مەملەكەت باسشىسى قاسىم-جومارت توقاەۆ ۇلتتىق قۇرىلتايدىڭ ءۇشىنشى وتىرىسىندا ەلىمىزدىڭ تاريحىن زەرتتەۋ مەن ناسيحاتتاۋعا, ءتىل ماسەلەسىنە, ونوماستيكا, تاريحي مۇرالار مەن تاريحي تۇلعالارعا, تابيعي جانە تاريحي مەكەندەرگە ەرەكشە نازار اۋدارعان ەدى. سونىمەن قاتار پرەزيدەنت تاريحي-مادەني جادىگەرلەردى, ولاردىڭ كوشىرمەلەرىن قازاقستانعا قايتارۋ جۇمىستارىن جانداندىرۋ دا اسا ماڭىزدى ەكەنىن اتاپ ءوتتى.
اتالعان ءىس-شاراعا پارلامەنت دەپۋتاتتارى, قازاقستان مۇسىلماندارى ءدىني باسقارماسى, كىتاپحانالار مەن ارحيۆ وكىلدەرى, قوعام قايراتكەرلەرى قاتىستى.
كورمەگە ۇلىبريتانيادان اكەلىنگەن 15 قولجازبا مەن ارحيۆتىك قۇجاتتىڭ كوشىرمەلەرى جانە رەسپۋبليكا اۋماعىندا انىقتالعان 150-دەن اسا كونە قولجازبا مەن سيرەك قۇندى كىتاپتار قويىلدى. ولاردىڭ ىشىندە تۇركى-يسلام مادەنيەتىنىڭ قۇندى ەسكەرتكىشى, العاش تۇركى تىلىنە اۋدارىلعان قاسيەتتى قۇران كىتابى (X-XII عع.), ءابۋ ناسىر ءال-فارابي, قوجا احمەت ياساۋي, سۇلەيمەن باقىرعاني ەڭبەكتەرىنىڭ كوشىرمەلەرى, XI عاسىرداعى پارسى تاريحشىسى گارديزيدىڭ «زەين-ءال-احبار» قولجازباسى, ت.ب. بار.
القالى جيىن اياسىندا ۇلتتىق قۇندىلىقتارىمىزدى جيناقتاۋ, ولاردى كەلەر ۇرپاققا ساقتاۋدىڭ ماڭىزدىلىعى مەن وسى سالاداعى وزەكتى ماسەلەلەر تالقىلاندى.
سونداي-اق «Uly dala murasy» عىلىمي-تانىمدىق جۋرنالىنىڭ جاڭا نۇسقاسى مەن شەتەلدەردە انىقتالعان كونە دەرەكتەر بويىنشا «شەتەلدىك قورلارداعى قۇندى جازبا مۇرالارى» اتتى كاتالوگ-البومنىڭ تۇساۋى كەسىلدى.
