اتالعان جوبا 2021-2023 جىلدار ارالىعىندا جۇزەگە اسىپ, مەملەكەتتىك قىزمەتتەردى تسيفرلاندىرۋداعى تىڭ تاجىريبەلەرگە ارقاۋ بولعان زەرتتەۋلەر, كونفەرەنتسيالار, سەمينارلار جانە وقىتۋ باعدارلامالارى وتكەن بولاتىن. كاۆكاز جانە ورتالىق ازيانىڭ 200-گە جۋىق مەملەكەتتىك قىزمەتشىلەرى ءۇشىن جوبا تيىمدىلىگىن كورسەتتى. قازىرگى كەزدە استانا مەملەكەتتىك قىزمەت حابى مەن بۇۇ دامۋ باعدارلاماسى, كورەيا رەسپۋبليكاسى ىشكى ىستەر جانە قاۋىپسىزدىك مينيسترلىگى (MOIS), اقپاراتتىق قوعام ماسەلەلەرى بويىنشا ۇلتتىق اگەنتتىگىنىڭ (NIA) بىرلەسۋىمەن ىسكە اسىپ وتىرعان گەوگرافياسى كەڭەيىپ, قاتىسۋشى ەلدەردىڭ سانى 12-گە جەتىپ وتىر. ورتالىق ازيا (قازاقستان, قىرعىزستان, تاجىكستان جانە وزبەكستان), كاۆكاز (ارمەنيا, ازەربايجان جانە گرۋزيا) جانە ازيا-تىنىق مۇحيتى ايماعىنداعى (بانگلادەش, كامبودجا, لاوس قدر, موڭعوليا جانە فيليپپين) ەلدەر نەگىزگى كەزەكتە تسيفرلى ترانسفورماتسيا مەن تسيفرلى باسقارۋدى ىلگەرىلەتۋ ءۇشىن مەملەكەتتىك قىزمەتشىلەردىڭ الەۋەتىن نىعايتاتىن بولادى.
كونفەرەنتسيانى بۇۇ دامۋ باعدارلاماسى قازاقستانداعى تۇراقتى وكىلى كاتارجينا ۆاۆەرنيا اشىپ, بۇگىنگى تاڭدا تسيفرلىق تەحنولوگيالار دامۋ قۇرالدارىنىڭ تۇبەگەيلى وزگەرتىپ جاتقانىن ايتتى. «جاڭا باستاما ارقىلى كورەيانىڭ ءساتتى تاجىريبەسىن پايدالانا وتىرىپ, تسيفرلىق ترانسفورماتسيانى ىلگەرىلەتۋدى ماقسات ەتىپ وتىرمىز. بىلىممەن, وزىق تاجىريبەلەرمەن جانە زەرتتەۋلەرمەن الماسۋ, سەمينارلار ارقىلى قاتىسۋشى ەلدەردىڭ مەملەكەتتىك قىزمەتكەرلەرىنە باسقارۋ جۇيەسىنىڭ تسيفرلىق ترانسفورماتسياسىن باعدارلاۋعا جانە ازاماتتارعا قىزمەتتەردى ءتيىمدى جەتكىزۋگە مۇمكىندىك بەرە الامىز», دەدى بۇۇدب-نىڭ قازاقستانداعى تۇراقتى وكىلى.
كورەيا رەسپۋبليكاسى ىشكى ىستەر جانە قاۋىپسىزدىك مينيسترلىگىنىڭ (MOIS) تسيفرلى ۇكىمەت پەن يننوۆاتسيالار وفيسىنىڭ تسيفرلى قاۋىپسىزدىك ساياساتى ءبولىمى ديرەكتورى ۆون-گاب دجو 3 جىلدا جەتكەن جەتىستىكتەرگە توقتالىپ, ەندىگى كەزەكتە 12 مەملەكەتتىڭ ۋاعدالاستىققا قول جەتكىزىپ وتىرعانىن العا تارتتى. بۇگىندە تسيفرلى ترانسفورماتسيادا ايتارلىقتاي جەتىستىكتەرگە جەتكەن ەلدەر تاجىريبەسىمەن ءبولىسۋ اسا ماڭىزدى. ۆون-گاب دجونىڭ ايتۋىنشا, كورەيا ۇكىمەتى تسيفرلى پلاتفورما جانە ءتيىمدى باسقارۋداعى تۇجىرىمدارى جانە جەتىستىكتەرىمەن بولىسۋگە دايىن.
استانا مەملەكەتتىك قىزمەت حابى باسقارۋشى كوميتەت توراعاسى ءاليحان بايمەنوۆتىڭ ايتۋىنشا, تسيفرلاندىرۋ – قازىرگى تاڭدا مەملەكەتتىك باسقارۋدىڭ ماڭىزدى قۇرالى بولىپ تابىلادى. «مەملەكەتتىك باسقارۋدا تسيفرلى قۇرالداردى پايدالانۋ اكىمشىلىك ۇدەرىستەردى وڭتايلاندىرۋعا, شەشىمدەر قابىلداۋدى جەتىلدىرۋگە, وزەكتى ماسەلەلەردە يننوۆاتسيالاردى پايدالانۋعا ىقپال ەتە وتىرىپ, مەملەكەتتىك قىزمەت كورسەتۋدە تيىمدىلىكتى, اشىقتىقتى ارتتىرۋعا, ازاماتتاردىڭ مەملەكەتتىك قۇرىلىمدارعا دەگەن سەنىمىن ارتتىرۋعا ىقپال ەتەدى. كورەيا ۇكىمەتىمەن بىرلەسكەن جوبا بۇعان دەيىن دە تيىمدىلىگىن كورسەتىپ, بۇگىندە قاتسۋشى ەلدەردىڭ سانى ارتىپ وتىر.
«تسيفرلى تەحنولوگيالاردى, جاساندى ينتەللەكتىنى پايدالانۋ ارقىلى مەملەكەتتىك قىزمەتتىڭ تيىمدىلىگىن ارتتىرۋدا ءار ەل وزدىگىنەن تاجىريبە جيناقتاپ, ءوز جولىمەن ءجۇرىپ كەلەدى. الايدا تسيفرلى باسقارۋدى جەتىلدىرۋدە كوشباسشى ەلدەردىڭ تاجريبەسى ماڭىزدى. بۇل باعىتتا قاتىسۋشى ەلدەر ءۇشىن ورتاق باعىت بولماعانىمەن, باسقا ەلدەردىڭ ۇزدىك تاجىريبەسىن زەردەلەۋ ارقىلى اركىم وزىنە كەرەگىن الاتىنى انىق. بۇگىندە كورەيا, ەستونيا, دانيا سياقتى كوشباسشى ەلدەر تاجىريبەسى ايماق ءۇشىن ءارى وزگە ەلدەرگە دە ماڭىزدى سانالادى. وسىدان ءۇش جىل بۇرىن استانا مەملەكەتتىك قىزمەت حابى مەن كورەيا اراسىنداعى كەلىسىمگە سايكەس ورتالىق ازيانىڭ ءتورت مەملەكەتىمەن تسيفرلى باسقارۋ جوباسى ىسكە اسقان بولاتىن. وسى جوبا بارىسىندا كورەيا, سينگاپۋر, ەستونيا سەكىلدى دامىعان تسيفرلىق تەحنولوگيالارى بار مەملەكەتتەردىڭ ۇلگىسى زەردەلەندى. ناتيجەلىگىنە قاراپ, كاۆكاز, ورتالىق ازيادان باسقا تىنىق مۇحيت ەلدەرىنەن تاعى بەس مەملەكەت قوسىلىپ, جوبانى تاعى دا ءۇش جىلعا سوزۋ كەلىسىلىپ وتىر. بۇل جوبانىڭ اياسىندا وزىق ەلدەردىڭ ەلەكتروندى ۇكىمەتتى دامىتۋداعى ارحيتەكتۋراسى, تۇجىرىمدامالارى, ستراتەگيالىق جولدارى سارالاناتىن بولادى. وزىق تاجىريبەلەر بۇگىندە الەم ەلدەرىن الاڭداتىپ وتىرعان جەمقورلىقپەن كۇرەستە, سونداي-اق حالىققا قىزمەت كورسەتۋدەگى وزىق تاجىريبەلەرگە ارقا سۇيەيدى. وسىنىڭ ناتيجەسىندە ءار ەل مۇقتاج باعىتتار بويىنشا پىكىر الماسىپ, ءوز ۇكىمەتتەرى تاجىريبەسىندە پايدالاناتىن بولادى», دەيدى ءا.بايمەنوۆ.
ەىدۇ تسيفرلى ۇكىمەت يندەكسى رەيتينگىندە الەمدىك كوشباسشى سانالاتىن كورەيا رەسپۋبليكاسى ساراپشىلارى ستراتەگيالار مەن يننوۆاتسيالاردى, سونداي-اق زاڭنامالىق اسپەكتىلەر, تسيفرلى ترانسفورماتسيامەن, كاۆكاز ەلدەرى (گرۋزيا, ارمەنيا, ازەربايجان) جانە ورتالىق ازيا (قازاقستان, قىرعىزستان, تاجىكستان) ەلدەرىنىڭ مەملەكەتتىك ورگان وكىلدەرى ءوز ۇكىمەتتەرىنىڭ تسيفرلى پلاتفورمالارىنىڭ جۇمىس نەگىزدەرىمەن تانىستىردى.
كونفەرەنتسيادا وزبەكستان جانە ازيا-تىنىق مۇحيتى ەلدەرىندە (فيليپپين, لاوس, كامبودجا, موڭعوليا, بانگلادەش) قولدانىلاتىن تاجىريبەگە باسىمدىق بەرىلىپ, مەملەكەتتىك تسيفرلى باسقارۋدى ءتيىمدى دامىتۋدىڭ باسىم باعىتتارى مەن بىرلەسكەن جوبالار تالقىلاندى.
الماتى
