ومىرلەرىن قاۋىپكە تىككەن پاترۋلدىك پوليتسەيلەر كۇرە جول ۇستىندە بولۋى ىقتيمال قايعىلى وقيعانىڭ الدىن الدى. وقىس جاعداي 24 مامىرعا قاراعان ءتۇنى ورىن العان. پاترۋلدىك پوليتسيا باتالونىنىڭ كومانديرى ازامات احمەتوۆتىڭ ايتۋىنشا, ەكى شاعىن اۆتوبۋستا جازعى لاگەردەن قايتقان 22 بالا بولىپتى. 23 مامىر كۇنى تۇستەن كەيىن بۋراباي اۋدانىنان شىققان كولونناداعى وقۋشىلاردىڭ قاۋىپسىزدىگىن قامتاماسىز ەتۋ ءۇشىن وبلىستىق باتالوننىڭ 4 ۆزۆودىنىڭ قىزمەتكەرلەرى بۇركىت الشىنباەۆ پەن رىسپەك قابدىراشەۆ ولارعا ەرىپ ءجۇردى.
تۇنگى ساعات 02:15 شاماسىندا ەكاتەرينبۋرگ – استانا اۆتوجولىمەن جاقسى اۋدانىنىڭ اۋماعىندا ءجۇرىپ كەلە جاتقان پاترۋلدىك ەكيپاج قارسى جولاق بويىمەن قوزعالعان اۋىر جۇك كولىگىن بايقايدى. پوليتسەيلەر جۇرگىزۋشىگە فارالارىمەن جانە ارنايى قۇرىلعى ارقىلى دابىل بەرگەنىمەن, جۇك كولىگى بالالار مىنگەن اۆتوبۋسقا قاراما-قارسى ءجۇرىپ كەلە جاتادى. كەيىنىرەك بەلگىلى بولعانداي, كولىك بۇزىلىپ, جۇرگىزۋشى ونى باسقارا الماعان.
اۆتوبۋستا بالالاردىڭ كەلە جاتقانىن ەسكەرىپ, پاترۋلدىك ەكيپاج ءوز ومىرلەرىن قيۋعا دايىن بولدى. الايدا, باقىتىنا وراي, ەڭ سوڭعى ساتتە اۋىر جۇك كولىگى قارسى جولاقتان كىلت بۇرىلىپ ۇلگەرەدى. دەگەنمەن ونىڭ تىركەمەسى پاترۋلدىك كولىككە مەحانيكالىق زاقىم كەلتىردى.
ب.الشىنباەۆتىڭ ايتۋىنشا, جول بويىندا بەلگىلەنگەن قاشىقتىقتى ساقتاعان شاعىن اۆتوبۋستاردىڭ جۇرگىزۋشىلەرى دە شەبەرلىك تانىتىپ, اپاتتى جاعدايدى كورىپ, بىرتىندەپ جول جيەگىنە شىعىپ كەتكەن. ال پوليتسەيلەرگە دۇرىس شەشىم قابىلداۋ ءۇشىن 1-2 سەكۋند قانا ۋاقىت كەرەك بولىپتى. «سوققىنى وزىمىزگە قابىلداۋعا دايىن بولدىق», دەيدى ب.الشىنباەۆ.
بۇل قاراپايىم سوزدەردىڭ ارتىندا كەز كەلگەن پوليتسيا قىزمەتكەرى قاۋىپ تونگەن جاعدايدا كورسەتۋگە دايىن ۇلكەن باتىلدىق پەن جانقيارلىق جاتىر. توتەنشە جاعداي جاساعانى ءۇشىن جۇك كولىگىنىڭ جۇرگىزۋشىسى جاۋاپقا تارتىلدى. ءتارتىپ ساقشىلارى دا, بالالار دا ءدىن امان.
