فوتو: tengrinews.kz
اقتوبە وبلىسى اكىمىنىڭ ءباسپاسوز قىزمەتى سۋ تاسقىنى سالدارىن جويۋ جۇمىستارى قالاي جۇرگىزىلىپ جاتقانىن باياندادى. سۋ تاسقىنى كەزىندە بارلىعى 4084 ءۇي زارداپ شەكتى. ونىڭ 1 457-ءسى جەكە ۇيلەر بولسا, قالعانى ساياجاي القابىنداعى تۇرعىن ۇيلەر. قازىر سۋ تاسقىنى اياقتالعان اۋداندار مەن قالادا تۇرعىن ۇيلەردى تەحنيكالىق تەكسەرۋ اياقتالدى. ناتيجەسىندە 652 تۇرعىن ءۇي سالۋ جانە 309 ءۇيدى ساتىپ الۋ كەلىسىلدى. سالىنىپ جاتقان بارلىق ۇيلەر ءبىر ءتيپتى, اۋدانى 80 شارشى مەتر. وعان قوسا 3 123 ءۇي كۇردەلى جوندەۋدەن وتەتىنى بەلگىلى بولدى.
«سۋ تاسقىنىنىڭ سالدارىن جويۋعا جەرگىلىكتى بيۋدجەتتەن 7,8 ملرد تەڭگە ءبولۋ قاراستىرىلدى. تۇرعىن ءۇي ماسەلەسىمەن قاتار 136 شاقىرىم جولدى, 15 كوپىردى, 23 الەۋمەتتىك نىساندى جوندەۋ قاجەت. سوندىقتان قاراستىرىلعان بيۋدجەتپەن قاتار ءىرى كومپانيالار مەن مەملەكەت قورلارى قولداۋ ءبىلدىرىپ, تۇرعىن ءۇي قۇرىلىسى جۇرگىزىلىپ جاتىر. ولار: «بولات وتەمۇراتوۆ قورى», «قازاقستان حالقى» قورى, «BI Group» جانە «ERG» قورلارى. «بولات وتەمۇراتوۆ» قورىنىڭ دەمەۋشىلىگىمەن ايتەكە بي, ءۇيىل, قوبدا, تەمىر جانە مۇعالجار اۋداندارىندا 64 ءۇي ساتىپ الىندى. سونىمەن قاتار بۇل قور العىن, مارتوك, بايعانين اۋداندارىنان تاعى 11 ءۇي ساتىپ الماق. بۇل ايماقتاردا توتەنشە جاعداي جاريالانعان جوق, بىراق سۋ تاسقىنى كەزىندە بىرنەشە ءۇي جارامسىز بولىپ قالدى. وبلىسقا BI Group كومپانياسى 2 ملرد تەڭگە, «قازاقستان حالقىنا» قورى 1,5 ملرد تەڭگە ءبولدى. بۇل قاراجاتقا ۇيلەر سالىندى», دەلىنگەن اكىمدىك حابارلاماسىندا.
ايتا كەتەيىك, وبلىس بويىنشا بارلىعى 2 904 ادام 100 اەك كولەمىندە ءبىر رەتتىك تولەم الدى. بۇل 939,2 ملن تەڭگەنى قۇرايدى. سۋ تاسقىنى كەزىندە جۇمىسى توقتاپ قالعان شاعىن جانە ورتا بيزنەس سۋبەكتىلەرىنىڭ شىعىنى شامامەن 3 ميلليارد تەڭگەنى قۇرايدى.
قىرمىزى جۇماعاليقىزى,
ەۇۋ ستۋدەنتى
