ءۇيلى بولعانداردىڭ ءبىرى يۋليا ءسابيتوۆا ەكەن. ول ءوزىنىڭ ۇلى جانە اتا-اناسىمەن بىرگە ءۇش بولمەلى ۇيگە قول جەتكىزىپتى. بۇرىن ويقالانىڭ كاليۋجنىي كوشەسىندەگى جەكەمەنشىك ۇيدە تۇرعان كورىنەدى. يۋليا جاڭا ءۇي العانىنا قۋانىپ قالعانىن جاسىرمادى. «پرەزيدەنتكە ايرىقشا راحمەت ايتقىم كەلەدى. ءبىزدىڭ جاققا كەلگەندە مەملەكەت باسشىسى ەشكىمنىڭ ەسكەرۋسىز قالمايتىنىن, ءبارى ءۇيلى بولاتىنىن ايتقان ەدى, سول سوزىندە تۇردى»,
دەدى ول.
وبلىس اكىمىنىڭ ات باسىن تىرەگەن ەكىنشى ءۇي – قۋانىش پەن گۇلدەن سەرىكوۆتەردىڭ پاتەرى. ولار دا بۇرىن ويقالانىڭ پەرمينوۆ كوشەسىندە 1959 جىلى سالىنعان ەسكى ۇيدە تۇرعان ەكەن. جاڭا ءۇي بەرگەندە بۇرىنعىمەن اۋماعى بىردەي ءبىر بولمەلى جايلى پاتەردى وزدەرى تاڭداپتى. ەكى بوبەگى بار جاس وتباسىنا بۇل ءۇي تارلاۋ, بىراق وزدەرىنىڭ بۇرىنعى ۇيىمەن سالىستىرعاندا ارتىق ەكەنىن ءۇي يەسىنىڭ اڭگىمەسىنەن بايقاپ قالدىق. ء«بىزدى دالاعا تاستاماي مىناداي جايلى پاتەر بەرگەن بيلىككە ريزامىز. اۋماعى بىردەيدى الاسىزدار دەگەن سوڭ وسى 36 شارشى مەترلىك پاتەردى ءوزىمىز قالادىق», دەدى قۋانىش.
جەكەمەنشىك ۇيلەردە تۇرعىسى كەلەتىندەرگە قالانىڭ «سولنەچنىي-2» شاعىن اۋدانىندا 520 ساپالى ۇيلەر سالىنىپ جاتىر. قازىر ولاردىڭ قۇرىلىسى قىزۋ ءجۇرىپ تۇر. «جاس كەلسە – ىسكە» دەگەندەي ونداعى قۇرىلىستاردى جۇرگىزۋگە «اۋىل» پارتياسىنىڭ باستاماسىمەن ستۋدەنتتىك قۇرىلىس وتريادى قۇرىلدى. ونىڭ قاتارىنا جەرگىلىكتى كوللەدجدەردىڭ جازعى كانيكۋلعا شىققان ستۋدەنتتەرى تارتىلماق. ولاردىڭ كوبى – قۇرىلىس جۇمىستارىنان حابارى بار بولاشاق ماماندار. «اۋىل» پارتياسىنىڭ وبلىستاعى فيليالىنىڭ باسشىسى, ىسكەر ازامات قايرات پىشەنباەۆ قۇرىلىس وتريادىن جاساقتاۋدا ۇلكەن بەلسەندىلىك كورسەتىپ ءجۇر. جۋىردا وسى وتريادپەن كەزدەسۋگە رەسپۋبليكالىق «اۋىل» پارتياسىنىڭ توراعاسى سەرىك ەگىزباەۆ تا كەلدى. ول وبلىس اكىمىمەن بىرگە ستۋدەنتتىك قۇرىلىس وتريادىنىڭ مۇشەلەرىمەن كەزدەسىپ, ولارعا تىلەكتەستىگىن ءبىلدىردى.
ستۋدەنتتىك قۇرىلىس وتريادتارىنىڭ بەلسەندى ەڭبەگى كەڭەس وداعى جىلدارىندا قاتتى ەسكەرىلەتىن. جاز بويى قۇرىلىستا جۇمىس ىستەپ, كۇزدە وزدەرىنە كيىم, تاماق جانە باسقا دا كەرەك-جاراقتارىن الۋ ءۇشىن جاستار ايانباي, شارشاۋ دەگەندى بىلمەي جۇمىس ىستەيتىن ەدى. ونىڭ ۇستىنە جاستار جاسامىس قۇرىلىسشىلارداي ەمەس, ساناسى جوعارى بولعاندىقتان ەڭبەككە ادال بولاتىن. سونداي باستامانىڭ قايتا كوتەرىلگەنى – جاقسىلىقتىڭ جاڭا جارشىسى شىعار دەگەن ويعا قالدىق. «اۋىل» پارتياسىنىڭ توراعاسى سەرىك ەگىزباەۆ پەن وبلىس اكىمى عاۋەز نۇرمۇحامبەتوۆ تە جاستارعا بەلسەندىلىك تانىتقانى ءۇشىن العىس ايتىپ, قوزعالىستىڭ ماڭىزدىلىعىن اتاپ ءوتتى.
ال اۋدانداردان جاراقتاندىرىلعان مەحانيكالىق بريگادالار قازىر تاسقىن باسقان شاعىن اۋداندارداعى سۋ كىرگەن ۇيلەردىڭ ماڭىن تازارتىپ, قالپىنا كەلتىرۋگە بولاتىندارىن جوندەۋگە كىرىسكەن. مۇنداعى جۇمىستاردىڭ دا وڭايلىقپەن اياقتالمايتىنى كورىنىپ تۇر.
وبلىستىق اكىمدىكتە «زيكستو» اق مەن پەتروپاۆل قالاسىنىڭ اكىمدىگى اراسىندا سۋ تاسقىنىنان زارداپ شەككەن تۇرعىندارعا ارنالعان جاڭا ۇيلەر مەن پاتەرلەردى جيھاز جانە ءىرى تۇرمىستىق جاراقتارمەن قامتاماسىز ەتۋ بويىنشا ىنتىماقتاستىق تۋرالى مەموراندۋم جاسالدى. بۇل قۇجاتقا پەتروپاۆل قالاسىنىڭ اكىمى سەرىك مۇحامەديەۆ پەن زاۋىتتىڭ باس ديرەكتورىنىڭ مىندەتىن اتقارۋشى ايدوس بەكماعامبەتوۆ قول قويدى. قايىرىمدىلىق كومەك رەتىندە «زيكستو» زاۋىتى جاڭا سالىنعان 520 ءۇي مەن ساتىپ الىناتىن 197 پاتەردى جيھازدار جانە تۇرمىستىق تەحنيكامەن قامتاماسىز ەتەتىن بولدى. وبلىس اكىمى كاسىپورىننىڭ باسشىلىعىنا تاسقىننان زارداپ شەككەن تۇرعىندارعا دەمەۋشىلىك كومەك كورسەتكەنى ءۇشىن العىسىن ءبىلدىردى.
ۇيلەرىن سۋ باسقان شاعىن اۋدانداردىڭ بالالارىنا جازعى دەمالىستى بەلسەندى ۇيىمداستىرۋ جۇمىستارى قولعا الىنىپ جاتىر. كانيكۋل ۋاقىتىندا 11 دەمالىس لاگەرى جۇمىس ىستەيدى. بۇل ورىنداردا سۋ باسقان شاعىن اۋداندارداعى مەكتەپ وقۋشىلارى دەم الادى. قازىردىڭ وزىندە بارلىق بالانىڭ 94 پايىزى قايدا ساۋىقتاندىرىلاتىنى جوسپارلانىپ قويعان. دەمالىس ماۋسىمى 10-15 ماۋسىمدا اشىلىپ, ارقايسىسى 10 كۇنگە سوزىلىپ, 5 كەزەكتى قامتيدى. وسى ادىسپەن 6 145 وقۋشى قامتىلادى. ءوڭىر باسشىسى جازعى دەمالىس ماۋسىمىندا بالالاردىڭ قاۋىپسىزدىگىنە باسا نازار اۋدارۋدى تاپسىردى.
سولتۇستىك قازاقستان وبلىسى
