فوتو: gov.kz
اكتسيا باستالعالى بەرى ءوڭىردىڭ 214 مىڭ تۇرعىنى ءىس-شاراعا بەلسەندى تۇردە قاتىستى. رەسمي دەرەككە جۇگىنسەك, 1 600-دەن اسا تازالاۋ جۇمىستارى جۇرگىزىلگەن. جالپى العاندا, ءوڭىردى اباتتاندىرۋ, كوگالداندىرۋ جانە سانيتارلىق تازالاۋ جۇمىستارىنا قازىنادان 9,4 ملرد تەڭگە قاراستىرىلعان.
«تازا قازاقستان» ەكولوگيالىق اكتسياسى اياسىندا وڭىردەگى 60-تان اسا تاريحي جانە مادەني ەسكەرتكىشتىڭ ماڭايى قوقىستان تازارتىلدى. مۇنداي جۇمىس 143 ساياباق پەن گۇلباقتاردا جالعاسىن تاپتى. بۇدان بولەك, 816,6 شاقىرىم كانالدار مەن ارىق-اتىزداردى, 3,1 مىڭ شاقىرىم كوشە مەن 99 مىڭ اۋلانى قوقىستان تازارتۋ جۇمىسى جۇرگىزىلدى. سونداي-اق وبلىس بويىنشا 60 مىڭ كوشەت ەگىلىپ, 53 سۋبۇرقاق ىسكە قوسىلعانىن ايتا كەتكەن ءجون. اكتسيا اياسىنداعى جۇمىستار جىل سوڭىنا دەيىن جالعاسادى.
جەرگىلىكتى اتقارۋشى بيلىك كەلتىرگەن دەرەككە سەنسەك, رەسپۋبليكا دەڭگەيىندە قولعا الىنعان اكتسيا اياسىندا تۇرعىن ۇيلەر مەن جولداردى, تۇرعىندار يگىلىگىنە سالىنعان دەمالىس ايماقتارىن جوندەۋ جوسپارلانعان. جىلىتۋ ماۋسىمىنا دايىندالۋعا قازىنادان 14,7 ملرد تەڭگە ءبولىندى. بيىل وبلىستا 8,5 شاقىرىم جىلۋ جەلىسى جوندەلەدى.
قازىرگى كەزدە تاراز قالاسىندا «م-1» جىلۋ ماگيسترالىن قايتا جاڭارتۋ جۇمىستارى جۇرگىزىلىپ جاتىر. جىلۋمەن جابدىقتاۋ جەلىسىنىڭ جالپى ۇزىندىعى 6,1 كم قۇرايدى, ونىڭ 4,7 كم جاڭارتىلادى. جوبانىڭ جالپى قۇنى 10,7 ملرد تەڭگەگە باعالانعان. قۇرىلىس جۇمىستارى بيىل قازاننىڭ 1-نە دەيىن اياقتالادى.
جەرگىلىكتى بيلىكتىڭ ايتۋىنشا, جىل سوڭىنا دەيىن 300 شاقىرىمعا جۋىق كانالدى قوسىمشا تازارتۋ كوزدەلگەن. بۇگىندە تارازداعى قاپال, ۇشبۇلاق, قاراسۋ-1, قاراسۋ-2, تورەگەلدى كانالدارىن مەحانيكالىق تازارتۋ جۇمىستارى باستالدى.
بيىل تاراز, جاڭاتاس, شۋ قالالارىندا جانە تۇرار رىسقۇلوۆ اۋدانىنىڭ قۇلان اۋىلىنداعى 79 تۇرعىن ءۇيدى كۇردەلى جوندەۋدەن وتكىزۋ ءۇشىن رەسپۋبليكالىق بيۋدجەتتەن 5,9 ملرد تەڭگە قاراستىرىلعان. سونىمەن قاتار تاراز قالاسىنىڭ كوممۋنالدىق مەنشىگىندەگى 6 ۇيدە 99,6 ملن تەڭگەگە اعىمداعى جوندەۋ جۇمىستارى جۇرگىزىلدى. ال «قاراتاۋ قۇرىلىس- 2030» جشس 685 ملن تەڭگەگە 11 كوپپاتەرلى تۇرعىن ءۇيدىڭ ساۋلەتتىك كەلبەتىن جاقسارتۋ جۇمىسىن باستايدى.
جامبىل وبلىسى
