فوتو: smartnews.kz
فرانتسيانىڭ قازاقستانداعى ەلشىلىگىندە قازاقستان مەن فرانتسيانىڭ كينووندىرىس سالاسىنداعى ىنتىماقتاستىعى جان-جاقتى تالقىلانىپ, بىرقاتار جوبا كەلىسىلدى. ەندى ەلىمىزدە فرانتسۋز پرەمەرالارىنىڭ اپتالىعى ۇيىمداستىرىلىپ, ودان كەيىن قازاق تىلىندەگى فرانتسۋز فيلمدەرى ۇسىنىلادى.
ء«بىز قازان ايىندا فرانتسۋز فيلمدەرى پرەمەرالارىنىڭ اپتالىعىن وتكىزۋدى جوسپارلاپ وتىرمىز. وندا ەڭ تانىمال فرانتسۋز فيلمدەرى قازاق كورەرمەنى نازارىنا ۇسىنىلادى. پرەمەرا اپتاسىنان كەيىن العاش رەت قازاق تىلىنە دۋبلياجدالعان فرانتسۋز فيلمدەرىنىڭ كورسەتىلىمىن ۇيىمداستىرۋدى كوزدەپ وتىرمىز. ءبىز فرانتسياداعى قازاق فيلمدەرىن قولداۋعا دايىنبىز. سونداي-اق فرانتسيانىڭ ۇلتتىق كينەماتوگرافيا جانە انيماتسيا ورتالىعى (CNC) ساراپشىلارىنىڭ قازاقستانعا جۇمىس ساپارى ۇيىمداستىرىلادى», دەپ حابارلادى فرانتسيانىڭ قازاقستانداعى ەلشىلىگى.
سونداي-اق بىرلەسكەن كينو ءوندىرىسى جانە ەكى جاقتى كينوپروكات باعىتتارىندا تۇراقتى كەزدەسۋلەر وتكىزۋ جوسپارلانىپ وتىر.
ء«بىلىم بەرۋ سەمينارلارى مەن قازاقستاندىق مامانداردى فرانتسيادا وقىتۋ مۇمكىندىكتەرى قاراستىرىلىپ جاتىر. مەملەكەتتىك كينونى قولداۋ ورتالىعىمەن جانە سالا ماماندارىمەن بىرلەسە وتىرىپ, ەڭ پايدالى باعىتتاردى انىقتاۋعا كۇش سالامىز», دەدى فرانتسيانىڭ قازاقستانداعى ەلشىلىگى.
ايتا كەتەيىك, قازاقستاننىڭ ۇلتتىق كينەماتوگرافياسىن قولداۋ ورتالىعى مەن فرانتسيانىڭ ۇلتتىق كينەماتوگرافيا جانە انيماتسيا ورتالىعى كاننداعى حالىقارالىق كينوفەستيۆال اياسىندا ىنتىماقتاستىق تۋرالى قوسىمشا كەلىسىمگە قول قويدى. تاراپتار كينوونىمدەرىن تاراتۋ ماسەلەلەرى بويىنشا ىنتىماقتاسۋعا كەلىسكەن ەدى.
