فوتو: ۆيدەوسكرين
اتىراۋ وبلىسىنىڭ تج جونىندەگى جەدەل شتابى مالىمەتىنشە قالاداعى المالى اۋىلدىق وكرۋگىنە قاراستى 8 شارۋاشىلىقتى وكرۋگ ورتالىعىمەن بايلانىستىراتىن جولدى سۋ شايىپ, شارۋالارعا قيىندىق كەلتىرگەن بولاتىن. المالىدا جايىلماعا شىققان ءور سۋىن جايىققا قايتا قوسۋ جۇمىستارى ءجۇرىپ جاتىر.
جايىق وزەنى اتالعان اۋىلدى ءۇش جاعىنان قورشاعان ەدى. بۇگىندە وكرۋگكە جاۋاپتى مەكەمە مەن 50-دەن استام سارباز كەزەكشىلىك اتقارادى. جالپى وزەن بويىنداعى 17 ەلدى مەكەننىڭ بارلىعىندا جاۋاپتى مەكەمەلەر بەلگىلەنگەن.
«نەگىزىنەن جاعا بەكىتۋ جۇمىستارى تولىعىمەن اياقتالدى. قورشاۋ سەنىمدى, اۋىلعا قاۋىپ جوق. جايىقتان شىققان جايىلما سۋ اۋىلدىڭ اينالاسىنا تارالدى. سوندىقتان جايىلما سۋدى جايىققا قايتا جىبەرۋ ءۇشىن بوگەتتەردى جىرىپ جاتىرمىز», دەدى ءنومىرى 16-20 ۋچاسكەلەرىنىڭ كوورديناتورى نۇرجاۋعان تولەۋوۆا.
تاسقىن كەزىندە جايىق وزەنى 113 ۋچاسكەگە ءبولىنىپ, سۋدان قورعانۋ جۇمىستارى جۇرگىزىلدى. ءالى دە 24 گيدروبەكەتتە سۋدىڭ دەڭگەيى باقىلاۋدا تۇر. ءساۋىر-مامىر ايلارىندا وبلىستىڭ سۋ باسۋ قاۋپى جوعارى ەلدى مەكەندەردى قورشاپ بيىكتىگى 8-11 مەتر بولاتىن 523 شاقىرىم بوگەت سوعىلدى.
المالى اۋىلى اينالاسىنا 8,6 شاقىرىم بوگەت سوعىلدى, سۋ دەڭگەيى ۇنەمى باقىلانىپ, كەزەكشىلەر تاۋلىك بويى جاعالاۋدىڭ باسى-قاسىندا ءجۇر.
