلەدى – 610 پاتەرلىك 10 ءۇي سالىندى, 2023 جىلى 15 ءۇيدىڭ قۇرىلىسى باستالدى, 2024 جىلى 32 ءۇي باستالادى دەپ جوسپارلانىپ جاتىر. بارلىعى – 1 400 پاتەرلىك 47 ءۇي. قازىرگى ۋاقىتتا 13 ينۆەستيتسيالىق جوبا جۇزەگە اسىرىلماق. جالپى پۋل جوباسىندا 5 مىڭ جۇمىس ورنىن اشۋمەن, كاپيتال سالىمدارىنىڭ بارلىق كولەمى 470 ملرد تەڭگە بولاتىن 23 پەرسپەكتيۆالىق ۇسىنىس بار.
بيىل حالىقتىڭ ءوسىپ كەلە جاتقان قاجەتتىلىكتەرىن ەسكەرە وتىرىپ, اباتتاندىرۋ بويىنشا اۋقىمدى جۇمىستار جوسپارلانعان. ولاردىڭ ىشىندە «الماتى-وسكەمەن» تاسجولى قۇرىلىسىنىڭ تەحنيكالىق-ەكونوميكالىق نەگىزدەمەسىن ازىرلەۋ, «جاڭا ىلە» شاعىن اۋدانىندا كوشە جولدارى جەلىسىن تارتۋ, جاڭا تۇرعىن الاپتارعا كوممۋنيكاتسيالار جۇرگىزۋ جۇمىستارى بار. الداعى 5 جىلدا قالادا وقۋشى ورىندارىنىڭ, زاماناۋي مەديتسينالىق مەكەمەلەردىڭ, مادەني جانە سپورت نىساندارىنىڭ تاپشىلىعى پروبلەمالارىن شەشۋ كوزدەلگەن. ماسەلەن, قوناەۆتا كىتاپحاناسى بار 600 ورىنعا ارنالعان وقۋشىلار سارايى, سپورت سارايى, دراما تەاترى سالىنادى. ونكولوگيالىق جانە پەريناتالدىق بلوكتەرى بار كوپسالالى اۋرۋحانا, اۋىسىمدا 500 ادام قابىلدايتىن ەمحانا, 200 توسەك-ورىندى ينفەكتسيالىق اۋرۋحانا پايدالانۋعا بەرىلەدى. Freedom finance تۋريستىك سالانى دامىتۋ ءۇشىن ينۆەستور رەتىندە ارەكەت ەتتى: بانك جاڭا ورنالاستىرۋ وبەكتىلەرىن, قوناقۇي كەشەندەرىن سالۋ بويىنشا 6 ينۆەستيتسيالىق جوبانى جۇرگىزەدى. جالپى, كەشەندى جوسپار جوعارى ساپا ستاندارتتارىنا سايكەس جاڭا وبلىس ورتالىعىن دامىتۋدى جەدەلدەتۋگە مۇمكىندىك بەرەدى.
ۇكىمەت باسشىسى الاتاۋ قالاسىنىڭ جوباسىمەن تانىسىپ, اكىم اركەن وتەنوۆتىڭ ارنايى ەكونوميكالىق ايماقتى دامىتۋ كەلەشەگى تۋرالى بايانداماسىن تىڭدادى. اەا اۋماعىندا 96,6 مىڭ گەكتاردا جالپى سوماسى 383 ملرد تەڭگەگە 11 ءىرى ينۆەستيتسيالىق جوبانى ىسكە اسىرۋ جوسپارلانۋدا, بۇل 7 مىڭ جۇمىس ورنىن اشۋعا مۇمكىندىك بەرەدى.
ولجاس بەكتەنوۆ قالا اكىمشىلىگىنە الەۋمەتتىك, ينجەنەرلىك جانە تۇرعىن ءۇي جوبالارىن ساپالى ىسكە اسىرۋدا جاۋاپكەرشىلىكتىڭ سالماعى اۋىر بولاتىنىن اتاپ ءوتتى. ۇكىمەتتىڭ قاۋلىسىمەن الاتاۋ قالاسىنىڭ باس جوسپارى بەكىتىلدى, وعان سايكەس جوبالاۋ شەڭبەرىندە قۇرىلىستىڭ بيىكتىگى – قالانىڭ ورتالىق بولىگىنەن ونىڭ شەكاراسىنا قاراي تومەندەتۋ جولىمەن قالىپتاستىرۋ قاعيداتى كوزدەلگەن.
«ناتيجەسىندە, ءبىز الماتىنىڭ ماڭىندا تۋريستىك الەۋەتتى بەلسەندى ارتتىرا وتىرىپ, ونەركاسىپتىك, ءبىلىم بەرۋ جانە لوگيستيكالىق ورتالىققا اينالاتىن ءىرى مەگاپوليس قۇرۋدى قامتاماسىز ەتۋىمىز كەرەك. باس جوسپاردىڭ ءاربىر تارماعىنىڭ ىسكە اسىرىلۋىن باقىلاۋدا ۇستاۋ, سونداي-اق ءبىرىنشى كەزەكتەگى ءىرى جوبالاردى رۇقسات قۇجاتتاماسىمەن قامتاماسىز ەتۋگە قالا اۋماقتارىنىڭ ەگجەي-تەگجەيلى جوسپارلاۋ جوبالارىن ازىرلەۋدى جەدەلدەتۋ قاجەت», اتاپ كورسەتتى و.بەكتەنوۆ.
