وسىعان وراي استانادا جازعى سپورت تۇرلەرىنەن پاراليمپيادالىق جاتتىعۋ ورتالىعىنىڭ اۋقىمى كەڭەيەدى. 2018 جىلى استانادا اشىلعان جازعى جانە قىسقى پاراليمپيادا سپورت تۇرلەرىنەن ۇلتتىق قۇرامالار مەن سپورتتىق رەزەرۆتەردى كاسىبي دايارلاۋعا ارنالعان نىسان بيىل جاڭا سپورت الاڭدارىمەن تولىقتىرىلماق. مۇگەدەكتىگى بار ادامدارعا ارنالعان مۇنداي ورتالىقتار اقش, ۇلىبريتانيا, جاپونيا, وڭتۇستىك كورەيادا بار.
اتالعان جوباعا قازاقستان ۇلتتىق پاراليمپيادا كوميتەتىنىڭ پرەزيدەنتى قايرات بورانباەۆ قارجى بولمەك جانە بۇل بىرەگەي سپورت نىسانى عانا ەمەس, سونداي-اق ەرەكشە قاجەتتىلىگى بار ادامدارعا ارنالعان جابدىقتارعا قىزمەت كورسەتۋ ورتالىعى بولماق.
«ورتالىقتا وتىرىپ وينايتىن ۆولەيبول, باسكەتبول, بوچچا جانە ارباداعى رەگبي, گولبول, ارباداعى تەننيسكە ارنالعان سپورت زالدارى بار. عيماراتتىڭ جالپى اۋدانى 3431 شارشى مەتردى قۇرايدى, سپورت زالدارىنىڭ كولەمى 48/26 مەترگە دەيىن جەتەدى. 2020 جىلى ۋەفا جوبالىق قۇجاتتامانى ازىرلەۋگە 45 مىڭ ەۋرو بولگەن, بۇل جوبانىڭ سپورت قاۋىمداستىعى ءۇشىن ماڭىزدى ەكەنىن كورسەتەدى», دەدى ۇلتتىق پاراليمپيادا كوميتەتىنىڭ پرەزيدەنتى.
ورتالىق ادامداردىڭ فيزيكالىق مۇمكىندىگىنە قاراماستان بارلىعىنا قولجەتىمدى بولاتىن ارنايى كوتەرگىشتەرمەن جانە ليفتىلەرمەن جابدىقتالادى. جوباعا ۋەفا پرەزيدەنتى الەكساندر چەفەريننىڭ ءوزى قولداۋ بىلدىرگەن.
«مۇندا قىزمەت ەتەتىندەر دە, جاتتىقتىرۋشىلار دا – ەرەكشە قاجەتتىلىگى بار جاندار. مۇنىڭ ءبارى ولاردىڭ ءبىرىن-ءبىرى جاقسى ءتۇسىنىپ, قوعام ومىرىنە ەركىن ارالاسۋى ءۇشىن قاجەت. مۇگەدەكتىگى بار كەز كەلگەن ادام وسىندا كەلىپ تەگىن جاتتىعا الادى. مۇنداعى ارنايى مەديتسينالىق كابينەت كەلۋشىلەردىڭ دەنساۋلىعىن تەكسەرىپ, كىمگە قانشالىقتى جۇكتەمە بەرۋگە, قانداي سپورت تۇرىمەن شۇعىلدانۋىنا بولاتىنىن انىقتايدى. سپورت نىسانىنداعى باسپالداق پەن پاندۋستان باستاپ جارىق جاعۋ نۇكتەلەرىنە دەيىن مۇگەدەك جانداردىڭ جاعدايىنا قاراي جابدىقتالعان. بارلىعى حالىقارالىق تالاپتارعا ساي», دەدى اتالعان كوميتەتتىڭ باس حاتشىسى ولجاس اقپامبەتوۆ.
ونىڭ ايتۋىنشا, استاناداعى جاڭا پاراليمپيادالىق ورتالىق – جاي عانا سپورت نىسانى ەمەس, ەرەكشە قاجەتتىلىگى بار ادامداردىڭ الەۋمەتتىك دامۋى ءۇشىن بىرەگەي الاڭ. پاراليمپيادالىق ورتالىق بولاشاقتا الەمدىك چەمپيوناتتار مەن حالىقارالىق جارىستار وتكىزۋگە نيەتتى. سونداي-اق ءبىلىم جۇيەسىن الەمدىك دەڭگەيگە جەتكىزۋ جوسپاردا بار.
«ورتالىققا 2021 جىلى وتا جاساتقاننان كەيىن كەلدىم. ماعان قالقانشا بەزىنىڭ قاتەرلى ىسىگى دياگنوزىن قويدى. ءبارى ەندى تولىققاندى ءومىر سۇرە المايسىڭ دەدى. مەن سول ساتتە ومىردەن كۇدەرىمدى ءۇزدىم, سالىم سۋعا كەتتى. كوپ كەشىكپەي وسى ورتالىققا كەلدىم. پاراليمپيادا ورتالىعى مەنى ومىرگە قايتا الىپ كەلگەندەي بولدى. بۇگىندە ۇستەل تەننيسىنەن ءبىراز جەتىستىككە جەتتىم. رەسپۋبليكالىق, قالالىق جارىستاردىڭ بىرنەشە دۇركىن جەڭىمپازى اتاندىم. سونداي-اق حالىقارالىق كونتەنتورعا تورەلىك ەتەمىن. بۇل – ءبىر كەزدە ومىردەن كۇدەر ۇزگەن مەن ءۇشىن ۇلكەن جەتىستىك», دەيدى 51 جاستاعى پاراليمپياداشى ولگا كورح.
جۋىردا استانادا 2024 جىلى پاريجدە وتەتىن پاراليمپيادا ويىندارىنا 100 كۇن قالعاندا قازاقستان مەن برازيليا اراسىندا ۆولەيبولدان جولداستىق كەزدەسۋ ءوتىپ, قۇراما كوماندامىز تاعى ءبىر بەلەستى باعىندىردى.
«ۆولەيبولدان قۇراما كوماندانىڭ كورسەتكىشى جامان ەمەس. قازىر فرانتسيا كومانداسىمەن جولداستىق كەزدەسۋگە دايىندالىپ جاتىرمىز. ودان كەيىن مىسىر كومانداسىمەن باق سىناسامىز. بۇرىن ۆولەيبولدان پاراليمپياداعا 12 كوماندا قاتىسسا, قازىر ىرىكتەۋدەن وتكەن سەگىز كوماندا عانا قاتىسادى», دەيدى ۆولەيبولدان پاراليمپيادا كومانداسىنىڭ جاتتىقتىرۋشىسى باۋىرجان تاحاۋوۆ.
ال blind فۋتبول دەگەندى ەستۋىڭىز بار ما؟ بۇل – ناشار كورەتىن ادامدارعا ارنالعان فۋتبول ءتۇرى. وسى ورتالىقتا كوزى مۇلدە كورمەيتىن سپورتشىلاردان قۇرالعان فۋتبول كومانداسى بار.
«مەنىڭ تۋعاننان كورۋ قابىلەتىم تومەن. ۋاقىت وتە كەلە كورۋىم ءتىپتى قيىنداي ءتۇستى. وسى ورتالىققا كەلگەنشە ءوزىمدى قوعامنان بولەك, كەم سەزىنەتىنمىن. سپورت مۇمكىندىكتەردىڭ شەكسىز ەكەنىن كورسەتتى. كوماندانىڭ وينىنا سىرتتان قاراپ تۇرعان ادام ءبىزدىڭ زاعيپ ەكەنىمىزگە سەنبەيدى. قازىر ايەلىم, تاربيەلەپ وتىرعان ەكى بالام بار. العا قويعان جوسپارىمىز, ماقساتىمىز كوپ», دەيدى فۋتبولشى قانات اقىنباەۆ.
پاراليمپيادالىق ورتالىق – الەمدىك چەمپيوناتتار مەن حالىقارالىق جارىستار وتەتىن ورىن, سونداي-اق الەمدىك دەڭگەيدەگى ءبىلىم ورتالىعى بولادى دەپ جوسپارلانىپ وتىر. الدا ورتالىقتىڭ جانىنان تاعى دا ءبىر قۇرىلىس نىسانى سالىنادى. قۇرىلىس قۇنى – 4,2 ميلليارد تەڭگە, اشىلۋى 2026 جىلعى 1 تامىزعا جوسپارلانعانىن ايتادى ورتالىق قىزمەتكەرلەرى.
