سالتاناتتى ءىس-شاراعا الكەي مارعۇلاننىڭ قىزى دانەل مارعۇلان, مادەنيەت جانە اقپارات ۆيتسە-ءمينيسترى ەربول الىقۇلوۆ, پارلامەنت سەناتىنىڭ دەپۋتاتى التىنبەك نۇح ۇلى, مەملەكەت جانە قوعام قايراتكەرى دارحان مىڭباي, ايتىس اقىنى بايانعالي ءالىمجان, فيلولوگيا عىلىمدارىنىڭ دوكتورلارى, پروفەسسورلارى سەرىك نەگيموۆ, تۇرسىن جۇرتباي, باسقا دا زيالى قاۋىم وكىلدەرى قاتىستى.
«الكەي حاقان ۇلىنىڭ اۋدارعان حاتتارى, ماقالالارى, قازاق دالاسىنان تاپقان ەرەكشە سۋرەتتەرى, وقۋ ورىندارىندا جازعان ەڭبەكتەرى بۇگىنگى عىلىمي اينالىمنىڭ سۇبەلى ماتەريالدارىنىڭ قاتارىنا كىرەدى. الكەي حاقان ۇلى كوپ اشىلا بەرمەگەن كونە داۋىرلەرگە ساياحات جاساپ, ءبىزدىڭ بايىرعى مادەنيەتىمىزدى اق قاعازعا التىن ارىپتەرمەن جازعان عالىم. الكەي مارعۇلاننىڭ 100 جىلدىق مەرەيتويى يۋنەسكو شەڭبەرىندە اتالىپ ءوتتى. 2003 جىلى س.تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ الدىندا جانە 2007 جىلى الماتىداعى ۇلتتىق عىلىم اكادەمياسىنىڭ جانىندا قولادان بيۋست-ەسكەرتكىش ورناتىلدى. سونداي-اق باياناۋىل اۋدانىنىڭ قۇندىكول اۋلىنداعى جالپى ورتا ءبىلىم بەرۋ مەكتەبى مەن باياناۋىل ورتالىعىندا ورنالاسقان كوشەگە ەسىمى بەرىلدى», دەدى ۆيتسە-مينيستر ەربول الىقۇلوۆ.
عالىمنىڭ قىزى دانەل مارعۇلان اكە ەسىمىن ارداقتاعان اۋقىمدى ءىس-شارا ءۇشىن العىس ايتىپ, ەسكىرمەس ەستەلىكتەرىمەن ءبولىستى.
كورمەگە الكەي مارعۇلاننىڭ ومىرىنەن سىر شەرتەتىن 90-نان اسا قۇندى قۇجات قويىلدى. اتاپ ايتساق, «شوقان ءۋاليحانوۆتىڭ كوركەم مۇراسى» ماقالاسى, «قازان ۋنيۆەرسيتەتىنەن الىنعان قولجازبالار», «قولا ءداۋىرى قورىمدارى» ماقالاسى, سونداي-اق جوشى حان كەسەنەسى مەن ايشا ءبيبى مازارىنىڭ سىزباسى, ماڭعىستاۋ ولكەسىنىڭ ەتنوگرافيالىق جازبالارى, رۋ تاڭبالارى, ارحيتەكتۋرالىق قۇرىلىس ماتەريالدارىنىڭ سىزبالارى مەن سۋرەتتەرى تانىستىرىلدى.
