كوللاجدى جاساعان – الماس ماناپ, «EQ»
ءىس-شاراعا مادەنيەت جانە اقپارات مينيسترلىگى ءدىن ىستەرى كوميتەتىنىڭ توراعاسى ە.نۇكەجانوۆ, كونفەسسياارالىق جانە وركەنيەتارالىق ديالوگتى دامىتۋ ورتالىعى باسقارما توراعاسىنىڭ مىندەتىن اتقارۋشى د.ەسەنوۆا, يسلام ىنتىماقتاستىعى ۇيىمى جانىنداعى يسلام, ونەر جانە مادەنيەت تاريحىن زەرتتەۋ ورتالىعىنىڭ (IRCICA) باس ديرەكتورى ماحمۋد ەرول كىلىچ, حالىقارالىق ۇيىمداردىڭ, ءۇندىستان, تۇركيا, مىسىر, پاكىستان, ۇلىبريتانيا, رەسەي, يزرايل, ۆاتيكان ەلدەرىنىڭ عىلىمي جانە ساراپتامالىق قوعامداستىعىنىڭ وكىلدەرى قاتىستى.
كونفەرەنتسيا بارىسىندا قاتىسۋشىلار ءدىني ليدەرلەردىڭ وركەنيەتارالىق جانە دىنارالىق ديالوگتى نىعايتۋعا, ولاردىڭ ۇزاقمەرزىمدى تۇراقتىلىعىنا قول جەتكىزۋگە جانە حالىقارالىق قاقتىعىستىڭ الدىن الۋعا قاتىسۋىن كەڭەيتۋدىڭ نەگىزگى اسپەكتىلەرىن تالقىلادى, سونداي-اق الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ XXI وتىرىسىندا قابىلدانعان «الەمدىك جانە ءداستۇرلى دىندەر ليدەرلەرى سەزىن دامىتۋدىڭ 2023-2033 جىلدارعا ارنالعان تۇجىرىمداماسىن» ىسكە اسىرۋ جونىندە پىكىر الماستى.
ء«دىني كوشباسشىلار مەن ءدىني ديپلوماتيانىڭ ءرولى الەمدىك ساياسي كوشباسشىلارمەن, حالىقارالىق ۇيىمدارمەن جانە ءدىني قاۋىمداستىقتارمەن ديالوگ ءۇشىن ماڭىزدى. الەمنىڭ جەتەكشى ءدىني كوشباسشىلارىنىڭ حالىقارالىق اگرەسسورلارعا تىكەلەي بىرلەسكەن ۇندەۋى قازىردىڭ وزىندە حالىقارالىق شيەلەنىستى تومەندەتۋى مۇمكىن», دەدى جيىندا ءدىن ىستەرى كوميتەتىنىڭ توراعاسى ە.نۇكەجانوۆ.
يىۇ جانىنداعى يسلام, ونەر جانە مادەنيەت تاريحىن زەرتتەۋ ورتالىعىنىڭ (IRCICA) باس ديرەكتورى ماحمۋد ەرول كىلىچتىڭ ايتۋىنشا, 2022 جىلى الەمدىك جانە ءداستۇرلى دىندەر كوشباسشىلارىنىڭ VII سەزىندە قابىلدانعان دەكلاراتسيا دىندەر كەزدەسەتىن جەرلەردە جەمىستى كونسۋلتاتيۆتىك نەگىزدىڭ بولۋىن قامتاماسىز ەتەدى. «قۇجات دىندەر مەن ولاردىڭ كوشباسشىلارىنىڭ ادامزات ءۇشىن ءادىل جانە بەيبىت بولاشاق قۇرۋداعى ءرولىن كورسەتەدى», دەدى ول.
ال ۇندىستانداعى «Somaiya Vidyavihar» ۋنيۆەرسيتەتىنىڭ رەكتورى سامير شانتيلال سومايا جۇرەگى كەڭ ادامدار ءۇشىن الەم ءبىر وتباسى ەكەنىن اتاپ ءوتتى. «كليماتتىڭ وزگەرۋى جاعدايىندا ءبىز الەمدى ءوزىمىزدىڭ وتباسىمىز رەتىندە قابىلداۋدان باسقا امالىمىز جوق ەكەنىن ءتۇسىنۋىمىز كەرەك. ءوزىڭىز تۋرالى ويلاۋ – بۇل الەم تۋرالى ويلاۋ. ءبىز قاسيەتتى جازبالاردان شابىت الۋىمىز كەرەك, عىلىم ۇيرەنۋىمىز كەرەك, شىندىققا كوز جۇگىرتىپ, ارەكەت ەتۋىمىز قاجەت», دەپ اتاپ ءوتتى ول.
كونفەرەنتسيا مودەراتورى د.ەسەنوۆا قاتىسۋشىلاردىڭ باياندامالارىن قورىتىندىلاي كەلە, ولارعا ءىس-شارانى جان-جاقتى جانە دايەكتى قولداعانى ءۇشىن ريزاشىلىعىن ءبىلدىردى, سونداي-اق دىنارالىق ديالوگتى ىلگەرىلەتۋدە, بەيبىتشىلىكتىڭ ورنىقتى دامۋىنا جانە ارىپتەستىكتى ودان ءارى كەڭەيتۋگە قول جەتكىزۋدەگى ءدىني كوشباسشىلاردىڭ ءرولى وراسان ەكەنىن ايتتى. حالىقارالىق ونلاين-كونفەرەنتسيا قورىتىندىسى بويىنشا ساراپشىلار الەمدىك جانە ءداستۇرلى دىندەردىڭ جاھاندىق ديالوگىن دامىتۋدا ەلدەردىڭ حالىقارالىق باستامالارىنىڭ ماڭىزدىلىعىن اتاپ ءوتتى, سونىمەن قاتار دىنارالىق ديالوگتى نىعايتۋ ماسەلەلەرى بويىنشا ودان ءارى جەمىستى ىنتىماقتاستىق تۋرالى ۋاعدالاستىققا قول جەتكىزدى.
