قازاقستاننىڭ زىلتەمىرشىلەرى اراسىنان جارىس جولىنا العاشقى بولىپ 67 كگ سالماقتاعى اقجول قۇرمانبەك شىقتى. اتاقتى ۇشتوبە اۋىر اتلەتيكا مەكتەبىنىڭ تۇلەگى جۇلقىپ كوتەرۋدە الدىنا جان سالمادى. اسا شيەلەنىستى تارتىس جاتتىعۋدىڭ ەكىنشى تۇرىندە جالعاستى. چەمپيوندىق اتاقتان ۇمىتكەرلەر ۇشەۋ ەدى. ولار – مىسىرلىق حۋسسەين حامۋدا ابدەلراحمان, مولدوۆالىق الەكساندر بالجي جانە اقجول قۇرمانبەك. ۇشەۋى ابدەن تىرەستى. تارتىس شارىقتاۋ شەگىنە جەتەر تۇستا بالجي باسەكەلەستىككە شىداماي, قولا مەدالدى قاناعات تۇتتى. ەندى قالعانى – ەكەۋ. وكىنىشكە قاراي, قانداسىمىز سوڭعى مۇمكىندىگىن پايدالانا الماي, باستى قارسىلاسىن العا جىبەرىپ الدى. ناتيجەسىندە, اقجول كۇمىسپەن كۇپتەلدى. ونىڭ ناتيجەسى – 285 كگ (129+156). باس جۇلدە مىسىر سپورتشىسىنا بۇيىردى. چەمپيوننىڭ كورسەتكىشى – 286 (128+158) كگ.
كەلەسى كۇنى 89 كگ سالماقتا سايىسقا تۇسكەن نۇردوس سابىر الىستاعى وڭتۇستىك امەريكا قۇرلىعىندا قازاقتىڭ ءانۇرانىن شىرقاتتى. بىلتىرعى الەمدىك دودادا كۇمىسپەن كۇپتەلگەن قانداسىمىز بۇل جولى الدىنا جان سالمادى. قوسسايىستىڭ قورىتىندىسى بويىنشا ول 333 (148+185) كيلوگرامدىق زىلتەمىردى ەركىن ەڭسەردى. ەكىنشى ورىندى ەنشىلەگەن ارمەنيالىق ۆالەريك موۆسەسيان نۇردوستان 4 كگ كەم كوتەرسە, وزبەك بەكزود گوفۋرجونوۆ ءۇشىنشى ساتىعا جايعاستى.
كوپ كەشىكپەي ءوزىنىڭ كوماندالىق ارىپتەسىنىڭ جەڭىستى جولىن ايانات جۇماعالي جالعاستىردى. ول 76 كگ سالماق دارەجەسىندە الەم چەمپيونى اتاندى. اياناتتىڭ ناتيجەسى – 222 (97+125) كگ. ءبىر ايتا كەتەرلىگى ايانات بارلىق التى مۇمكىندىگىن ۇتىمدى پايدالاندى. كۇمىس پەن قولا مەدالدى فينليانديالىق ميني حورماۆيرتا (211 كگ) مەن ۇندىستاندىق سانجانا سانجانا (210 كگ) ءوزارا ءبولىستى. 81 كگ سالماقتا سىنعا تۇسكەن ءسانيا ورمانباەۆا 201 كگ سالماقتى تىك كوتەرىپ, قولا مەدالدى موينىنا ءىلدى. قازاق قىزى يتاليالىق سارا دال بو (207 كگ) مەن ۆەنەسۋەلالىق ليۋديسمار اپاريكو الفونسونى (206 كگ) العا جىبەرىپ الدى. ال داريا بالابايۋك (59 كگ) – ءتورتىنشى, ءالي مەدەتباەۆ (73 كگ) – بەسىنشى, ديدار ابدوللا (102 كگ) مەن ەدىل اسقاروۆ (+102 كگ) التىنشى ورىنداردى قاناعات تۇتتى.
ناتيجەسىندە 2 التىن, 1 كۇمىس جانە 1 قولا مەدالدى ولجالاعان قازاقستان قۇراماسى جالپى كوماندالىق ەسەپتە كولۋمبيامەن بىرگە ءۇشىنشى جانە ءتورتىنشى ورىنداردى ءوزارا ءبولىستى. الدىمىزدا – ۆەنەسۋەللا (3+1+1) مەن ءۇندىستان (2+2+2). سونداي-اق توپ-10 كوماندانىڭ قاتارىنا وزبەكستان (1+1+2), مىسىر (1+1+1), سيريا, گرۋزيا, تۇرىكمەنستان (1+1+0) جانە تۇركيا (1+0+2) قۇرامالارى ەندى. ليمادا بارلىعى 15 مەملەكەتتىڭ ءانۇرانى شىرقالىپ, 29 ەلدىڭ تۋى بيىكتە جەلبىرەدى.
ەستەرىڭىزگە سالا كەتەيىك, بىلتىر البانيانىڭ دۋررەس قالاسىندا وتكەن الەم بىرىنشىلىگىندە قازاقستاننىڭ جاسوسپىرىمدەر قۇراماسى 2 التىن, 2 كۇمىس ولجالاعان ەدى. بىراق ارادا ءبىراز ۋاقىت وتكەننەن كەيىن تايسيا الەكسەەۆانىڭ قانىنان رۇقسات ەتىلمەگەن ءدارى-دارمەكتىڭ ىزدەرى بايقالىپ, ول كۇمىس مەدالدان ايىرىلدى.
جاسوسپىرىمدەر اراسىنداعى الەم بىرىنشىلىگىنىڭ جەڭىمپازدارى
ەرلەر: 49 كگ – فرەدي اندرەس بۋستيللو (كولۋمبيا), 55 كگ – رامازان ەفە يۋلماز (تۇركيا), 61 كگ – داۆيد ۆارگاس كامپوس (ۆەنەسۋەلا), 67 كگ – حۋسسەين حامۋدا ابدەلراحمان (مىسىر), 73 كگ – بەدەبرات بحارالي ء(ۇندىستان), 81 كگ – رۋسلان راحماتجونوۆ (وزبەكستان), 89 كگ – نۇردوس سابىر (قازاقستان), 96 كگ – موحاماد الكاتەب (سيريا), 102 كگ – سۇلەيمان جافاروۆ (تۇرىكمەنستان) جانە +102 كگ – يراكلي ۆەكۋا (گرۋزيا).
قىزدار: 40 كگ – پرەەتيسميتا بحول ء(ۇندىستان), 45 كگ – سوفيا ەسترادا ۆەلەز (كولۋمبيا), 49 كگ – لۋتسيا گونزالەس بوررەگو (يسپانيا), 55 كگ – نيكولەتا كوجاكارۋ (مولدوۆا), 59 كگ – ماريا پاز كاسادەۆالل (ارگەنتينا), 64 كگ – الەحاندرا رەنگيفو شيرينوز (ۆەنەسۋەلا), 71 كگ – يەسمار وشاو رودريگەس (ۆەنەسۋەلا), 76 كگ – ايانات جۇماعالي (قازاقستان), 81 كگ – سارا دال بو (يتاليا) جانە +81 كگ – ەتتا مايا لوۆە (كانادا).
