كۇكىرتتى سۋتەگىنىڭ نورمادان ارتىق مولشەرى انىقتالدى

گازەت بەتىندە ءبورلى اۋدانىنداعى بەرەزوۆكا اۋىلىندا بالالار مەن جاسوسپىرىمدەردىڭ ۋلانۋ كورىنىستەرى ورىن العاندىعى تۋرالى بۇعان دەيىن ءتيىستى ماسەلە رەتىندە كوتەرىلىپ جازىلعان بولاتىن. الايدا اتالعان ماتەريال باسىلىمدا جاريالانعان كەزدە وعان قانداي دا ءبىر بولماسىن ەكولوگيالىق جانە تەحنوگەندىك جايتتاردىڭ اسەرلەرى تيگەنى نەمەسە تيمەگەنى جونىندەگى ناقتى دەرەكتەر كەلتىرىلمەگەن ەدى. وسىعان بايلانىستى تاياۋدا «قازگيدرومەت» رمك ديرەكتورىنىڭ ورىنباسارى باۋبەك ساميتوۆ بەرەزوۆكا اۋىلىندا 2014 جىلدىڭ 25 جەلتوقسانىندا ورناتىلعان جاڭا ەكولوگيالىق ستانسا تىڭ دەرەكتەردى تىركەۋگە كومەگىن تيگىزگەنىن ايتىپ بەردى. راس, ءدال قازىرگى كۇنى بۇل ستانسا تاجىريبەلىك تارتىپتە جۇمىس ىستەيدى. سوعان قاراماستان, ونىڭ جان-جاقتى ەكولوگيالىق مونيتورينگ جۇرگىزۋگە سەپتىگىن تيگىزىپ ۇلگەرگەنى دە دالەلدەۋدى قاجەت ەتپەيدى. ءتۇيىپ ايتقاندا, مۇندا, ەكوستانسانىڭ كومەگىمەن كۇكىرتتى سۋتەگىنىڭ قالىپتى مولشەردەن ءسال ارتقانى انىقتالعان. ايتالىق قاڭتار جانە اقپان ايلارىندا ونىڭ ءتيىستى دەڭگەيدەن كوتەرىلۋ مولشەرى انىقتالماعان. مۇنىڭ باس­تى سەبەبى ءدال سول كەزدە اتالعان قۇرىلعىنى رەتتەۋ مەن قوندىرۋ جۇمىستارى جۇرگىزىلدى, دەيدى ب.ساميتوۆ. الايدا ناۋرىز ايىنىڭ اياعىندا رۇقسات ەتىلگەن كونسەنتراتسيانىڭ ەكى دۇركىن كوتەرىلگەنى انىقتالعان. سونداي-اق, ونىڭ مولشەرى ءساۋىر ايىنىڭ ىشىندە ءۇش رەت ۇلعايعان. وسى ورايدا ماسەلەنىڭ مىنا مانىسىنە توقتالا كەتكەن ءجون. بەرەزوۆكا اۋىلى تۇرعىندارىن وزگە اۋماققا كوشىرۋ جونىندەگى ماسەلە العاش قوزعالا باستاعان كەزدە قازاقستان رەسپۋبليكاسى قورشاعان ورتانى جانە سۋ رەسۋرستارىن قورعاۋ مينيسترلىگى اتالعان اۋىلعا وسى تەكتەس ەكى ستانسانى قۇرۋعا رۇقسات بەرگەن ەكەن. الايدا كپو ب,ۆ. شەتەلدىك كومپانياسىنىڭ وندىرىستىك ايماعى كازگيدرومەتتىڭ باقىلاۋ اۋماعىنا كىرمەيتىن كورىنەدى. بۇل ءۇشىن دە اليانس جەتەكشىلەرى تاراپىنان قاجەتتى كەلىسىمنىڭ كەرەكتىگى بەلگىلى بولىپ وتىر. «سوندا قالاي بولماق؟» دەگەن ساۋال ەرىكسىز تۋىندايدى. ەگەر كپو ب.ۆ . كومپانيا باسشىلارى بەرەزوۆكا اۋىلىندا ورناتىلعان ەكى ەكولوگيالىق ستانسانىڭ كورسەتكەن دەرەكتەرىن مويىنداماسا, جانە وعان كەلىسپەسە بۇل قانداي ادىلەتتىلىك بولار ەدى؟ سونداي-اق, مۇنىڭ ءوزى ەكولوگيالىق تالاپتارعا سايكەس كەلە قويار ما ەكەن؟! وسىنىڭ باسىن اشىپ الۋ كەرەك سياقتى. تەمىر قۇسايىن, «ەگەمەن قازاقستان». باتىس قازاقستان وبلىسى, ءبورلى اۋدانى.